ಯೋಹಾನ 21
21
ಯೇಸು ಖ್ಹಾತ್ ಶಿಷ್ಯರ್‌ನ ದೆಖಾಯೊತೆ
1ಅನ ಬಾದ್‌ಮ, ಯೇಸು ತಿಬೇರಿಯ ದರ‍್ಯಾವ್‌ಕನ ಇನ ಶಿಷ್ಯರ್‌ನ ದೆಖಾಯೊ. ಯೋ ಅಮ್ ಚಾ಼ಲ್ಯುತೆ. 2ಸೀಮೋನ್ ಪೇತ್ರಬಿ, ದಿದುಮಕರಿ ತೋಮಾಬಿ, ನತಾನಿಯೇಲ್‌ ಆ ಗಲಿಲಾಯನು ಕಾನಾ ಕರಿ ಗಾಮ್‌ವಾಳೊ, ಜೆಬೆದಾಯನ ಛಿಯ್ಯಾ, ಅಜು಼ ಯೇಸುನ ಬಿಜ಼ ಬೇ ಶಿಷ್ಯರ್‌ ಥಾ. 3ಸೀಮೋನ್ ಪೇತ್ರನೆ ಇವ್ಣುನ, “ಮೇ ಮಾಛ಼್‌ಲಾ ಖ್ಹಾವಾನ ವಳ್ಯೊಜ಼ವುಸ್‌” ಕರಿ ಬೋಲ್ಯೊ.
ತದೆ ಇವ್ಣೆ, “ಹಮೇಬಿ ತಾರ ಜೋ಼ಡೆ ಐಯೇಸ್‌” ಕರಿ ಇನ ಬೋಲ್ಯ. ಇವ್ಣೆ ಜೈ಼ನ್‌, ಡೋಣ್‌ ಚ಼ಢ್ಯಾ, ಕತೋಬಿ ಯೋ ರಾತ್‌ ಅಖ್ಖು ಏಕ್‌ ಮಾಛ್ಲು಼ಬಿ ಮಳ್ಯುಕೊಯ್ನಿ. 4ವ್ಹಾಣು ಹುವ್ವಾದೀನ್, ಯೇಸು ಕನಾರೆಕನ ಭಿಯೋಥೊ; ತೋಬಿ ಶಿಷ್ಯರ್‌ನ ಯೋ ಯೇಸು ಕರಿ ಮಾಲುಮ್‌ ಕೋ ಪಡ್ಯುನಿ. 5ತದೆ ಯೇಸುನೆ ಇವ್ಣುನ, “ದೋಸ್ತಿವೊ ತುಮೂನ ಮಾಛ್ಲು಼ ಮಳ್ಯುಕಿ ಶು?” ಕರಿ ಪುಛಾ಼ಯೊ.
ಇವ್ಣೆ, “ಕೊಯ್ನಿ” ಕರಿ ಜವಾಬ್‌ ದಿದಾ.
6ಯೇಸುನೆ ಇವ್ಣುನ, “ಡೋಣ್‌ನಿ ಖಾವಿ ಬಾಜು಼ಮ ಜಾ಼ಳು ನಾಖ್ಯಾತೊ, ತುಮೂನ ಥೋಡು ಮಾಛ಼್‌ಲಾ ಮಳ್‌ಶೆ” ಕರಿ ಬೋಲ್ಯೊ. ಇವ್ಣೆ ಇಮ್ಮಸ್ ಜಾ಼ಳು ನಾಕ್ತಾನ ಘಣು ಮಾಛ಼್‌ಲಾ ಮಳ್ಯುತೆ ಇನಖ್ಹಾಜೆ, ಜಾ಼ಳಾನ ಪಾಛು಼ ಮಹಿ ಖೇಚಾ಼ನ ಕೋ ಹುಯೂನಿ.
