Matyu 12
12
Sambata Dokonya Kamongo Doko Jisasa
1 #
Make 2:23-28; Luku 6:1-5 #
Diut 23:25
Sambata gii mendenya Jisasa baanya disaipolo dupa-pipa wita ee mendenya-kaita peami. Dokopa baanya disaipolo dupa lopo kaeyapala, tee pyao wita dii dupa kii lao nyepapu tambao neami. 2Dopa piaminopa Parasi dupame kandatala Jisasa lamaiyoo, “Sambata gii dokonya loome napipenge latae singi doko embanya disaipolo dupame pilyaminona kanda” leami. 3#1 Sml 21:1-6Dokopa Jisasame dokaita lamaiyoo, “Dapitapi, baa-pipa kateamipi, dupa lopo kaeyapala, baame pia doko nyakamame itaki napiamipi? 4#Lep 24:9Dapita lotuu anda nee nyetae dokonya kolandatala, breta Gote opaa maitae, baapi, baa-pipa kateamipi, dupame nanapenge, prisa dupame iki napengena lao loome latae singi dupa nyepala neami. 5#Nambaa 28:9-10Prisa dupame lotuu anda nee nyetae dokonya Sambata gii dokonya kalai pilyamino dokome, Sambata gii doko koeyasingimaka doko, dokaita-kisa tenge mende napengena lao Mosesanya loo dupanya pepa pyapae singi doko nyakamame itaki napiamipi? 6Mendita mendeme lotuu anda nee nyetae doko ita minao asa silyamona lao nambame nyakama langilyo. 7#Osea 6:6; Matyu 9:13‘Endakali dupame kundi iki dimi laka lao masala naelyo. Endakali dupa kondo kaeyami laka lao masilyona’ lapae singi dokonya tenge doko nyakamame soo nyiamili doko, endakali tenge nakatenge dupa-kisa tenge setala naeyamili. 8Sambata dokonya Kamongo doko Akalinya Ikiningi dokona” lea.
Akali Kingi Yangi Talyanga Mende Tolasakamaiyamo Doko
9 #
Make 3:1-6; Luku 6:6-11 Dokopa Jisasame ee doko yakinatala, dokaitanya lotuu anda dokonya pao kolandeamopa, 10andakote dokonya akali kingi yangi talyanga mende petea. Peteamopa, Parasi dupame Jisasa-kisa tenge setamana lao masetala, baa tipa pyoo, “Sambata gii dokonya endakalinya yaina dupa mee jakamaipengena lao loome latae singipi?” leami. 11#Luku 14:5Dopa leaminopa Jisasame dokaita lamaiyoo, “Sambata gii mendenya, embanya sipisipi mende yuli mendenya mangatamopa, tange kopyoo nanyetepe? 12Sipisipi dupa endakalimi ita minao kalyamino. Dopana, Sambata gii dokonya kalai epe pipenge doko loome daa latae nasingina” lea. 13Dopa latala baame akali doko lamaiyoo, “Embanya kingi doko tinoko” lea. Dokopa baanya kingi doko tinokeamopa, kingi doko auu petala kingi yangi epe dopaleaka jia. 14Dopa piamopa, Parasi dupame Jisasa aipa petala pyao kumasemape lao kamaka kolalyetala kambuiyami.
Kalai Akali Gotenya Yapao Nyepae Doko
15Kambuiyamino kandatala, Jisasa baa yuu doko yakinatala pea. Dokopa endakali kambu andake mendapuame baa watao peami dupanya yaina pyapae dupa pitaka baame mee jakamaiya. 16Dokopa endakali dokaitame Jisasa baa akali dokona lao, lao panala naena lea. 17Dopa pia dokome, propeta Aisaiyame pii lea dake angi jia: 18#Ais 42:1-4“Dake nambanya kalai akali, nambame baa yapao nyio doko. Baa nambanya mona setenge. Nambame baa etete auu kaenge. Nambanya Spirita doko baa-kisa palyetopa, baame mana tolatae dupa akali tata waka dupa-kisa lao panata. 19Baame pii yanda pyoo laa naeyata. Baame pii puu lao laa naeyataka. Baame pii mende latamopa, endakali kaitinisa katatami dupame nasetami. 20Kembo maitange tambapae mende baame etete lakanyala naeyata. Ita langa konjalanya kii lao seta mende baame etete konjala naeyataka. Dopa pyoo katao, mana tolatae dokome koo dupa pitaka ita minina lata gii dokonya tuu lata. 21Akali tata waka dupame baanya kenge dokonya tungi pyatala nee kaeyao malisoo katatamina” lapae singi doko angi jia.
