1 Kurintus 7

Duduat suat so muontun

1Kosiono, sumambut aku nu duduat muyu so surat muyu iiri.

Bang ido kusoi dai moingin montun,#7:1: Bang ido kusoi dai moingin montun …; intawa: Mutangar kou nu bang kusoi moingin montun … owarong-a maam. 2Nga owarong po ong kiawi' kusoi om woinoi kisawo, su' dai ointotayag sumundal. 3Waalon-o nu kusoi onu yo po otoop waalon niyo so sawo, om woinoi nga waalon-o onu yo po otoop waalon niyo so sawo. 4Dai kopogkuasa woinoi nu koyuwan niyo. Kopogkuasa yo po nu koyuwan niyo no nga sawo niyo no. Soko ono ya pudi kusoi dai kopogkuasa nu koyuwan niyo. Kopogkuasa yo po nu koyuwan niyo no nga sawo niyo no. 5Adang-o kumodos nu koinginan nu ido soido. Obuli ya nu soko ono sontagal ong kiduo-duo nga koputaayun-a, su' kopogdu'a nosiro nu osanang. Nga kotalib po ono, subai mutogimumung-o soko mupatut waalon nu sompusosondamin. Bang okon ko soko ono, oruoi kou ointotayag nu Wowaidon nu Moinat, so' dai kou kokodos nu koinginan.

6Soko ono pona tongaron ku nga okon-a ko ponuu'an ku, sondiang ko ontob-a nu pongobiatan. 7Sobana yo moingin aku po ong kiawi' lobuw minsuw soko aku su d'ado sawo. Nga kiawi' lobuw nokotorima' yo nu kogoosan notantu yo nu Kinoringan. Kuwai lobuw kokodos dai montun om kuwai ya nu dai kokodos.

8Suat so lobuw dai po nokoontun intawa balu yo, itu su pontudukan ku, ono yo, owarong-o nu dai montun soko aku. 9Nga bang dai kou kokodos, subai montun-a, so' owarong po montun kou ko' okuasa kou nu koinginan muyu dai okodosan.

10Suat so lobuw nokoontun-o, itu yo su pontudukan ku, (Sobana yo okon-a ko kiat s'aku pontudukan iitu no, nga kiat so Kinoringan), ono yo woinoi nu nokoontun-o, adang-o paada' po nu sawo niyo. 11Nga bang niada' ya niyo, adang-o mokiontun po nu kusoi wokon, sondiang ko mululi' so sawo niyo gulu ri. Om kusoi nga dai ya kowasa paada' nu sawo niyo.#Mat 5:32; 19:9; Mrk 10:11-12; Luk 16:18

12Nga suat so lobuw wokon, itu yo su pongobiatan ku kondiri nu okon ko tangar nu Tuhan, ono yo bang kuwai kusoi poimaid kisawo nu okon ko poimaid, om moingin-a woinoi oono mido so iyo, kusoi oono dai kowasa paada' so iyo. 13Om bang kuwai woinoi poimaid kisawo nu dai po poimaid so si Kristus, om moingin-a kusoi oono mido so iyo, dai kowasa woinoi oono paada' so iyo. 14Mutangar aku soko ono, so' iri kusoi d'ado po koimaidan-i, songopanon nu Kinoringan noungkiat so kinopuontunan niyo nu woinoi songapan-o nu Kinoringan. Soko ono ya pudi woinoi dai po poimaid-o nga songopanon-a nu Kinoringan noungkiat so pinongontunan nu kusoi songapan-o nu Kinoringan. Bang okon ko soko ono, inonakan nosiro no tantu soko inonakan nu lobuw dai poimaid so Tuhan, ampa inonakan oono songapan-o nu Kinoringan. 15Nga bang kusoi intawa woinoi dai poimaid oono paada' nu sawo niyo lobuw poimaid, adang-o iyo taanon. Kiat-o so kusoi kikoimaidan oono kumoo yo so woinoi kikoimaidan oono kikopogboya'an momili', so' pinaau toko nu Kinoringan ourug nu lobuw songapan Niyo, tayon ong kopususulut kou, ono yo posimaidan-a nosiro momaal nu ono. 16Ikau su woinoi kisawo om kikoimaidan so Tuhan, ombo kinoilaan mu nu kopongowit ko nu sawo mu no mian so kowiawan musingkolaid. Om kou su kusoi kikoimaidan so Tuhan, ombo kinoilaan mu nu kopongowit ko nu sawo mu no mian so kowiawan musingkolaid.

