1 Kurintus 1

1Surat iitu kiat so aku, si Paulus, iri pinili' nu Kinoringan sumiliw nu pinongoorapan ni Yisus Kristus, musuat nu koinginan Niyo, om kiat so sulod toko si Sustinis.

2Surat iitu niloga' ku nai so kou, puimpugan so bandar Kurintus. Sinongapan kou yo nu Kinoringan so' nokoido kou yo dii si Yisus Kristus. Om soko ono ya kiawi' lobuw so siombo-ombo ya, iri mongusaa' so si Yisus Kristus, Tuhan nosiro om Tuhan toko no ya.#P'rapan 18:1

3Mindamo aku so Kinoringan, Amo toko om si Tuhan Yisus Kristus su' d'ado ya pupus mongoborakat om posanang nu inawo muyu.

Pongunsopotan ni Paulus

4Dadan aku mongunsopot so Kinoringan suat so kou, so' pagka nokoido kou yo so si Kristus, osuang sobana koworongan winaal Niyo so kou. 5Pagka nosongapan kou ni Kristus, osuang borakat nitaak so kou nu Kinoringan, ono yo koorati kou sobana nu kodau kiat so Kinoringan om moilo kou sono potuduk nu ono. 6Om nokosondot-o so inawo muyu no abar nituturan mai so kou suat so si Kristus, 7sampai dai kou okobusan nu onu-onu ya nitaak nu Atod nu Kinoringan so lobuw poimaid, nu laid muyu mongimat nu kologa'an koimbagu ni Kristus. 8Si Kristus-o su potatap nu koimaidan muyu musingkologa' nu pongoowi'an nu wonuo tu, su' bang lumoga' Iyo koimbagu mongobisara' nu wonuo tu, dai kou yo sono otapud. 9Kinoringan-o su sobana ko opongoorapan. Iyo yo su minomaau so kou popuido so Anak Niyo si Yisus Kristus, Tuhan toko.

Pupinigan so puimpugan

10-12Oo su kosusulodan ku, pinokoilo aku nu suku-sakat ni Klui nu musosagka' kou, ono yo kuwai so kou mutangar nu, “Aku maid so si Paulus,” kuwai ya mutangar nu, “Aku maid so si Apulus,” wokon po mutangar nu, “Aku maid so si Pitrus,” nga wokon po mutangar nu, “Aku maid so si Kristus,” koo. Pagka sinuu' aku nu Tuhan toko si Yisus Kristus, mindamo aku so kou nu putotaayun kou yo. Adang kou yo mupipinig. Puimpug kou yo om muido yo nu pomikiran om koinowaan. 13Dai ya nobaagi'-baagi' si Kristus. Okon-a ko aku, si Paulus su nokosalib polabus so kou kiat so koraayan muyu. Om okon-a ko diniu' kou om ourug sono nu mompomaid ku.

14Munsopot aku so' dai aku ya nokopongodiu' ido pona so kou, sondiang ko si Krispus om si Gayus.#P'rapan 18:8; 19:29; Rm 16:23 15Indadi, adang kou yo mutangar nu minongodiu' aku so kou su' siliwon ku kolaai nu mompomaid ku. 16(Ono po pala, si Stipanus om anak sawo niyo, aku su minongodiu'. Nga sondiang ko nosiro, oondoman ku d'ado yo wokon diniu' ku.)#1 Kur 16:15 17Okon-a ko mongodiu' su ponuu'an ni Kristus so aku, sondiang ko potuturan nu Abar Owarong kiat so Kinoringan. Om iya nu potuturan aku nu ono, okon-a ko maid nu koo'ilo nu lobuw poomutangar ku, su' oorotian nu lobuw, om dai okomaai-maayan sono kinopotoyan ni Kristus so salib.

Kuasa om koo'ilo nu Kinoringan kointolang dii si Kristus

18Iri yo po pontudukan suat so kinopotoyan ni Kristus so salib-i nga pokolowongon nu lobuw sundur so kopotoyan. Nga toko yo po, iri kaalap nu kowiawan musingkolaid kiat so Kinoringan, oilaan toko nu pontudukan oono yo su pointolang nu kuasa nu Kinoringan. 19Nokosurat-o tinangar nu Kinoringan so Buuk Niyo nu,

“Raagon Ku koo'ilo

nu lobuw kikoilaan,

om idu'on Ku

pongoorotian nosiro,”

koo ri.#Yis 29:14

20Indadi, onu kosudaan nu lobuw kikoilaan? Onu po sono kosudaan nu moomontuduk nu Ukum? Om onu po sono kosudaan nu lobuw kipongoorotian so wonuo tu? So' niintolang-o nu Kinoringan nu, kiawi' koilaan so wonuo tu musiliw nu kolowongan.#Ayb 12:17; Yis 19:12; 33:18; 44:25

21Kinomuro koilo nu lobuw, dai ya iyo kotondu' nu Kinoringan ong ontob-a nu koilaan niyo kondiri, ala' nai' pagka oilo Kinoringan, osanang inawo Niyo monapul nu lobuw poimaid so Iyo maid so Abar Owarong nituturan mai, iri tokodon nu lobuw nu tuturan olowong. 22Lobuw Yaudi sumosog mokisisiou nu koiran-iran ponondu'an nosiro, om lobuw Yunani mongoogot nu koilaan so wonuo tu. 23Nga toko yo po potuturan nu, minatoi si Kristus so salib. Pontudukan oono koinsosona nu lobuw Yaudi, om pokolowongon nu lobuw okon ko Yaudi. 24Nga suat so lobuw pinaau-o nu Kinoringan, lobuw ka nu Yaudi ko' okon ko Yaudi, koorati nu pontudukan-o po suat so kinosoliban ni Kristus su pointolang nu kuasa om koo'ilo nu Kinoringan. 25So' pudi pona momikir lobuw nu olowong gama' nu Kinoringan, nga kaalib po koo'ilo Niyo nu koo'ilo nu lobuw. Om iri yo po tokodon nu lobuw nu kokugui nu Kinoringan, nga obasag po Iyo ko' lobuw.

Kuasa nu Kinoringan om kookugui

nu lobuw

26Oo su kosusulodan ku, ondomo muyu yo kogoyaan muyu iya nu pinomili'an nu Kinoringan so kou ri. Owako so kou oilo, kikuasa, intawa kipangkat so ponokodan nu lobuw, 27so' tinomod-a nu Kinoringan momili' nu lobuw olowong so ponokodan nu lobuw, su' mongoiyu' nu lobuw oilo. Om pinili' ya Niyo onu yo po okugui so ponokodan nu lobuw, su' mongoiyu' nu lobuw obasag. 28Tinomod-a nu Kinoringan momili' isai yo po obaba', bisigon, om d'ado kosudaan so ponokodan nu lobuw so wonuo tu, su' idu'on Niyo onu yo po oogot so ponokodan nu lobuw. 29Indadi, d'ado ido kopusingkaayo-ayo so tiningkuangon nu Kinoringan. 30Kinoringan-o su nopopuido so kou so si Kristus, om si Kristus-o su inungkiaton nu koo'ilo toko. Si Kristus-a su nopopuwarong so toko koimbagu so Kinoringan, minongurug so toko nu dadan maid nu koinginan nu Kinoringan, om polabus so toko kiat so koraayan. 31Indadi, notuman-o sono nokosurat so Buuk nu Kinoringan nu, “Isai musingondos, subai mongondos nu onu yo po gogoma'on nu Tuhan,” koo ri.#Yir 9:24

Currently Selected:

1 Kurintus 1: TomPWPgLgPn

Highlight

Copy