Jisasa-Kisa Belesabulu Palelyamo Leamino Doko
22 #
Make 3:20-30; Luku 11:14-23 Gii dokopa endakali mendapuame imambu koo paleta, akali lenge monda, muumaa mende laminao Jisasa katea dokonya epeami. Ipateaminopa, Jisasame akali doko auu piseteamopa, baa pii lao, lenge auu pyoo tao pia. 23Dokopa endakali kambu piami dupa pitaka walu latala lao pituu, “Akali dake Dapita Ikiningi dokope?” leami. 24#Matyu 9:34; 10:25Parasi dupame pii doko sepala lao pituu, “Imambu koo dupanya isingi Belesabulu dokonya pupu lapae dokome akali dakeme imambu koo dupa watao pilyamona” leami. 25Dopa leaminopa, dokaitanya masiami dupa Jisasame kandatala dokaita lamaiyoo, “Isa yuu dakenya kingdom mendenya endakali dupa pyaloo petala wakale pitamino doko, kingdom doko koeyata. Siti mendepi, anda mendenya palengepi, dupa yango-lapo pyaloo pitamino doko, dokaita kyeto joo nakatatami. 26Dopaka pyoo, Sataneme Satane yango watao pyatamo doko, baa tata dupa wakale pita. Dopa pitamopa, baanya kingdom doko aipa petala seta? 27Belesabulu dokonya pupu lapae dokome imambu koo dupa nambame watao pingi-tamo doko, nyakamanya tata dupame apinya pupu lapae dokome imambu koo dupa watao pingima? Nyakamanya tata dupameaka nyakama yapatami. 28Gotenya Spirita dokonya kyeto dokome imambu koo dupa nambame watao pingi-tamo doko, Gotenya kingdom doko nyakama-kisa ipao silyamosa pingi. 29Akali mendeme akali pupu lapae mendenya andaka kolandatala baa yaki pinya setala naeyatamo doko, baanya pinju dupa kapa pao nyetape? Daa, akali pupu lapae doko wambao kendeme yaki pinya setapala pinju dupa nyeta. 30#Make 9:40Namba nisala naenge endakali dokome namba yanda pingingi. Namba-pipa kambu pyala naenge endakali dokome endakali dupa tale pisingi. 31Tenge dokonya nambame nyakama langilyo: Endakali dupanya koo pingipi, lao nepengepi, dupa pitaka Goteme kunao nepakamaita. Dopaka doko, Spirita doko lao nepata endakali dokonya koo doko Goteme kunao nepakamaiya naeyata. 32#Luku 12:10Akalinya Ikiningi doko pii koo lata endakali dokonya koo doko Goteme kunao nepakamaita. Dopaka doko, Oli Spirita doko pii koo lata endakali dokonya koo doko Goteme indupapi, tangapi kunao nepakamaiya naeyatana” lea.
Ita Dii Dupa Kandatala Ita Doko Dopale-Lamo Lao Masingina Leamo Doko
33 #
Matyu 7:16-20; Luku 6:43-44 “Ita mendenya dii mandelya dupa kandatala, ita doko dopale-lamo lao masingi. Ita mende epe-tamo doko, dii mandita dupa epeaka. Ita mende koo-tamo doko, dii mandita dupa koaka. 34#Matyu 3:7; 15:18; 23:33; Luku 3:7Nyakama koo kanopatonya mandipae, koo pingima dupame aipa petala pii epe mende latami? Endakalinya monanya paliu tumbilya dokoaka kambunya pyakalyingi. 35Endakali epe mendenya monanya epe palelya dokoaka kambunya pyakalyingi. Endakali koo mendenya monanya koo palelya dokoaka kambunya pyakalyingi. 36Nambame nyakama dapa langilyo: Goteme endakali dupa yapatamo gii dokopa, endakali dupame masala naeyao pii mendapu ambe lelyamino dupanyaka, Goteme aipuma leamipi lao tipa pitamopa, yanu pyao lamaitami. 37Embanya pii late dokonyaka, Goteme emba-kisa tenge mende nasilyamona lata. Embanya pii late dokonyaka, Goteme emba-kisa tenge mende silyamona latana” lea.
