Pinongurugan 27

Binorokatan ni Isak si Yakub

nu soko anak ongko

1Ido runat, pagka otuo yo bana si Isak om dai yo kowawai, paawo yo niyo anak ongko niyo si Isau, om tongaro yo nu, “Oo anak ku!” koo.

“Onu nu iri, apa,” koo si Isau.

2Mutongaro yo si Isak nu, “Oilaan mu yo nu otuo aku yo itu om dai yo su olaid matoi. 3Indadi, olapo yo pana mu ri, om pupori po so gowuton. 4Onsako sono so aku nu soko koototoman ku ri, om owito tuui. Oopod aku mongokan, borokatan ku nai' ikau nu dai po su matoi-o,” koo.

5Norongou-a ni Ribka tinangar ni Isak so si Isau iiri. Indadi nokopanou-panou-a si Isau mupori, 6tongaro yo sono ni Ribka si Yakub nu, “Koopod-a ni apa mu mutangar so si Isau nu, 7‘Pupori po om onsako sono so aku nu owarong. Kookan aku yo om borokatan ku nai' ikau nu dai po su matoi-o,’ koo. 8Indadi rongowo yo, om waalo yo onu yo po nisuu' ku tu. 9Ian-o so baanan nu kambing toko ri, om pomili' yo duo uyog nu dumba olomu. Onsakon ku ya nu soko koototoman ni apa mu. 10Oopod ono, owito sono dii so iyo, su' oopod-o po iyo mongokan, borokatan ko yo nu dai po iyo matoi-o,” koo.

11Nga mutongaro yo si Yakub so ino niyo ri nu, “Kibulu boto ong si Isau, om aku maalus kulit. 12Bang kuyutan kulit ku no ni apa, oilaan sono niyo nu mongaakal aku ya, om okon-a sono ko' borokatan aku nga sumpaan aku nai' niyo,” koo.

13Sumombuto yo ino niyo ri nu, “Ikod-a kigagau bo anak. Waalo ya nisuu' ku tu. Monumpa pona iyo, aku ya su osuat. Panou-o mongalap nu kambing-i,” koo. 14Momponowo yo sono si Yakub mongalap nu kambing-i, om owito yo so ino niyo ri, om onsako yo ni Ribka, soko koototoman ni Isak. 15Olapo yo ni Ribka pokakas ni Isau oparu', nokotou' so bosalag-i, om posobungi yo so si Yakub. 16Kinopitan-a niyo longon om liou ni Yakub nu kulit nu kambing. 17Taaki yo niyo so si Yakub inapui niyo owarong iiri om baang-baang winaal niyo ri.

18Soko iri po, miano yo si Yakub dii si Isak om mutongaro yo nu, “Oo, apa,” koo.

“Oo, isai ko ka si Isau ko' si Yakub?” koo si Isak.

19Sumombuto yo si Yakub nu, “Aku yo si Isau, anak ongko mu ri. Nowaal ku yo nisuu' mu ri. Ogom-o om okano yo inimporian ku tu, su' oborokatan mu aku,” koo.

20Mutongaro yo si Isak nu, “Osikap ko ya bo kaalap,” koo.

Sumombuto yo si Yakub nu, “Tinabang aku nu TUHAN Kinoringan usaa'on mu no,” koo.

21Mutongaro yo si Isak so si Yakub nu, “Obi' yo tuui so aku, su' okuyutan ku ikau nu bana ka nu si Isau ko,” koo. 22Mobio yo sono si Yakub, om koromi yo ni apa niyo, om mutongaro yo nu, “Bongut mu no soko si Yakub, nga longon mu tu soko longon ni Isau,” koo. 23Dai notondu'an ni Isak si Yakub so' longon-i kibulu soko longon ni Isau, nga uyud-uyud niyo mongoborakat so si Yakub,

24mongoduato po iyo nu, “Bana ya ka nu si Isau ko?” koo.

“Bana ya bo, apa,” koo si Yakub.

25Mutongaro yo sono si Isak nu, “Taaki yo so aku onsi inonsak mu no. Oopod aku mongokan, borokatan ku nai' ikau,” koo. Taaki yo ni Yakub onsi inonsak iiri maid nu sungoi nu anggur om monginumo yo si Isak. 26Mutongaro yo si Isak nu, “Oo anak, obi' yo sobana om singudi aku yo,” koo. 27Nokoobi' yo po si Yakub, nosingud sono ni Isak nu soko awau-a bana ni Isau, om borokati yo niyo si Yakub nu,

“Oo anak ku,

olanung ko sobana,

soko koolanung nu umo

binorokatan-o nu Kinoringan.

28Muda-mudaan ong

taakan ko nu Kinoringan

nu ambun kiat so langit,

om umo mu nga ookang.