7ಯೇಸುನೊ ಪ್ಯಾರ್‌ನೊ ಶಿಷ್ಯನೆ ಪೇತ್ರನ, “ಯೋ ಪ್ರಭುಲಾ!” ಕರಿ ಬೋಲ್ಯೊ. ಸೀಮೋನ್ ಪೇತ್ರನೆ ಇನ ಖ್ಹಮ್‌ಜಿನ್‌, ಮಾಛ್ಲು಼ ಖ್ಹಾವಾನಖ್ಹಾಜೆ ಪೇತ್ರನೆ ಝೋ಼ಳ್‍ನಾನ ಕಾಡಿ ಮ್ಹೇಲಿರಾಖ್ಯೊಥೊ ಯೊ ಪಾಛು಼ ಉಪ್ಪರ್‌ಲ್ಯು ಝ಼ಗ್ಗಾನ ಪೇರ‍್ಹಿಲೀನ್‌ ದರ‍್ಯಾವ್‌ಮ ಕೂದಿ ಗಯೊ. 8ದರ‍್ಯಾವ್‍ನಿ ಕನಾರಿ ದೂರ್ ಶಾತ್ಬಿ ಕೋ ಥೂನಿ, ಖಲಿ ಖ್ಹೋ ಮೀಟರ್ ದೂರ್ ಥೂತೆ ಇನಖ್ಹಾಜೆ, ಬಿಜ಼ ಶಿಷ್ಯರ್‌ ಮಾಛ಼್‌ಲು ಭರೈರ‍್ಹುಥೂತೆ ಯೋ ಜಾ಼ಳಾನ ಖೇಚ಼್‌ತು ಹುಯಿನ್, ಡೋಣ್‌ಮಾಸ್‌ ಆಯು. 9ಇವ್ಣೆ ಡೋಣ್‌ಮಾಥು ಉತ್ರಿನ್, ಕನಾರೆ ಆವಾದಿನ್, ಕೋಲ್‌ಖ್ಹಾನಿ ಆಗ್ ಅಜು಼ ಇನಾಪರ್‌ ಮ್ಹೇಲಿರಾಖ್ಯುಥೂತೆ ಮಾಛ಼್‌ಲಾ ಅಜು಼ ಥೋಡು ರೋಟಾನಾಬಿ ದೇಖ್ಯು. 10ಯೇಸುನೆ ಇವ್ಣುನ, “ತುಮೆ ಹಮ್ಕೆ ಧರ‍್ಯಾತೆ ಮಾಛ್ಲಾ಼ವ್‍ಮ ಥೋಡು ಲ್ಯಾವೊ” ಕರಿ ಬೋಲ್ಯು.
11ಸೀಮೋನ್ ಪೇತ್ರನೆ ಡೋಣ್ಣಾ ಮಹಿ ಜೈ಼ನ್‌, ಜಾ಼ಳಾನ ಕನಾರಿಕನ ಖೇಚಿ ಲಾಯೊ. ಯೋ ಏಕ್‌ಖ್ಹೊ ತೀನ್‌ಉಪ್ಪರ್‌ ಅಡೈವಿಖ್ಹ್‌ ಮೋಟಾ ಮಾಛ್ಲಾ಼ಥಿ ಭರೈರ‍್ಹೂಥು, ಎತ್ರುಬಲ್ಲ ಮಾಛ಼್‌ಲು ರ‍್ಹಯುತೋಬಿ ಜಾ಼ಳು ಫಾಟ್ಯುಕೊಯ್ನಿ. 12ಯೇಸುನೆ ಇವ್ಣುನ “ಐನ್, ಖಾಣು ಖಾವೊ” ಕರಿ ಬೋಲ್ಯೊ. ಯೋ ಪ್ರಭುಸ್ ಶಿಷ್ಯರ್‌ನ ಮಾಲುಮ್‌ ಥೂತೆ ಇನಖ್ಹಾಜೆ, “ತೂ ಕೋಣ್?” ಕರಿ ಇವ್ಣಾಮ ಕಿನೇಬಿ ಪುಛಾ಼ವಾನಿ ಭಾಲ್ ಕೋ ಕರ‍್ಯುನಿ. 13ಯೇಸುನೆ ಐನ್, ರೋಟಾನ ಪಾಡೀನ್, ಇವ್ಣುನ ದಿದೊ; ಇಮ್ಮಸ್ ಮಾಛ್ಲಾ಼ನಾಬಿ ಪಾಡಿನ್ ದಿದೊ.
14ಯೇಸು ಮರಿನ್‌, ಜಿವ್ತೊಹುಯಿನ್ ಉಠಾನ ಬಾದ್‌ಮ ಇನ ಶಿಷ್ಯರ್‌ ದೆಖಾಯೊತೆ ಆ ತೀನ್ನೆ ಹಲ್ಲ.
ಯೇಸು ಅಜು಼ ಪೇತ್ರ
15ಇವ್ಣೆ ಖಾಣು ಖಾವಾನ ಬಾದ್‌ಮ, ಯೇಸು ಸೀಮೋನ್ ಪೇತ್ರನ, “ಯೋಹಾನ್ನ ಛಿಯ್ಯೊ ಸಿಮೋನ್, ತೂ ಅವ್ಣೆಥೀಬಿ ಜಾ಼ಖ್ಹತ್ ಮನ ಪ್ಯಾರ್ ಕರಾಸ್ಕಿಶು?” ಕರಿ ಪುಛಾ಼ಯೊ.
