Matta 22
22
Mǝɗkǝra ma mbukamsa kon toone wa
1Pa Yeso yǝ ɓaarǝ yǝɓǝ nkee mara ɗǝm ma mǝɗkǝta me, 2“Kuɓsutu a liura wa, yǝ nga kuɓ ko u yǝ werkǝsǝ mbukamsa kon toone au isi wa. 3Yǝ timi hoota ɓisa a ɓaa yǝ yar ɓǝsǝ a mbukamsa sǝɓa ya, me ɓǝ wo, pa ɓǝ yau ɓǝ wo ra.
4“Yǝ ɓaarǝ yǝ timi ɓaata hoota ɓa, yǝɓǝ nkee me, ‘Kosǝ nkee ɓaa nǝ kǝna ɓǝsǝ me ɓǝ wo a hiira ɓa, me nǝ wee werkǝ mbuseya wan ɓǝ wo nakǝn. Ɓaa nǝng naa kwang wan, mbusa nsaad werkǝn, sau a hiira maɗ.’
5“Pa mbusa rǝka ɓǝra, ɓǝ faɗ ɓoɓǝsa, yaa fin ya yǝ faɗ nyaa usu, yaa fin ya yǝ faɗ a lumu usu. 6Ɓaata ɓǝ ma hoota ita ɓǝɓǝ na kongsa ɗǝm ɓǝɓǝ toɗɗo. 7Pa kuɓ kawa yǝ nfii dem, yǝ timi nsosamse isi me ko ɓǝ toɗ ɓan toɗ ɓeta sǝɓa, ɗǝm ɓǝ kǝɗ ur ɓoso nsaad.
8“Pa yǝ nkee hoota ɓisa me, ‘Mbukamsa kon toone kawa, ɓaa wee werkon, pa ɓaa nǝ yar ɓǝsǝ me ɓǝ wo ɓa, ɓǝ pam me ɓǝ wo ra. 9Soo a ntoota kosǝ yar hana yamni yaasǝ taasǝ ya, yǝ wo a mbukamsa sǝsa.’ 10Pa hoota kata ɓǝ ko a ntoota, ɓǝ yar hana yamni ɓaa ɓǝ taasǝ ɓa nsaad, ɓet tena ɓa ma ɓaa kwalakwala ɓa, pa ham mbukamsa kon toone sǝsa a kung ma waa.
11“Pa kuɓu yǝ kansǝ me kiya sengge waa wa, pa yǝ wǝr atike kenso yǝ semma luktu u hiira wa ra. 12Pa yaa nkee me, ‘Sikane, tomtomni ngǝ wosǝ a ham ɓa ngǝ semma luktu hiira wa rau?’ Pa eɗ kaya yǝ roo nseu.
13“Pa kuɓu yǝ nkee hoota ita me, ‘Saa kaa neme ma nata, saa muɗkǝ ntaandi a han tebteb ɓa, kǝnso kiya tee ma kǝu ɗǝmta wa.’
14“Me ɓaa ɓaa yar ɓǝsǝ ɓa dem, pa ɓaa ɓaa tau ɓǝsǝ ɓa ngeek.”
Taa mbuka wa a ɗuura kwan samra wa
15Pa ɓaa Farisiyawa ɓa, ɓǝ ko me ɓǝ kan ɗǝɗa ɓǝkaa sa tǝraa a mara ira ɓa. 16Pa ɓǝ timi emfǝɗkaa ɓosa ke ma ɓaa Hirudus ɓa. Ɓǝ nkee me, “Malǝm, tǝ maan me ngǝ yaa ma ɓongtǝra ya, ɗǝm ngǝn fǝɗkǝ ɗǝɗa Kaa ra ma ɓongtǝra. Ngǝ sem ma yau ɗuura wa ra, me ngǝn too ɓeta nsaad keke. 17Ətǝ nkee senta nga waso, ngǝn wǝr nga pamman me tǝ kwan samra Kaisar rǝu, ko tǝ kwan dau?”
18Pa me Yeso wee maa senda kwalakwala ɓora wan, yǝɓǝ nkee me, “Saa ɓaa ma ɗǝlmara raɓ ɓa, mbu kwaa mbi sǝn taasǝ me sǝnǝ tǝrau? 19“Sǝnǝ weɗa koɓaa kwan samra sǝsa.” A nii ɓaa wo ma koɓaa kasa, 20pa yǝɓǝ taa me, “Ən sakankuura yauni ra ma ɗǝm ɗǝnda yauni ra a sǝu?”
21Ɓaa kak me, “Ən u Kaisar wa.” Pa yǝɓǝ nkee me, “Sǝ na Kaisar mbu Kaisar ɓa, ɗǝm sǝ na Kaa mbu kaɗsǝ me ǝn u Kaa ɓa wa.”
