Pinongurugan 17

Sunat pinonapus nu porojonjian

nu Kinoringan so si Abram

1Iya nu siwoi nopulu om siwoi toun umur ni Abram, mokisiou-o yo TUHAN so iyo om mutongaro yo nu, “Oo Abram, aku yo su Kinoringan Maayo Kuasa. Pongasip-o so Aku om waalo yo dadan koinginan Ku no. 2Mongojanji Aku so ikau nu posuangon Ku solusuk mu no,” koo. 3Sumurukudo yo si Abram, om mutongaro yo TUHAN nu, 4-5“Itu yo porojonjian Ku so ikau, ono yo osiliw ko nu aki nu osuang bansa. Pagka soko ono, okon-o ko si Abram po ngaran mu, nga si Abraham.#17:4-5: So tangar Ibrani ngaran Abraham ogon-ogon muinong nu tangar “aki nu osuang bansa”.#Rm 4:17 6Posuangon Ku mongkupu mu om kuwai so nosiro osiliw nu raja. Osuang sobana solusuk mu om ourug nosiro nu osuang bansa.

7Tumanon Ku ya janji Ku iitu so ikau om so solusuk mu solusuk-monolusuk, om dai olupaan janji oono musingkolaid. Aku yo Kinoringan mu om solusuk mu.#Luk 1:55 8Itaak Ku so ikau tana' polak-polakan mu nu soko porantau iitu om so solusuk mu. Kiawi' tana' Kanaan osongapan nu inonakan om komongkupuan mu musingkolaid, om Aku yo Kinoringan nosiro.#P'rapan 7:5

9Kiat-o so ikau kumoo yo so solusuk-monolusuk mu, subai ototog nu janji iitu, 10ono yo ikau om kiawi' solusuk mu kusoi subai sunatan.#P'rapan 7:8; Rm 4:11 11-12Kiat nu ono sono tu, subai sunatan mu kiawi' lolaing kusoi umur so kowalu runat kopuonakan-o. Soko ono ya pudi inonakan nu uripon so bosalag mu, intawa iri pinuwoli mu ri. Sunat oono yo pongilaan nu porojonjian Ku so kou. 13Kiawi' subai sunatan, om sunat oono yo su tanda' so koyuwan pongilaan nu janji Ku so ikau oono dai olupaan musingkolaid. 14Isai kusoi dai sunatan, okon ko songapan Ku, so' dai iyo sumuut nu janji Ku oono.

15Om kodi yo sono ingorani sawo mu no so si Sarai, nga si Sara. 16Borokatan Ku iyo om kopuanak iyo nu kusoi. Urugon ku iyo nu odu nu ongo bansa, om solusuk niyo no kuwai osiliw nu raja,” koo.

17Sumurukudo yo sono si Abraham, nga nokokaayak iyo nu nopikiran niyo nu, “Onu koo kianak po lobuw ong maatus-o toun umur? Onu koo po kopuanak si Sara nu siwoi yo nopulu toun umur niyo no?” koo. 18Mutongaro yo sono iyo so Kinoringan nu, “Owarong si Ismail nai' su borokatan mu,” koo.

19Nga sumombuto yo Kinoringan nu, “Dai! Muanak-a ono si Sara nu kusoi om ingoranan mu so si Isak. Otatap Aku ya mongoondom nu janji Ku so anak oono om solusuk niyo musingkolaid. 20Nga tumbaidon Ku ya indomoon mu suat so si Ismail-o. Pagka soko ono, borokatan Ku ya iyo om posuangon Ku solusuk niyo. Osiliw iyo nu aki nu opulu om duo bansa, om siliwon Ku solusuk niyo no nu bansa obantug. 21Nga janji Ku no niposongapan Ku so si Isak, anak mu nu opuanak ni Sara no nu toun koimbagu soko iya ya iitu,” koo. 22Noopod-o po Kinoringan mutangar nu iri, laiwi yo Niyo si Abraham.

23Osipo yo ni Abraham pinonuu'an nu Kinoringan so iyo ri, om runat-a iiri sunati yo niyo si Ismail, om kiawi' anak kusoi so sompinunguan niyo, soko iri ya pudi kouriponan, om uripon pinuwoli niyo ri. 24Iya nu pinonunatan so si Abraham, umur niyo siwoi nopulu om siwoi toun, 25om umur ni Ismail, anak niyo ri, opulu yo om tolu toun. 26Pinopuiya ya nosiro nu runat pinonunatan, 27maid nu kouriponan niyo ri.

Currently Selected:

Pinongurugan 17: TomPWPgLgPn

Highlight

Copy