Pinongurugan 12

Minujanji Kinoringan so si Abram

1Mutongaro yo TUHAN so si Abram nu,

“Ogoli yo tontong

pinolakan mu no,

suku-sakat mu,

om waloi ni amo mu,

om ian-o so tontong

nituduk Ku so ikau-o.#P'rapan 7:2-3; Ibr 11:8

2Posuangon Ku solusuk mu,

om ourug nosiro nu bansa obantug.

Borokatan Ku ikau

om ngaran mu nga kobantug,

om kopongoborakat ko

nu lobuw suang.

3Borokatan Ku

lobuw mongoborakat so ikau.

Om sumpaan Ku lobuw

monumpa so ikau.

Om mokiborakat sono

kiawi' bansa so Aku,

soko poongoborakat Ku so ikau,”

koo.#Gal 3:8

4-5Umur ni Abram turu nopulu om limo toun iya nu linaiwan niyo kiat so Aran, musuat nu pinonuu'an nu TUHAN so iyo ri. Murongkato yo si Abram so Kanaan maid nu sawo niyo si Sarai, om si Lut komonakon niyo ri, om kiawi' orata' om kouriponan naalap niyo so Aran.

Nokologa' yo po nosiro so Kanaan, 6lumongkopo yo si Abram so tana' oono sampai nokologa' so Sikim so ido puun pongusaa'an ingoranan nu Muri. Iya oono kakal-a molak-polak lobuw Kanaan nai.

7Mokisiowo yo sono TUHAN so si Abram, om mutongaro yo nu, “Tontong iitu yo su itaak Ku so solusuk mu,” koo. Momaalo yo si Abram nu ranggar dii suat so TUHAN, iri minokisiou so iyo ri.#P'rapan 7:5; Gal 3:16 8Nopupus iri, lumombuso yo iyo so solatan, so tontong kibulud umpak so pusitan nu bandar Bitil, om mubosolago yo so puola'an nu Bitil om Aai, Bitil umpak so lidopan om Aai umpak so pusitan. Dii nga minomaal-a iyo nu ranggar pongusaa'an so TUHAN. 9Nopupus iri, lumombuso po iyo kiat so ido tontong kumoo so tontong wokon, sundur so solatan nu tana' Kanaan.

Si Abram dii so Masir

10Nga mosaan nu likop dii so Kanaan. Pagka soko iri, lumombuso po si Abram so solatan, so wonuo Masir, om molako yo dii musingkotalib nu likop iiri. 11Laid nosiro tumalib so pubaatan om masuw so Masir, mutongaro yo iyo so sawo niyo si Sarai nu, “Sobana ko oparu' ko. 12Bang osiou ko nu lobuw Masir, otokod nosiro nu sawo ku ikau om potoyon aku sono, om olapon ko nosiro. 13Indadi, owarong tongaron mu ya nu adi' ku ikau, su' dai aku potoyon nga worongon aku nai' so' moingin nosiro so ikau,” koo.#Pgn 20:2; 26:7

14Om bana ya ponokod ni Abram, so' nokotalib po nosiro so pubaatan-i, om nokologa' yo so Masir, nosiou nu lobuw Masir-i nu sobana ko oparu' si Sarai. 15Tinu-tinu moomugogoma'on so waloi nu raja ri nokosiou so si Sarai, om nopokoilo sono so raja ri nu sobana ko oparu' iyo. Indadi, owito yo sono iyo so waloi nu raja ri. 16Pagka moingin raja ri so si Sarai, owarong sobana sono iyo so si Abram, om tinaakan si Abram nu kouriponan, kambing, dumba, sapi, koladai om unta.

17Nga pagka inalap nu raja ri si Sarai, posokito yo iyo om lobuw so waloi niyo ri nu TUHAN, nu sobana ko osantap. 18Paawo yo sono nu raja ri si Abram om duato yo nu, “Onu ka winaal mu so aku iitu? Nokuro su dai mu aku pinokoilo nu sawo mu iyo? 19Nokuro su tinangar mu nu adi' mu iyo, om pinosimaidan mu ya aku mongalap so iyo nu sawo ku? Tidi yo sawo mu tu. Olapo yo om panou-o!” koo. 20Indadi, suuo yo sono nu raja ri tinu-tinu moomugogoma'on niyo ri polabus so si Abram kiat dii maid nu sawo niyo om kiawi' songapan niyo ri.

Currently Selected:

Pinongurugan 12: TomPWPgLgPn

Highlight

Copy