Jona-Kisa Piamo Dokonya Leamo Doko
38 #
Matyu 16:1-4; Make 8:11-12; Luku 11:29-32 #
Luku 11:16
Gii dokopa Mosesanya loo mana nyepaepi, Parasipi mendapuame Jisasa lamaiyoo, “Mana Lenge, embame mirakolo mende pitinopa kandamu laka lao masilyamanona” leami. 39Dopa leaminopa Jisasame dokaitanya pii yanu pyakamaiyoo, “Endakali koo pingipi, Gote yakinengepi dupame mirakolo mende kandamana nambame pii lelyamino. Dopa lelyaminoaka doko, propeta Jona-kisa mirakolo pia doko iki makande petae silyamona, mirakolo waka mende nakanjamino. 40#Jona 1:17Jona baa kotaka gii tepo, kuka gii tepoaka, pisa andake mendenya ingi koko paleamoliaka pyoo, Akalinya Ikiningi doko, kotaka gii tepo, kuka gii tepoaka, yuu koko palita. 41#Jona 3:5Joname akali Ninipe tange dupa Gotenya pii doko panao lamaiyamopa, dokaitame sepala mona kapilyiami. Salapape! Mendita mendeme Jona ita minao asa silyamo. Tenge dokonya, Goteme endakali dupa yapatamo gii dokopa, Ninipe tange dupa endakali indupa palelyamino dupa-pipa sakatatala, dupa tenge setapala tanda maipengena latami. 42#1 Kiŋi 10:1-10; 2 Kron 9:1-12Kuini enda kingi tolaetena tange dokome yuu londati-waka pituu, Solomonenya masepae epe dupanya pii dupa nyotoo lao epea. Salapape! Mendita mendeme Solomone ita minao asa silyamo. Tenge dokonya, Goteme endakali dupa yapatamo gii dokopa, kuini enda kingi tolaetena tange doko endakali indupa palelyamino dupa-pipa sakatatala, dupa tenge setapala tanda maipengena latana” lea.
Imambu Koo Dupa Pilyingima Dokonya Leamo Doko
43 #
Luku 11:24-26
“Imambu koo mendeme endakali mende-kisa paliu pyakalyetala, endaki naepenge yuu dupanya koto nyoo katapenge panda kutao paenge. 44Kutao kaeyapala baame lao pituu, ‘Nambame anda wamba yakineo dokonya pilyotoo’ lenge. Dopa latala, imambu koo dokome pilyetala kandelyamopa, anda dokonya mende napaliu, kuni nasoo, auu pyoo wasetae katenge. 45Dokopa baa ita minao imambu etete koo kalange mendatupa lanyepala, anda dokonya kolandatala katengema. Dokopa, wamba akali doko kopeta katengeaka doko, imambu koo dutupa baa-kisa ipao palelyaminopa, baa eteteaka kopeta katenge. Endakali koo pingi indupa palelyamino dupa-kisa dopaka pitamopa, etete kopeta katatamina” lea.
Jisasanya Endangipi Kaiminingipi Dupa Dupana Leamo Doko
46 #
Make 3:31-35; Luku 8:19-21 Jisasame endakali kambu dupa pii lamaiyoo kateamopa, baanya endangi dokopi, kaiminingipi dupame baa pii lamaimana lao kamaka kateami. 47Kateaminopa endakali mendeme Jisasa lamaiyoo, “Embanya endangi dokopi, kaiminingipi dupame emba pii langimana lao kamaka kalyaminona” lea. 48Dopa leamopa Jisasame akali dokonya pii yanu pyakamaiyoo, “Nambanya endangi doko api? Nambanya kaiminingi dupa apitupape?” lea. 49Dopa latala, baanya kingi kondeme baanya disaipolo dupa laitaka petae katao lao pituu, “Endakali pilyamino dakaita nambanya endangipi, kaiminingipina kanjepa. 50Nambanya Takange kaiti-kisa katenge dokonya masingili pingima endakali dupa nambanya kaiminingipi, pimalengepi, endangipina” lea.
Currently Selected:
Matyu 12: Enga
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
