Matta 6
6
Fǝɗkǝra a ɗuura na saltǝra ra
1“Sǝ tom nlaa ‘tom tinimsa sa mbu yǝsǝ yaɓ a wiiyo a Kaa ni ɓa’ a tom u ɓeta kaa wǝr wa ra. Me sǝ tom maso, sǝ taa nsaa a Paase ni a liura ra.
2“Pa me ngǝ na yaa yǝ semsǝra ya, ngǝ yauli me ɓeta ɓǝ kura ra, nga ɓaa ma ɗǝlmara raɓ ɓa ɓǝn tomsǝ a hitsa kwau Yahudawa sa ɓa, ɗǝm a ɗǝta me ɓeta ɓǝ wǝr me ǝɓǝ nyoo. Nǝn nkeesǝ ɓongtǝra, ɓǝ wee kon nsaa ɓoson. 3Pa me ngǝ na yaa yǝ semsǝra ya, ngǝ yau me ɓaata kalta ɓa ɓǝ maa mbu ngǝn tomsǝ ɓa ra, 4me na nwaago a tom a nhuukǝra. Me Paange yǝn wǝrsǝ mbu ǝn tomsǝ a nhuukǝra ɓa ya, kiyǝ ngǝ na nsaa nwaago.
Kǝnara
5“Ɗǝm me sa kǝnara, sǝ tom nga ɓaa ma ɗǝlmara raɓ ɓa ra, me ɓǝn tom kǝnara ma too ɗuura wa a hitsa kwau Yahudawa sa ɓa, ɗǝm a ɗǝta me ɓeta ɓǝ wǝrǝ. Nǝn nkeesǝ ɓongtǝra, ɓǝ wee kon nsaa ɓoson nsaad. 6Pa me sǝ kǝ tom kǝnara, sǝ kan ɗaan a hito, sǝ liki inntii, sǝ kǝna Paase u ɓaa wǝrsaa ra ya. Pa Paase yaa yǝn wǝrsǝ mbu ǝn tomsǝ a nhuukǝra ɓa ya, kiyǝ sǝ na nsaa. 7Ɗǝm me sǝn tom kǝnara, sǝ toma ɓaarǝta nga ɓaa ɓǝ maa Kaa ra ɓa ra, me ɓǝn sen me minda ɓaa kǝ ɓǝ kura me pelerto mara ɓora wa. 8Pa me maaso, sǝ tom nga ɓosa ra, me Paase yǝ maa mbu sǝn taasǝ ɓan, si me sǝn nkee me saa kǝna.
9“Pa me maaso, sǝ tom kǝnara nga u nwa,
“ ‘Paate a liura ya,
a too ɗǝnda nga,
10kuɓsutu nwaago yǝ wo,
mbu ngǝn yausǝ ɓa a tomo,
a kaɗo put ntaandi wa nga ǝn tomsǝ a liura wa.
11Ətǝ na waso mbuseya tuka ɓa.
12Ɗǝm ngǝ tǝ lee tǝblǝra mara ta,
nga tǝn leesǝ ɓaa ɓǝn tǝblǝ tǝsǝ ma ra ɓa.
13Ɗǝm ngǝ tǝn ko a han pǝtara ɓa ra,
pa ngǝ tǝ nkweetǝ a yaa kwalakwala ya.’
14Pa me sǝ lee tentenato ɓeta tomsǝsǝ wan, Paase a liura ya kiyǝ sǝ lee tentenato waaso kǝn. 15Pa me sǝ lee tentenato ɓaata wa ra, Paase yǝ sǝ lee tentenato waaso ra.
Kwal mbraa wa
16“Me saa kwal mbraa wa sǝ tuk oota nga ɓaa ma ɗǝlmara raɓ ɓa ɓǝn tomsǝ wa ra, me ɓǝn tuk oota ɓǝ weɗa ɓeta me ɓǝn kwal mbraa. Nǝn nkeesǝ ɓongtǝra, ɓǝ wee kon nsaa ɓoson nsaad. 17Pa me nga kwal mbraa wa, ngǝ puk yaro a ɗuura nga ɗǝm ngǝ sob oota, 18me ɓeta ɓǝ maa me ngaa kwal mbraa wa ra, pa Paage seɗɗe yaa ɓa wǝrsa ra ya, ɗǝm Paase, yaa yǝn wǝrsǝ mbu ǝn tomsǝ a nhuukǝra ya, kiyǝ ngǝ na nsaa.