22Pa ɓǝ kurasǝ maaso wa, ɓǝ tom mbu weɗara ɓa, ɓaa lee ɓǝ faɗ ɓoɓɓǝsa.
Taa mbuka wa a ɗuura niinyo a tina wa
23A kaa ɓisa ɓaa Sadukiyawa ɓa, ɓaa ɓǝ nkeesǝ me niiyo a tina wa semra ɓa, ɓǝ wo a Yeso ni, ɓaa taa me, 24“Malǝm, Musa yǝ nkeetǝ me, me ete woɗ yǝ semma emɓa ra, koɓɓisi kiyǝ kon kiu kaya, me yǝ haa emba tii isi. 25Waso ɓaataka kǝn mbutu a ɗaaso waato, ɓǝn tiiyaa ma koɓɓa. Yaa ntiiri ya, yǝ kon toone yǝ woɗɗo, yǝ semma emɓa ra, yǝ lee toone isi koɓɓisi. 26Tom maaso ɗǝm ma kobɓisi raɓte ya ma u taatǝnte wa, a ham maaso a ko a ɗuura yaa mbututi ya. 27A feɗefeɗe nsaad, toone kaya yǝ woɗɗo. 28Ya waso a kaa niinyo put taandi wa ɓa, toone sisi kǝyǝ kaɗ toone yamni ya a ɗaaso ɓaa mbutu sǝɓau? Me nsaad ɓaa mbutu sǝɓa, ɓǝ konsǝn.”
29Yeso yǝɓǝ kak me, “Sǝ nfaan, me sǝ maa mbu ɓaa nyorsǝ a likarkar Kaa wa ra, ɗǝm sǝ maa kwangto Kaa wa ra. 30A fer niinyo a tina wa, parata ɓǝ kon toona ra, toona ɗǝm ɓaa ɓǝ tung a kera ra, pa ɓǝkǝ kang nga ɓantimira Kaa a liura ɓa. 31Pa mara niinyo a tina wa ra, hankǝra sǝ pǝta kauwo mbu Kaa nkeesǝsǝ ɓa rau? U nyorsǝ me, 32‘Nǝn Kaa Ibrahim ya, Kaa Ishaku ya, ɗǝm Kaa Yakubu ya.’ Yǝn Kaa wote ɓa ra, pa yǝn Kaa ɓan ma huurtu ɓa ya.”
33Pa ɓaa kwausǝ dem sǝɓa ɓǝ kurasǝ wa, ɓǝ kung ma weɗara a fǝɗkǝra ira.
Masaka u faɗsǝ kwangto wa
34Pa ɓaa Farisiyawa ɓa kurasǝ me Yeso yǝ nkaa ɓaa Sadukiyawa ɓa wan, ɓǝ kwau a han fina. 35Ate fin a ɗaaso ɓoso yaa yǝ maasǝ masaka Musa ya, yǝ pǝta Yeso, yaa taa me, 36“Malǝm, ǝn masaka nawa faɗsǝ kwangto a mbu Kaa yǝ nkeesǝ me aa tom ɓa?”
37Yeso yaa kak me, “ ‘A yau Ankundi Kaa ɓǝnga ma kuɗa nga nsaad, ma huurtu nwaango nsaad, ma ɗǝm senda nga nsaad.’ 38U nwa ndǝ ntiiri, ɗǝm ndǝ sase mbu Kaa yǝ nkeesǝ me aa tom ɓa. 39Ɗǝm u raɓte wa yǝ nga siso, ‘A yau anndǝnsaatǝre nyaange nga nkweerange.’ 40Masakasa nsaad ma ɓan nawanto ɓa ɓǝ tar a mbu Kaa yǝ nkeesǝ me aa tom ɓa.”
Krisiti ndǝ Au nyamni yau?
41Pa ɓaa Farisiyawa ɓa, ɓǝ kwausǝ a han fina wa, Yeso yǝɓǝ taa me, 42“Ən mbi senda sa a ɗuura Almaseho rau? Yǝ au nyamni nyau?”
Ɓǝ kak me, “Ndǝ Au Dauda ya.”
43Pa yǝɓǝ nkee me, “Yaa tomtomni Dauda ma lau kwangto Wis ɗekɗek wa, yǝ yarsǝsǝ me, ‘Ankundiu’? Dauda nkee me,
44“ ‘Ankundi nkee Ankundi yaane me,
“A kaɗ a nem seya yaane
ndub me nǝ ti ɓaataker ɓǝnga
a faɗa natsa sǝngan.’
45Pa me Dauda yarsǝ me, ‘Ankundi,’ yaa kiyǝ tomtomni yǝ kaɗ au isiu?” 46Atike kak mara kǝra ra, tǝng kaa ɓisa wa, yaake ɓaarǝ yaa taa mbuka ɗǝm ra.
Currently Selected:
Matta 22: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
