Pinongurugan 37

Si Yusup om kosusulodan niyo

1Tinumotog-o sono si Yakub molak so Kanaan, iri pinolakan nu amo niyo ri, 2om itu yo kotuturanan suat so sompinunguan niyo.

Iya nu opulu om turu toun umur ni Yusup, moongipat-o iyo nu baanan nu dumba maid nu poroongkaan niyo, inonakan ni Bilha om ni Jilpa, iri duo pinokosawo ni Yakub. Onu yo po gogoma'on oraai nu poroongkaan ni Yusup niabar niyo so amo nosiro ri.

3Osamod po si Yakub so si Yusup ko' so inonakan wokon niyo ri, so' si Yusup-o su nopuanak nu otuo yo iyo. Waali yo sono niyo si Yusup nu sabung sobana ko oparu'. 4Noilaan-o po nu poroongkaan niyo ri nu osamod po amo nosiro ri so iyo, bisigon sono nosiro si Yusup, om dai kopokimutangar-tangar nu ousai.

5Ido awi, nokoupi sono si Yusup. Nga tuturani yo po niyo so poroongkaan niyo ri, makin po sono ororaayan nosiro so iyo. 6Mutongaro yo si Yusup so nosiro nu, “Rongowo muyu po! 7Nokoupi aku nu dii-dii toko so umo mongongkom. Iri kongkom ku ri tinumunggor, om kongkom muyu ri linumiwut so kongkom ku ri om tinumuku mongusaa',” koo.

8Mutongaro yo poroongkaan niyo ri nu, “Ponontaman mu sono gaam ong osiliw ko nu raja mogkuasa so kai,” koo. Indadi, sobana ko rumoraayan sono nosiro so si Yusup nu upian om totongaron niyo ri.

9Nokoupi po si Yusup, om tuturani yo niyo so poroongkaan niyo ri nu, “Nokoupi aku yo nu minongusaa' so aku su runat, wulan om opulu om ido korombituon,” koo.

10Nituturan-a iri niyo so amo niyo ri, nga inungotan iyo nu amo niyo ri nu, “Onu ka nu upian ono? Ponontaman mu gaam ong mongusaa' aku, si ino mu, om poroongkaan mu tu so ikau,” koo. 11Mokimalun sono poroongkaan ni Yusup so iyo, nga nikorod-a iri so inawo ong amo nosiro ri.#P'rapan 7:9

Niwoli si Yusup nu kosusulodan niyo ri

12Ido runat, laid nu poroongkaan ni Yusup mongipat nu baanan nu dumba nu amo nosiro so Sikim, 13tongaro yo ni Yakub si Yusup nu, “Ian po so Sikim, so pinongipatan nu poroongkaan mu ri nu baanan nu dumba toko ri,” koo.

Sumombuto yo si Yusup nu, “Oo, mian aku ya,” koo.

14Mutongaro yo amo niyo ri nu, “Impaa yo poroongkaan mu ri ong monguro-nguro nosiro om baanan nu dumba toko ri, om pululi' tuui pokoilo so aku,” koo. Poponowo yo sono niyo si Yusup kiat so kogona'an nu Ibrun.

15Dai ya olaid nokologa' yo iyo so Sikim. Laid niyo manou-panou so umo ri, nokosambat sono iyo ido kusoi, om mongoduato yo so iyo nu, “Isai ka diumon mu?” koo.

16Sumombuto yo si Yusup nu, “Modium aku nu poroongkaan ku ri. Minongipat nosiro nu baanan nu dumba. Oilaan mu ka, maman, ong siombo nosiro?” koo.

17Mutongaro yo lobuw iiri nu, “Nokopinda yo nosiro. Norongou ku nosiro muupakat nu mian so Dutan,” koo. Sumuuto yo sono si Yusup so poroongkaan niyo ri, om nosambat-o niyo so Dutan.

