MARKUS 15

Yeso a wii Bilatus wa

1Pa a ɗenda naakǝn, kuɓsa nek mbusa sa ma wiina, ma malǝmma fǝɗkǝta Musa sa, ma ɓeta nsaad pepere ɓan kan mara Yahudawa ɓa, ɓǝn kan a ɗaaso ɓoso, mbu kǝɓǝsa tomwa. Pa ɓaa kaa, ɓaa saa ko a Ngomna Bilatus ni.

2Bilatus pa yaa taa me, “Ən ngase kuɓ ɓaa Yahudawa ɓau?”

Yeso yaa kak me, “Ngǝ nkeen maaso.” 3Pa kuɓsa nek mbusa sa ɓaa ntii papara wa a mbusa ɓolɓol. 4Pa Bilatus yǝ ɓaarǝ ya taa, ya nkee me, “A wǝrǝ ɓan nkee ngǝ mbusa ɓolɓol, ngǝ kak mbuka rau?”

5Pa ɗing siso, Yeso yǝ ɓaarǝ yǝ kan mbuka ra, Bilatus aa tom nhiinyanhiinya.

6Nwa ǝn mbun tomsǝ ɓa, a fer Mbukamsa wa, yǝn hik pursuna fin u ɓeta taa sǝ wa. 7Wa yake kǝn ǝn yarsǝ me Barabbas u ɓaa neu ɓǝsǝ ke ma ɓa ɓǝ niksǝ kito ma ngwamnati a ur siso a tod ɓeta fer kito siso. 8Pa ɓeta dem ɓǝ ntii kwauwo ɓǝn kǝna Bilatus me yǝɓǝ tom mbu yǝn tomsǝ nfee ɓa.

9Pa Bilatus yǝɓǝ taa me, “Sǝn taa me nǝsǝ lee kuɓ ɓaa Yahudawa ɓa wau?” 10Mbu kwaasǝ ɓa yǝ maan me ndǝ rǝmara kuɓsa nek mbusa sa ɓǝ nasǝ Yeso wa. 11Pa kuɓsa nek mbusa sa ɓǝ suɗ ɓeta ɓǝ nkee me ɓǝ lee Barabbas a ma Yeso.

12Pa Bilatus yǝɓǝ taa, ya nkee me, “Yaa kǝnǝ tomtomni ma yaa sǝn yarsǝsǝ me kuɓ ɓaa Yahudawa ɓa yau?”

13Ɓǝ nik kwaro, ɓǝ nkee me, “Aa kwaakǝ!”

14Bilatus yǝ taa ɗǝm, “Meen mbiu? Yǝ tom mbi kwalakwalau?”

Pa ɓǝ yauli ma kwaro kokro, ɓǝn nkee me, “Aa kwaakǝ!”

15Mee yǝn taa me yǝ hur kuɗa ɓeta, Bilatus yǝɓǝ hik Barabbas. Pa yǝ ti ɓaa hob Yeso ɗǝm yǝɓǝ na me ɓaa kwaakǝ.

Soosamse ɓǝ nhuu Yeso

16Pa soosamse ɓa ko ma Yeso a taanda ngomna ni, u ɓan yarsǝ me “Firetoriyum.” wa, Ɓǝ kwau nsaad pepera nsosamse ta. 17Ɓaa tung luktu ko welwel u kuɓsa ɓǝn tungsǝ wa, ɓǝ werkǝ kukǝra kǝra u kuɓsutu wa ma tǝute, ɓaa tung a ɗuura. 18Pa ɓaa ntii tooma u para ma, ɓǝn nkeesǝ me, “Hurtu nwaango a tom palang, Kuɓ ɓaa Yahudawa ɓa wa!” 19Ɓǝ hoɓsǝ a ɗuura ma kumtul, ɓǝn nemsǝ mesa. Pa ɓǝn koɓɓaa wiiyo a sani ɓǝn nkee me ɓǝn nasǝ mbarta. 20Pa ɓǝ feɗsǝsǝ na mbarta para wa, pa ɓaa hik laulawara welwel ɓǝ tungsǝsǝ wa, ɓaa kang luktu usu ɓaasa ko me ko ɓaa kwaakǝ.

Ɓaa kwakǝ Yeso

21Ɓaa siko, pa ɓǝ wǝr yaake yǝn talǝn talǝ, ǝn yarsǝ me Siman, eɗ Sayirin ya, pap Iskandari ya ma Rufus ya, yǝn kankan a uru, pa soosamse ɓaa tii ma kwakwato me yǝ too kwaakǝra Yeso ra. 22Ɓǝ wosǝ ma Yeso a hamka ǝn yar me, Golgota (ǝn sen me nkoo ɗuura wa). 23Pa ɓaa na mbraa emngwate inabi ma, sautǝse ma matǝma ǝn yar me mur, yǝ yau yǝ wee ra. 24Pa ɓaa kwaakǝ. Ɓǝ ɓaa laulaura ira ɓǝn tomsǝ pala.

25Ɓa kwakǝsǝ ma pale kaure. 26Ɓǝ nyor nyorma ɓǝn nkee me, U NWA ƏN YESO, KUƁ ƁAA YAHUDAWA ƁA WA. 27-28Ɓaa kwaakǝ Nkwiinya raɓ ke ma sase, fin nem seya ya, yaa fin nya a nem kwasa ya.#15:27-28 Ɓaata ɓan nyora a ntiiri ɓa ɓǝ nyor ɓǝ sokǝ me mara Kaa ra tomon ɓong u nkeesǝ me, “Ɓaa kausǝ a ɗaaso ɓan tenatena ɓa.” 29Ɓaa ɓǝn talǝsǝntalǝ ɓa ɓǝn nkeesǝ mbusa kwalakwala, ɓǝn nyaasǝ ɗuura ɓora, ɓǝn nkee me, “Ngase kǝngaa okǝ hit Kaa Urshalima wa, ɗǝm ngǝ mar a tǝro taatǝn, a kon nkweerange! A ham a kwaakǝra sǝra, me ngǝn Au Kaa ya.” 30yaa a kon nkwerange ngǝ ham rau!”

31Ɗǝm maaso, kuɓsa nek mbusa sa ma malǝmaa fǝɗkǝta Musa sa, ɓaa sa nhuu a ɗaaso ɓoso, ɓǝn nkee me, “Yǝn nkaa yǝ kon nkweera ɓaata, pa yǝ nkaa yǝ kon nkweera ee usu ra! 32A lee Almaseho sisi, ngase kuɓ Isra'ila wa, a ham a kwaakǝra sǝra, me tǝ wǝrǝ, tǝna ɓongtǝra!” Kwiinya ɓaa kwaakǝ ɓǝsǝ ke ma sase sǝɓǝ ɓa, ɓosa kǝn, ɓaa sǝrǝ.

Wodɗo Yeso wa

33Si kaa ɗa, pa handa a tom tebteb put siso nsaad. A ko a fer ɗikira wa.

34Ma ɗikra kara, pa Yeso yǝ nik kwaro dem yǝ nkee me, “Eloi, Eloi lama sabatani?” ɗaanto usu me, “Kaa ɓǝna Kaa ɓǝna tomtomni ngǝ lee nǝsǝu?”

35Pa ɓaa ɓǝ nǝɗsǝ ngwang ɓa, ɓǝ kurasǝ wa, ɓǝ nkee me, sǝ kura, “Yǝn yar Iliya.”

36Pa ete fin ya mon, yǝ nrii mbu soso ɓa ma mbraa sǝusǝu u emngwate inabi ma wa, pa yǝ pak a kwalango yǝ na Yeso me yǝ wee. Pa yaa nkee me, “Saa lee, a lee ndǝ wǝr ko Iliya kiya wo, yaasa hammau.”

37Pa Yeso yǝ nik kwaro ma kwakwato, pa yǝ woɗɗo.

38Pa luktu a hit Kaa Urshalima wa, yǝ saatǝ handa raɓ, ntii ɓoti a ham a kunda. 39A fer kuɓ kwang nsoosa yǝsǝ kǝɗ a wii Yeso wa yǝ wǝrsǝ ɗǝɗa yǝ tomsǝ yǝ wodɗa wa, payǝ nkee me, “Ɓongtǝra, Eɗ ɗa, ǝn Au Kaa ya!”

40Ɓaata toonaka ɗǝm ɓǝ nǝɗ mǝbmǝb kǝnar ɓa sengoo. A ɗaaso ɓoso ndǝ Maryamu Magadaliya, ma Maryamu ma Yakubu koɓ Yusufu ya, ma ɗǝm Salomi. 41Toona sǝsa ɓǝ ntiisǝ ɓǝɗɗo Galili ɓǝn kwasisǝ tinima. Ɓaata toona pera ɓa ɓǝ dem ɓǝ wo ke ɓǝ piɗsǝ Urshalima wa, ɓǝ kǝnso kǝn.

Hok Yeso wa

42Pa ɗikira tomsǝ wa, ɓan warkǝ me ɗen ǝn kaa nwiiya Yahudawa ɓa. 43Pa ate ke ǝn yarsǝ me Yusufu yǝ piɗ Arimatiya. Yǝ fin a ɗaaso ɓan kan mara Yahudawa ɓa, yǝ ma kwangto dem, ya yǝn warsǝ kuɓsutu Kaa wa ya. Yǝ nii yǝ ko a Bilatus ni kokto semra, yǝ kǝna me aa naa maabiri Yeso ya koya hokko. 44Bilatus yǝ kura nhiinyanhiinya to me yǝ kura me Yeso yǝ wee wodɗon. Pa yǝ yar kuɓ kwang soosa kawa ya taa, mee ǝndǝ ɓong ngǝu me Yeso yǝ wee wodɗon nǝu. 45Yǝ kurasǝ ɓongtǝra a kuɓ kwang soosani wa pa yǝ naa Yusufu maabiri Yeso ya. 46Yusufu yǝ tǝri luktu hok woɗɗa wa, ya ham ma maabiri Yeso ya, yaa mbǝrkǝ ma luktu hok woɗɗa wa, yaa tii a tiina ɓaa wǝrkǝsǝ ɗaan a kundara wa. Pa yǝ kǝndǝ ate pera ɗungara ya, yaa liki ee tiina ya. 47Maryamu Magadaliya ma Maryamu maa Yusufu ya ɓaa wǝro, ɓǝ wǝr ham ɓa tiisǝ maabiri Yeso ya ɓan.

Currently Selected:

MARKUS 15: LLA

Highlight

Copy