1 Kurintus 6

Mongodaawa nu lobuw inong koimaidan so pubisora'an

1Dai otoop ong mualod kou muinong poimaid om mokibisara' sono so moongobisara' dai poimaid so Tuhan. Patut mokibisara' kou so lobuw nosongapan-o nu Kinoringan. 2Dai muyu gaam oilaan nu kou yo lobuw nosongapan nu Kinoringan su mongobisara' nu lobuw so wonuo tu. Nadi, bang kou yo su mongobisara' so nosiro, tantu ogoosan muyu ya mongobisara' ono oruoi-a bisora'on-o. 3Nolupaan muyu yo gaam nu toko yo su mongobisara' nu kiawi' susuu'on nu Kinoringan ong wagu. Indadi, bang soko ono, ogoosan toko ya onu yo po nololagan toko runat-runat. 4Bang kuwai ourug nu soko ono nai so kou, owarong po ong mokibisara' kou so lobuw d'ado muad pangkat so puimpugan muyu ko' mokibisara' so lobuw dai poimaid so Tuhan. 5Sobana ko koiyu'-iyu' kou! Dai su oimaidon nu d'ado muad so kou oilo popuusai nu pusongkiwalan nu inong poimaid. 6Nga, kuwai po lobuw mongodaawa nu inong niyo poimaid, om mokibisara' so lobuw dai poimaid nu Tuhan.

7Adang po ka ong mongowit nu inong muyu poimaid mokibisara' so lobuw dai poimaid, insan pusosongkiwalan nai so kou no, ono yo su ponondu'an nu kogoyaan muyu bana ko dai musuat so lobuw poimaid so si Yisus. Owarong po pokosola'on kou nu dai musuat intawa porugion kou. 8Nga kou nai' su pokosala' nu dai musuat om mongorugi nu lobuw wokon, om soko ono yo goma'on muyu so kosusulodan inong koimaidan! 9Oilaan muyu yo nu, lobuw dadan momaal nu koraayan, dai kowaid so Kinoringan mogkuasa ong wagu, ono yo lobuw gumilat, moongusaa' nu tinindobuw, lulumapa', sondad kusoi om sondad woinoi mutolunda', 10moonakou, orusuk, moomusingawuk, pokoraai nu lobuw om mongoligot. Kiawi' lobuw soko ono dai kowaid so Kinoringan mogkuasa ong wagu. 11Soko ono yo kogoyaan nu tinu-tinu koyuwan so kou nu gulu ri, nga inidu' yo nu Kinoringan kiawi' koinginan oraai oono nai so kou. Nosongapan kou yo nu Kinoringan nu mugogoma'on so Iyo. Nokopuwarong kou yo so Iyo, so' poimaid kou so si Tuhan Yisus Kristus om kinuasa nu Atod nu Kinoringan toko.

Royowon-o Kinoringan nu koyuwan muyu

12Kuwai gaam mutangar nu, “Kowasa aku ya mugogoma'on nu onu-onu ya koinginan ku,” koo. Bana ya nai' ono, nga suat so aku, okon-a ko kiawi' nu ono kikosudaan. Osala' aku ong momaal aku nu onu-onu ya, om mokikuasa nu ono.#1 Kur 10:23 13Kuwai ya mutangar nu, “Kookanan-o yo po suat-a nu tian, om tian-o nga suat-a so kookanan,” koo. Bana ya nai' ono, nga kiduo-duo nu ono liongon-a nu Kinoringan. Koyuwan nu lobuw tu dai kowasa pokayon nu nipogsundal, sondiang ko pokayon mugogoma'on so Tuhan, om koyuwan toko tu pokayon nu Tuhan. 14Linuli'an-o nu Kinoringan si Tuhan Yisus kiat so pinotoyan. Nadi toko nga powiawon-a nu Kinoringan nu kuasa Niyo.

15Oilaan muyu yo nu, koyuwan muyu no soko ido boogian nu koyuwan ni Kristus, so' nokopuido kou yo so Iyo. Nadi, dai yo su otoop mongalap nu ido boogian nu koyuwan ni Kristus om siliwon ku po nu soko ido boogian nu koyuwan nu lobuw susumundal! 16Intawa kalu dai muyu po noilaan nu, lobuw mondot so lobuw sundal kopuido yo sono nu sundal oono. Soko nokosurat-o so Buuk nu Kinoringan nu, “Nosiro kiduo nga ourug nu soko ido yo koyuwan,” koo ri.#Pgn 2:24 17Nga isai yo po kopuido yo so Tuhan, Atod nu Tuhan om atod nu lobuw oono osiliw nu soko ido yo.

18Ikod kou yo kisundal, so' kiawi' koraayan wokon waalon nu lobuw, dai ya koinsaim bana nu koyuwan, nga bang sumundal, ono yo su koinsaim bana nu koyuwan niyo. 19Orotio muyu yo nu koyuwan muyu no yo po intoronan nu Atod nu Kinoringan. Atod oono rumusod so koyuwan muyu, om Kinoringan-a su potaak nu Atod oono so kou. Koyuwan muyu no okon ko songapan muyu, nga songapan nu Kinoringan.#1 Kur 3:16; 2 Kur 6:16 20Winoli kou yo nu Kinoringan om nopuur-o Niyo. Ono yo ko' pokayo muyu yo koyuwan muyu no kowarong-warong suat-a so kobontugan nu Kinoringan.

Currently Selected:

1 Kurintus 6: TomPWPgLgPn

Highlight

Copy