Kwau kǝnaa a liura wa
19“Sǝ kwau eewaaso kǝnaa a put ntaandi wa ra, a ham lǝkǝmta ma mǝnko ka tǝblǝ ɓa, ɗǝm a ham nkwiinya ɓǝ ka ookǝ ɓǝ tang ɓa. 20Pa sǝ kwau nkweerase kǝnaa a liura, ham lǝkǝmta ma mǝnkǝra ɓaa tǝblǝ ra ɓa, ɗǝm a ham nkwiinya ɓǝ nkaa ɓǝ ookǝ ɓǝ kan ɓǝ tang ɓa ra. 21Me ham kǝnaa nwaago yǝ sǝ ɓa, kǝnso ɗǝm kuɗa nga yǝ sǝ wa.
22“Nuu ndǝ sase arkumta maabiri ya. Me nuunwa sǝ nga kwakwa, maabiri nyaange nsaad kǝ tom ɗekɗek. 23Pa me nuunwa sǝ nga tǝblǝn, maabiri nyaange kǝ yǝ kung ma tikra nsaad. Pa me ɗekɗek to maabiri nyaange ya ndǝ tikra, maabiri nyaange kǝ tom a tikra tikit.
24“Yaake sem kǝn kiyaa nkaa yǝ tom tinima hooto ɓantaanda ɓa raɓ ra, hana yǝ ɓisi yaa fin nya, yǝ yau yaa fin nya, hana yǝ na mbarta yaa fin nya, yǝ nrenǝ yaa fin nya. Ngǝ nkaa ngǝ tom hooto Kaa ma koɓaa kou ra.
Sǝ ntaayǝ ee waaso ra
25“Me maaso nǝn nkeesǝ, sǝ ntaayǝ ma nɗanyo waaso ra, a mbu kǝsaa se ɓa ra, hana mbu sǝ kaa wee ɓa ra, hana a maabiri yaase mbu kǝsaa tung ɓa ra. Waso, huurtu yǝ faɗ mbuseya rau, ɗǝm maabiri yǝ faɗ luktaa rau? 26Sǝ sengge rǝmɓa a liura sa, ɓǝ rǝkaa ra, ɓǝ ɗaɗɗa ra, hana ɓǝ kwau a pindo ra, pa Paase a liura ya yǝn na ɓǝ mbuseya. Saase sǝ faɗ ɓǝn, sem maaso rau? 27Ən yamni a ɗaaso waaso me ntaayo usu kiyǝ nkaa yǝ sokǝ hana tǝro fin a palangto nɗanyo usuwau?
28“Ɗǝm pa sǝn ntaayǝ ee waaso mbi ma luktau? Sǝ sengge hurta a sanglo sa ɓǝn mbarsǝ wa, ɗǝm ɓǝ tomaa tinima hana ntaawo ra. 29Pa nǝn nkee sǝ, hanan Kuɓu Sulemanu ma too usu nsaad, yǝ pǝta tom tung mbusa u faɗsǝ fin a ɗaaso ɓoso ra. 30Me pa Kaa yǝn sengge kiiya a sanglo sa maaso, u yǝsaa sanglo naso nwa, ɗǝm ɗene a mudkǝ a ara wa, yǝ sǝ sengge a faɗ usu rau? Saase ɓet ma na ɓongto ngeek ɓa! 31Pa me maaso, saase sǝ ntaayǝ ra, sǝn nkee me, ‘Kǝ tǝ se mbiu?’ Hana ‘Kǝ tǝ wee mbiu?’ Hana ‘Kǝ tǝ tung mbiu?’ 32Hana ɓaa ɓǝ maa Kaa ra ɓa, ɓǝn kǝr mbusǝsa nsaad, ɗǝm Paase a liura ya, yǝ maan me sǝn taa ɓǝ. 33Pa ntiiri sǝ kǝr kuɓsutu usu ma mbu yǝsǝ yaɓ a wiiyo a Kaa ni ɓa, ɗǝm nsaad mbusǝsa ɓaa kǝ sǝ sokǝ ɗǝm. 34Pa me maaso sǝ ntaayǝ ra, me sǝ sen ɗenda, me ɗene ndǝ u Kaa wa. Hana kaa naɓa yǝ ma rǝkata kwera ira ya.
Currently Selected:
Matta 6: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