Muda-mudaan ong

taakan ko Niyo

nu paroi om anggur

nu osuang sobana.

29Muda-mudaan ong

ouripon mu ongo bansa wokon,

om orumaton ko nosiro.

Muda-mudaan ong

osiliw ko nu wowaidon

nu kosusulodan mu,

om orumaton ko

nu solusuk mu.

Muda-mudaan ong

sindoraayon-a lobuw

mongindoraai so ikau

om oborokatan lobuw

mongoborakat so ikau,”

koo.#Ibr 11:20 #Pgn 12:3

Minokiborakat si Isau so si Isak

30Noopod-a si Isak mongoborakat so si Yakub, om nokopanou si Yakub, nokouli' yo sono si Isau, ongko niyo ri kiat so pinuporian. 31Iyo nga minongonsak-o sono nu ipookan so si apa niyo soko koototoman niyo ri. Noonsak-o po, owito yo niyo dii si apa niyo om mutongaro yo nu, “Ogom-o apa, om okano yo inimporian ku tu, su' oborokatan mu aku,” koo.

32“Isai ko ka?” koo si Isak.

Sumombuto yo si Isau nu, “Aku yo si Isau, anak ongko mu ri,” koo.

33Nokokikip sono si Isak maid nu mongoduat nu, “Bang soko ono, isai minupori om minongowit tuui so aku sisuna ri? Inokan ku yo sono iri nu dai ko po nokologa' ri, binorokatan ku iyo om borakat iiri songapan-o niyo musingkolaid,” koo.

34Norongou-o po iri ni Isau, moginoontobo yo iyo tumangi' so' olunggui sobana iyo om mutongaro yo nu, “Aku nga borokati ya, apa!” koo.

35“Linumoga' si adi' mu tuui mongaakal so aku. Inalap niyo borakat niborakat ku sobana yo so ikau-i,” koo si Isak.

36Mutongaro yo si Isau nu, “Koinduo yo sono niyo mongaakal so aku. Otoop-a nu ingoranan iyo so si Yakub#27:36: Ngaran Yakub so tangar Ibrani ogon-ogon muinong nu tangar “moongaakal” (Bosa'on po Pgn 25:26). so' inalap po niyo songapan ku nu anak ongko, om sinolod po niyo niborakat so aku iiri. D'ado yo gaam borakat mu wokon niborakat mu so aku!” koo.#Pgn 25:29-34

37Sumombuto yo si Isak nu, “Siniliw ku yo iyo nu wowaidon mu, om kosusulodan niyo siniliw ku yo nu uripon niyo. Tinaakan ku ya iyo nu borakat suat so paroi om anggur. Indadi ado yo oilaan ku wokon niborakat so ikau,” koo.

38Sumosog-a bana si Isau mokiborakat so si apa niyo nu, “Ido-ido ya gaam borakat mu apa. Borokati aku yo, apa!” koo, om tumongio yo iyo.#Ibr 12:17

39Mutongaro yo si Isak nu,

“Oo anak ku, d'ado yo ambun

kiat so langit suat so ikau,

om ado yo umo ookang

suat so ikau.

40Dadan ko lumawan

nu alod-alod mu,

nga dai ko ya potoyon,

om ouripon ko ni adi' mu,

nga bang lumawan ko,

dai ko ya ouripon niyo,”

koo.#Ibr 11:20 #Pgn 36:8; 2 Raj 8:20

41Bisigon sono ni Isau si Yakub so' nitaak-o ni Isak borakat niyo so si adi' niyo. Momikir sono iyo nu, “Dai yo olaid matoi si apa. Nga koduung olibuas mongulid, potoyon ku ya si Yakub,” koo.

Sinuu' si Yakub mian dii si Laban

42Norongou-o po ni Ribka padu-padu ni Isau oono, minonuu' sono iyo poponogina so si Yakub om mutongaro yo nu, “Ingati yo, mokisusuli' si aka' mu so ikau padu momatoi. 43Waalo yo ponuu'an ku so ikau tu. Ogou-o mian so ongko ku si Laban dii so Aram. 44Polak-o dii so iyo komuro-komuro ya laid, musingkoingkoyod nu koo'ungot ni Isau so ikau-o, 45om olupaan-a niyo kiawi' winaal mu iiri. Oopod ono, monuu' aku ya nu lobuw popongalap so ikau muli', so' dai su kosoromo ong kopuiya kou yo matoi,” koo.

46Indadi minutangar-a si Ribka so si Isak nu, “Notopodan aku yo mido-ido so kososowaan ni Isau bansa Iit oono. Bang koontun-a pudi si Yakub nu roraa bansa oono, owarong po matoi aku,” koo.

Currently Selected:

Pinongurugan 27: TomPWPgLgPn

Highlight

Copy