ಪೇತ್ರನೆ, “ಓಹೋಲಾ, ಪ್ರಭು, ಮೇ ತುನ ಪ್ಯಾರ್ ಕರುಸ್” ಕರಿ ಬೋಲ್ಯೊ.
ತದೆ ಯೇಸುನೆ ಇನ, “ಮಾರು ಮೇಂಢಾನು ಚೆಲ್ಕಾವ್ನ ಚ಼ರಾವ್‌” ಕರಿ ಬೋಲ್ಯೊ. 16ಬೇನೆ ಹಲ್ಲ ಯೇಸುನೆ ಪೇತ್ರನ, “ಯೋಹಾನ್ನ ಛಿಯ್ಯಾ ಸೀಮೋನ್, ತೂ ಮನ ಪ್ಯಾರ್ ಕರಾಸ್ಕಿಶು?” ಕರಿ ಬೋಲ್ಯೊ.
ತದೆ ಇನೆ, “ಓಹೋಲಾ, ಪ್ರಭು ಮೇ ತುನ ಪ್ಯಾರ್ ಕರೂಸ್‌ಕರಿ ತುನಾಸ್ ಮಾಲುಮ್‌” ಕರಿ ಬೋಲ್ಯೊ.
ಯೇಸುನೆ ಇನ, “ಮಾರ ಮೇಂಢವ್‌ನಿ ಖ್ಹದರ್ ಕರ್‌” ಕರಿ ಬೋಲ್ಯೊ. 17ತೀನ್ನೆಹಲ್ಲ ಯೇಸುನೆ, “ಯೋಹಾನ್ನ ಛಿಯ್ಯಾ ಸೀಮೋನ್, ತೂ ಮನ ಪ್ಯಾರ್ ಕರಾಸ್ಕಿ ಶು?” ಕರಿ ಪುಛಾ಼ಯೊ.
ಯೇಸುನೆ ತೀನ್ನೆಹಲ್ಲ ಇನ, “ತೂ ಮನ ಪ್ಯಾರ್ ಕರಾಸ್ಕಿಶು?” ಕರಿ ಪುಛಾ಼ವ್‌ತಾನ, ಪೇತ್ರನ ದುಖ್‍ಹುಯು. ತದೆ ಇನೆ, “ಪ್ರಭು, ತುನ ಖ್ಹಾರುಸ್‌ ಮಾಲುಮ್‌; ಮೇ ತುನ ಪ್ಯಾರ್ ಕರುಸ್ ಕರೀಬಿ ತುನ ಮಾಲುಮ್‌!” ಕರಿ ಬೋಲ್ಯೊ.
ಯೇಸುನೆ ಇನ, “ಮಾರ ಮೇಂಢವ್‌ನಿ ಖ್ಹದರ್‌ಕರ್‌” ಕರಿ ಬೋಲ್ಯೊ. 18ಮೇ ತುನ ಖ್ಹಾಚ ಬೋಲುಕರುಸ್, ತೂ ಜಾ಼ನ್ಜ಼ಮಾನ್ ಥೋತೆ ತದೆ, ತಾರಿ ಕಂಬರ್‌ನ ಭಾಂದಿಲೀನ್, ತುನ ಕಿಜ್ಗಾ಼ ಅಛ್ಛು಼ ಲಾಗಸ್ಕಿ ಹಿಜ್ಜಾ಼ ಜಾ಼ತೋಥೊ; ಕತೋಬಿ ತೂ ಬುಢೋ ಹುಯಿಜೈ಼ಶ್ತೆ ತದೆ ತಾರ ಹಾತ್ನ ಪಖ್ಹಾರೀಶ್‌, ಅಜು಼ ಬಿಜ್ಜೇಕ್‌ ಜ಼ಣೊ ತಾರಿ ಕಂಬರ್‌ನ ಭಾಂದೀನ್‌, ತುನ ಅಛ್ಛು಼ ಲಾಗಕೊಂತೆ ಹೀಕಡ್‌ ತುನ ಲೀಜಾ಼ಶೆ” ಕರಿ ಬೋಲ್ಯೊ. 19ದೇವ್ನ ಮಹಿಮೆ ಕರಾನಖ್ಹಾಜೆ ಪೇತ್ರ ಕಿಮ್ನು ಮೋತ್ ಮರ್‌ಶೆ ಕರಿ ಆ ವಾತೇಥಿ ಯೇಸುನೆ ಬೋಲ್ಯೊ. ಅಮ್ ಬೋಲಾನ ಬಾದ್‌ಮ, ಯೇಸುನೆ ಇನ, “ಮಾರ ಪೀಠೆ ಆವ್!” ಕರಿ ಬೋಲ್ಯೊ.