Wiau kou yo musuat nu kinopomili'an

nu Kinoringan

17Patut ong ido soido nu lobuw mongowaid nu kogoyaan niyo nu soko notantu yo nu Kinoringan so iyo, iya pinomili'an nu Kinoringan nu poimaidon so Iyo, musuat nu kogoosan nitaak nu Kinoringan. Nituduk ku yo itu no so siombo-ombo ya nu puimpugan, 18ono yo bang kuwai ido koyuwan nosunatan-o laid nu iya niyo poimaid so Tuhan, adang-o liongon tanda' nu sunat oono. Soko ono ya, bang lobuw dai po nosunatan nu iya poimaid iyo so Tuhan, adang-o iyo mokisunat po. 19Mongowaid nu oturan musunat intawa dai, kiduo-duo nu ono dai ya oogot. Ono yo su oogot mongowaid nu ponuu'an nu Kinoringan. 20Patut ong ido soido nu lobuw miau maid nu kogoyaan nu soko iya pinomili'an nu Kinoringan so iyo, 21ono yo bang ido uripon nopoimaid so si Kristus, adang-o mokiingkoyod nu uripon. Nga bang lila'an iyo mingkoyod nu uripon, owarong-a mingkoyod iyo. 22So' uripon nu nopoimaid-o so Tuhan Yisus Kristus, songapan-o nu Kinoringan, nu nokolabus-o kiat so ponguriponan nu koraayan. Om lobuw okon ko uripon, nu nopoimaid-o so Tuhan, soko uripon sono iyo ni Yisus Kristus. 23Sinuu' yo nu Kinoringan si Kristus monapul so kou kiat so koraayan sampai nosongapan kou Niyo, om soko uripon kou sono ni Kristus. Indadi ikod kou yo pokiuripon nu lobuw. 24Nadi, soko tinangar ku sisuna ri, patut ong ido soido nu lobuw miau musuat nu kogoyaan nu iya pinomili'an so iyo nu Kinoringan poimaid so si Kristus.

Sambut ni Paulus so lobuw ado po sawo

om balu

25Kosiono sumambut aku nu duduat muyu suat so lobuw d'ado po sawo. Nisambut ku iitu okon-a ko tangar nu Tuhan nga tongaron ku ya ono nu pongobiat ku. Pagka sinomodan aku nu Kinoringan, opongoorapan-a tangar ku oono.

26Bang siowan kiawi' koogutan nu ono sono tu, so pikiran ku owarong po ong tumotog-a lobuw miau soko kowiawan niyo nu ono sono tu nu d'ado sawo. 27Kusoi kisawo yo, adang-o paada' nu sawo niyo, om kusoi d'ado po sawo ri, adang-o modium nu sawo. 28Bang montun kou, dai ya mourug nu koraayan. Soko ono ya, bang montun roraa intawa omulok, dai ya mourug nu koraayan. Nga lobuw minuontun oono osuang oirosaan nu koogutan, om oingin aku nu kolaiw kou kiat so koogutan oono.

29Oo su kosusulodan ku, kuanon ku soko itu, dai yo olaid kologa'an koimbagu nu Tuhan. Ono yo ko', kiat kosiono, poguluan po gogoma'on nu Tuhan, om iri nai' gogoma'on muyu kondiri. Indadi, soko ono po, iri kusoi kisawo, popuinongon-a nu kusoi d'ado po sawo. 30Lobuw tumangi', ondomon-o nu sontagal-a koogutan nu ono sono tu. Lobuw osudu'an, ondomon-o nu sontagal-a kosudu'an oono. Lobuw nokopomoli nu gonggamon, ondomon-o nu sontagal-a iyo sumongapan nu nowoli niyo no, 31om lobuw maid-waid nu onu-onu gogoma'on so wonuo tu, ondomon-o nu sontagal-a iyo maid-waid nu ono, so' dai yo olaid wonuo tu lumiong nu soko kogoyaan nu ono sono tu.

32Moingin aku nu kolabus kou kiat so koogutan. Kusoi d'ado po sawo no, otoroido niyo mugogoma'on so Tuhan, so' moingin iyo monginsanang nu Tuhan. 33Nga iri kusoi kisawo ri yo, osuang bana pikiron niyo suat so onu yo po so wonuo tu, so' moingin iyo monginsanang nu inawo nu sawo niyo. 34Koompusan, otayad-tayad sono kiro-kiroon niyo. Woinoi ado po sawo intawa balu, kotoroido momikir onu yo po suat so Tuhan, so' moingin iyo nu osongapan nu Kinoringan kiawi' kowiawan niyo. Nga woinoi kisawo yo, subai momikir nu onu yo po so wonuo tu, so' moingin monginsanang nu inawo nu sawo niyo.

35Sinurat ku kiawi' iitu no okon-a ko momogos aku nu itu om ono, nga monabang aku ya so kou. Koinginan ku yo po waalon muyu ombo ya obana om osuat-o, om kotoroido kou momikir nu Tuhan.

36Bang ido amo dai mongolila' nu roraa niyo montun, om nosukod-o roraa oono, om kopomikir iyo koimbagu nu owarong poontunon iyo, patut ong waalon niyo soko ono om ado ya kosola'an. 37Nga bang ido amo nokoponapus-o nu dai yo poontunon roraa niyo no, om kokodos-a roraa oono nu koinginan niyo om okon ko pogoson-a iyo dai poontun, gama' nu amo oono owarong-a. 38Nadi, lobuw poontun nu anak niyo, owarong, nga lobuw dai poontun nu anak niyo, owarong po.

39Woinoi kisawo, dai kowasa mokiontun nu sondiang ong miau po sawo niyo no. Nga bang matoi-o sawo niyo no, kolabus-o sono iyo so pogkuosaan nu sawo niyo om kowasa yo momili' nu isai-isai pokiontunan niyo, nga kusoi pokiontunan niyo oono subai poimaid so si Kristus. 40Nga dogo so pomikiran, ountung po bana woinoi oono ong dai yo mokiontun koimbagu. Om oirosaanan ku nu ono yo su nituduk nu Atod nu Kinoringan so inawo ku.

Currently Selected:

1 Kurintus 7: TomPWPgLgPn

Highlight

Copy