18Orawu' po si Yusup, nosiou-o iyo nu poroongkaan niyo ri, om dai po iyo nokologa' muupokato yo tinu-tinu so nosiro nu potoyon iyo nu, 19“Siowi bo, lumoga' yo si moongupian. 20Potoyo toko iyo om pilayi toko bangkai niyo no so porigi d'ado sungoi. Obari toko ya sono nu tinompaan iyo nu kulos-kulos orongit. Purimono toko ya ong onu yo kourugan nu upian niyo iiri,” koo.

21Nga norongou-a ni Rubin pinuupokatan nosiro ri, moingin sono iyo monapul so si Yusup. Mutongaro yo iyo nu, “Adang-a potoyon iyo. 22Poosuwo toko ya iyo so porigi so umo tu, nga adang-o lubakon intawa pilatan,” koo. Tinangar niyo soko iri so' mokipoponapul so si Yusup om suu'on iyo pouli' so waloi.

23Nokologa' yo po si Yusup so poroongkaan niyo ri, luus-o nosiro sabung owarong niyo ri, 24om goyato yo iyo paasuw so porigi d'ado sungoi.

25Laid nosiro mongokan, nokosiou nosiro nu lobuw solusuk ni Ismail manou-panou kiat so Giliad mian so Masir. Ongo unta nosiro ri kisinakoi nu rompa-rompaan, inosak#37:25 inosak; intawa: minyak lanung om salong. 26Mutongaro yo sono si Yahuda so kosusulodan niyo ri nu, “D'ado kosudaan momatoi nu adi' toko om mongolim nu ono. 27Owarong po niwoli toko iyo so lobuw oono. Kodi toko ya insaadi iyo. Onu koo pona nga adi' toko ya iyo,” koo. Tinumaayun-o sono kosusulodan niyo ri nu tangar niyo iiri. 28Om iya nu tumalib moomudagang kiat so Midian iiri, lobusi yo nosiro si Yusup kiat so porigi ri om wolii yo nosiro so lobuw solusuk ni Ismail, orogo duo nopulu kaping siin pirok. Indadi owito yo sono si Yusup nu moomudagang iiri so Masir.#P'rapan 7:9

29Nokopululi' si Rubin so porigi ri, d'ado yo dii si Yusup. Pisio yo sono niyo sabung niyo ri oupusan. 30Mululio yo iyo so kosusulodan niyo ri om mutongaro yo nu, “Ado yo dii adi' toko ri! Onu sono waalon ku?” koo.

31Mongogoraso yo sono nosiro nu kambing om louti yo nosiro sabung ni Yusup so raa' nu kambing-i. 32Om poopiti yo nosiro sabung iiri so amo nosiro ri maid nu kodau nu, “Sabung-o po iitu nooyangan mai. Songapan gaam itu no nu anak mu ri,” koo.

33Notondu'an-a ni Yakub sabung iiri, om mutongaro yo iyo nu, “Bana ya nu sabung itu nu anak ku ri! Tantu tinompaan-o iyo nu kulos-kulos orongit. Andii boto, nouyas-uyas-o si Yusup nu kulos-kulos!” koo. 34Pisi'-pisio yo sono ni Yakub pokakas niyo ri oupusan om mupokokaso yo nu pokokason mongulid. Sobana ko olaid si Yakub tumangi' moupus nu anak niyo iiri. 35Kiawi' inonakan niyo woinoi kusoi linumoga' monginsosamod so iyo, nga dai ya oinsosomodan, om mutongaro yo iyo nu, “Upuson ku anak ku iri musingkopatoi ku,” koo. Soko iri yo iyo dadan oupus so si Yusup.

36Laid nu iri, nokowoli-o si Yusup so Masir nu ongo lobuw Midian dii si Putipar, soujar nu raja om wowaidon nu moongipat so waloi nu raja.

Currently Selected:

Pinongurugan 37: TomPWPgLgPn

Highlight

Copy