ಯೇಸು ಅಜು಼ ಬಿಜೇಕ್ ಶಿಷ್ಯ
20ಪೇತ್ರ ಪೀಠೆ ಫರಿ ದೇಖಿನ್‌, ಯೇಸುನೊ ಪ್ಯಾರ್‌ನೊ ಶಿಷ್ಯ ಇವ್ಣ ಪೀಠೆ ವಳ್ಯಾವಾತೆ ದೇಖ್ಯೊ.ರಾತ್ಮ ಖಾಣು ಖಾವಾನಿ ವಖ್ಹತ್‌ಮ ಯೇಸುನಿ ಛಾ಼ತಿಕನ ಝು಼ಕಿನ್‌, “ಪ್ರಭು, ತುನ ಧೋಕೇಥಿ ಧರಿದಿಶ್ಶೆತೆ ಕೋಣ್?” ಕರಿ ಪುಛಾ಼ಯೋತೆ ಯೋಸ್‌ ಶಿಷ್ಯ. 21ಯೋ ಶಿಷ್ಯನ ದೇಖಿನ್‌, ಪೇತ್ರನೆ ಯೇಸುನ, “ಪ್ರಭು ಅನಿ ಬಾರೇಮ ಶಾತ್‌?” ಕರಿ ಪುಛಾ಼ಯೊ.
22ಯೇಸುನೆ ಇನ, “ಮೇ ಆವಾತೋಡಿ, ಆ ಜಿವ್ತೊ ರ‍್ಹೇವ್ಣುಕರಿ ಮನ ಮನ್ ರ‍್ಹಯೂತೊ, ಇನೇಥಿ ತುನ ಶಾತ್‌? ತೂ ಮಾರ ಪೀಠೆ ಆವ್” ಕರಿ ಜವಾಬ್‌ ದಿದೊ.
23ಅನೇಥಿ ಯೋ ಶಿಷ್ಯ ಮರ್‌ಶೆಕೊಯ್ನಿ ಕರಿ ಬೋಲಾನಿ ವಾತೆ ಯೇಸುನ ಭೈಯೇವ್‌ಮ ಫೈಲಿಗಯು. ಯೋ ಮರ್‌ಶೆಕೊಯ್ನಿ. ಕತೋಬಿ ಯೇಸುನೆ ಇನ ಬೋಲ್ಯೊಕೊಯ್ನಿ, “ಮೇ ಆವಾತೋಡಿ, ಯೋ ಜಿವ್ತೊ ರ‍್ಹೇವ್ಣುಕರಿ ಮನ ಮನ್ ರ‍್ಹಯೂತೊ, ಇನೇಥಿ ತುನ ಶಾತ್‌?” ಕರೀಶ್ ಯೇಸುನೆ ಬೋಲ್ಯೊತೆ.
24ಆ ಖ್ಹಾರಿ ಬಾರೇಮ ಲೀಖಿನ್, ಅನಿ ಬಾರೇಮ ಸಾಕ್ಷಿ ಬೋಲವಾಳೊ ಶಿಷ್ಯ ಆಸ್. ಯೋ ಬೋಲ್ಯೋತೆ ಖ್ಹಾಚ಼ಸ್ ಕರಿ ಹಮೂನ ಮಾಲುಮ್‌.
ಖ್ಹತಮ್
25ಅತ್ರೇಸ್ ಕಾಹೆತೆ, ಯೇಸುನೆ ಕರ‍್ಯುತೆ ಬಿಜೂ಼ಬಿ ಕೈಯೆಕ್ಕಿ ಛಾ಼. ಯೋ ಖ್ಹಾರಾನ ಏಕೇಕ್‌ ಕರಿ ಲೀಖ್ಯೂತೋ, ಲೀಖಾವ್ಣುತೆ ಪುಸ್ತಕ ಖ್ಹಾರು ಹಿಡಿ ಜಗತ್ತಸ್ ಬಶ್‌ ಕೋ ಉಶೇನಿ ಕರಿ ಮೇ ಸೋಚುಸ್.
Currently Selected:
ಯೋಹಾನ 21: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
