Luka 14

Yeso a ɗur Bafarise wa

1A kaa wiiya Yahudawa ka Yeso yǝ ko me koɓǝ se mbuseya a hit kuɓ kwang Bafarise ke ni ɓeta ɓa nhii nuuwa. 2Pa atike kwang kǝnso u nema ma natsa isa ɓitisǝ wa. 3Pa Yeso yǝ taa malǝmma masakasa ma ɓa Farisiyawa ɓa yǝɓǝ nkee me, “Masakaa waado yawan me a roɓ ete kaa wiiya Yahudawa ɓau?” 4Ɓǝ kak mbuka ra. Pa Yeso yǝ maa eɗ kaya yaa roɓo ya nkee me ngoo maa nga.

5Pa Yeso yǝɓǝ taa, “Me yaake fin a ɗaaso waaso yǝ ma auwe hana naa usu, pa yǝ nwii a ɓundu a kaa nwiinya Yahudawa ɓa, yaa hik nok rau?” 6Ɓǝ maa mbu ɓǝkǝsa nkee ɓa ra.

7Pa Yeso yǝ wǝrsǝ a ɗaaso ɓa ɓaa yar ɓǝsǝ me ɓǝ se mbuseya ɓa ɓǝn taa han kaɗ kwalari ɓa wa pa yǝɓǝ nkee mǝɗkǝra ra. 8“Me atike yargǝ a hiira kon toonera ngǝ ko ko ngǝ kaɗ a mbu kaɗ a wiiya ɓa ra me minda yǝ yar ya yǝ faɗ ngǝsǝ kwangto yan. 9Me maaso yayǝ yarsǝsǝ nsaad ya yǝ kǝ ngǝ nkee me, ‘A nii ngǝ naa han kaɗa eɗ ɗa.’ Pa ɗuura kǝ ngǝ nwaa me kǝ ngǝ kang a han kaɗ sem ma kwangto ra ɓa. 10Pa me ɓaa yargǝ a hiira ngo ko ngǝ kǝr han kaɗ sem yabra ɓa ngǝ kaɗa kǝnso me ya yǝ yar ngǝsǝ ya yǝ wǝr ngǝn kǝyǝ ngǝ yar yǝgǝ nkee me, ‘Ngawo a ham ɓa sikane woogǝ kaɗ a han kaɗ yaɓ ɓa a wiiya.’ Uwa kǝ ngǝ kwa ɓaa ɓa yarsǝsǝ nkee ɓa ɓǝ ngǝ na mbarta. 11Me nsaad yaa yǝ toosǝ ɗuura ira ya, ɓaa ka kang yǝn mbuka ra, ɗǝm yaa yǝ loosǝ ɗuura ira ya, ɓaa ka too yǝn mbuka.”

12Pa Yeso yǝ nkee ya yǝ yarsǝsǝ se mbuseya siya yaa nkee me, “Me ngǝ yar ete se mbuseya wa hana hiira ngǝ yar sik ɓǝnga hana haato waago hana ɓet ɓǝnga ra hana ɓa ɓǝsǝ lǝklǝk ɓa seɗera, me pa kaa fin ɓǝ ngǝ yar kǝnda. 13Pa me kǝ ngǝ yar ɓeta a hiira a yar hanhanta ma ntaata ma puuta, 14maaso kǝ ngǝ taa saltǝra wa, me ɓet sǝsa yaake yǝ nkaa yǝgǝ puu mbuka a ɗaaso ɓoso ra Kaa kiyǝ ngǝ puu sase a kaa ɓaa ɓǝsǝ ma ɓaa yaɓ ɓa ɓa ɓǝka nii a woote ɓose wa.”

Wiine hira ya

15Pa ɓǝ kurasǝ maaso wa atike kǝnso yǝ nkee Yeso me, “Ən eɗ ma saltǝraya ya kiya se mbuseya a hiira a kuɓsutu Kaa wa ya.”

16Yeso yaa kak me, “Ɓaa fǝta tom atike wan, yaa yǝ werkǝsǝ wiine mbukamsa ya, pa yǝ yar ɓeta dem. 17Fer mbukamsa kansǝ wa, yǝ timi hoora ira yǝ ko me yǝ nkee ɓaa yǝ yar ɓǝsǝ sǝɓa me, ‘Sawo ɓaa feɗ werkǝ mbusa wan nsaad.’

18“Pa nsaad ɓǝ ntii na humta wa, yaa ntiiri ya yǝ nkee me, ‘Nǝ tiri nyaayo pamman me konǝ sengge, ǝnǝ tom sǝmo.’

19“Yaa fin ya yǝ nkee me, ‘Nǝ tiri naa morɓǝsