MARKUS 11

Yeso yǝ kan Urshalima

1Pa ɓǝ tomsǝ ngwang ma Urshalima wa, ɓǝ wo Betafaji ma Betanya a kola Zaitun ra. Yeso yǝ timi emfǝɗkaa ɓisa raɓ, 2Yǝɓǝ nkee me, “Soo a ur ngeek a wiiyo a sani wa, me sǝn kan kana, kǝsǝ wǝr au kwarǝra kaasǝ kǝnso, u yaake pǝta laɓɓo ra wa. Sǝ kee, saa wo han ɓa. 3Me yaake taasǝ, ‘Sǝn tom mbi maasou?’ Saa nkee me, ‘Ankundi yǝn taataa, kiyaa kang me tomon.’ ”

4Pa ɓǝ faɗa, ɓǝ wǝr au kwarǝra ya kaasǝ a kal ɗǝɗa wa. Ɓǝn nkee sǝn kee wa, 5pa ɓaa ɓǝsǝ kǝnso ɓa, ɓǝ nkee me, “Tomtom niu? Sǝn keesǝ au kwarara sǝra, meen mbiu?” 6Pa ɓǝ kak keke nga Yeso yǝ nkee ɓǝsǝ wa, pa ɓet kaɓa, ɓǝ ɓǝ lee ɓaa faɗa. 7Ɓǝ wosǝ Yeso ma au kwarǝra ya wa, ɓǝ mal laulawata ɓosa a mbar au kwarǝra kaya, pa Yeso yǝ taa yǝ kaɗ ɓoti. 8Ɓeta dem ɓǝ mal lukta ɓosa a ɗǝɗa, ɓaata ɗǝm ɓǝ kau nwaamǝta ɓǝ mal a ɗǝɗa. 9Ɓaa ɓǝ kosǝ a wii usu ɓa, ɗǝm ma ɓaa ɓǝn ɓǝɗsǝsǝ ndiira ɓa, ɓǝn nik kwaro ɓǝn nkee me,

“Nyoota a Kaa ni!”

‘Saltǝra kaɗan a sanii, yaa yǝ wosǝ a ɗǝnda Ankundi ya ra.’ ”

10“Saltǝra kaɗan a kuɓustu ǝn wosǝn wo u paande Dauda wa!”

“Nyoota kaɗan a Kaa ni!”

11Yeso yǝ kansǝ Urshalima wa, yǝ ko tanda hit kǝna Kaa Urshalima wa. Yǝ sengge mbusa nsaad, pa me ɗikira tommon yǝ fiɗi yǝ kang Betanya ke ma emfǝɗkaa ɓǝsa pu nhaa raɓ sǝɓa.

Meɗ Yeso wa ma sata

12Handa weesǝ ɓǝ nisǝ Betanya wa, pa Yeso ɗoora asi. 13Yǝ wǝrsǝ ɓot sata ɓa mǝbmǝb ma waama kwalsǝ dem wa, pa yǝ ko me ko yǝkǝ taa em ɓisa. Yǝ kosǝ kǝnso wa, yǝ wǝr mbuka ra, ǝn waama seɗe, me ǝn fer sata yǝn nsee sǝ wara. 14Pa yǝ nkee ɓot sǝɓa me, “Yaake yǝ ɓaarǝ yǝ kǝu em ɓǝnga ɗǝm ra.” Pa emfǝɗkaa ɓǝsa ɓǝ kura mbu yǝ nkeesǝ ɓan.

15Ɓǝ kansǝ Urshalima wa, Yeso yǝ kan a taanda Hit ɓǝɗ Kaa Urshalima wa, yǝ ntii pǝǝ ɓaa ɓǝn fangsǝ mbusa ɓa ma ɓaa ɓǝn tirisǝ mbusa kǝnso ɓa. Yǝ tǝng teburaa ɓan paaki koɓaa sa ɓa ma mbu kaɗaa ɓan fang muktaa ɓa. 16Yǝ saa hana yamni yaa yǝn taasǝ me kiya too mbuka yaa talǝ ma kal hit kaa Urshalima wa. 17Pa yǝ fǝɗkǝ ɓeta, yǝɓǝ nkee me, “Yaa ka sem nyorsǝ rau? Ɓaa nkee me, ‘Ɗuur waano kǝ yar me ndǝ ɗuur kǝnara putsa nsaad wa,’ pa sǝ kang a tom ‘fer nkwiiya wa.’ ”

18Fer kuɓsa nek mbusa sa ɓa ma malǝmma fǝɗkǝra Musa sa ɓǝ kura mara sǝra wa, ɓǝ ntii kǝr ɗǝɗa ɓǝka tom me ɓaa todɗa, me ɓǝn kura kokto usu me ɓeta nsaad ɓǝn kura nhiinyanhiinya to fǝɗkǝra ira wa.

19Fer ɗikira kansǝ wa, Yeso ma em fǝɗkaa ɓǝsa ɓǝ piɗ ɓǝ lee ur siso.

Meɗ Yeso wa ma ɓot Sata ɓa

20Ma ɗeɗa ɓǝn talǝsǝn talǝwa ɓǝ wǝr ɓot sata sǝɓa een ntii ɓoti a hamma a kunda. 21Bitrus pa yǝ ɗimmi ya nkee Yeso, “Malǝm, a sengge meɗto nwaango ee ɓot sata ɓan!”

22Yeso yǝ kak me, “Sǝ na ɓongtǝra ma Kaa.” 23“Ɓongtǝra nǝn nkeesǝ me, hana yamni me yǝ nkee yol wa me, a ‘nii, ngǝ tulǝ a aulaara ra,’ ɗǝm yǝ tom pǝǝno a kuɗa ira a mbu yǝ nkeesǝ ɓa ra, ɓaa ka tom maaso. 24Me maaso nǝn nkeesǝ, nsaad kǝnara sǝ tomsǝ ma kuɗa fin da kǝsǝ taa. 25-26Ɗǝm hana fer nawa sǝn nǝɗsǝ me sǝ tom kǝnara wa, me yaake kǝn sǝn kurasǝ ɗaama ma sasewa, sa lee a senda, me Paase a liura ya sase kǝn yǝsǝ lee tentenato waaso.” #11:25-26 Ɓaata ɓan nyora a ntiiri ɓa ɓǝ nyor me Mee ngǝ lee a senda ra, Pange ɓoti ya kǝn yǝgǝ lee a tenatenato nwaango ra.

Ɓaa pǝn kwangto Yeso wa

27Ɗǝm ɓǝ ɓaarǝ ɓǝ kan Urshalima. Pa Yeso yǝn leurǝsǝ taanda hit ɓǝɗ Kaa Urshalima wa, kuɓsa nek mbusa sa ma wiina ɓeta a ɗaaso uru wa ɓa, ɓǝ wo a sanii. 28Ɓaa taa me, “Ma kwangto yamni wa ngǝn tomsǝ mbu ɓau? Ɗǝm yaa na ngǝ kwangto siso niu?”

29Pa Yeso yǝɓǝ kak me, “Niina kǝn kǝnǝsǝ taa mbuka fin. Sǝnǝ kakka, niina kǝn, kǝnǝsǝ nkee ma kwangto yamni wa, nǝn tomsǝ mbu ɓa wa. 30Baptisma Yohanna ya, yǝ fiɗaa liurau ko a ɓeta niu? Sǝnǝ nkee!”

31Pa ɓǝ ntii kanmǝra a ɗaaso ɓoso, ɓǝn nkee me, “Me ndǝ nkee me, ‘Fiɗaa a liura,’ kiyǝn ndǝ taa me, ‘Yaa tomtomni ndǝ na ɓongtǝra ma siso rau?’ 32Pa kǝ ndǝ nkaa ndǝ nkee me, ‘Fiɗaa ɓeta ni kǝmǝu?’ ” Ɓǝn kura kokto ɓeta wa, me ɓeta nsaad ɓǝ yauwan tumoo me Yohanna ndǝ an nawanto ya.

33Pa ɓǝ kak Yeso me, “Tǝ maa ra.” Yeso yǝɓǝ nkee me,

“Niina kǝn nǝsǝ nkee ma kwangto yamni wa nǝn tomsǝ mbusǝsa wa ra.”

Currently Selected:

MARKUS 11: LLA

Highlight

Copy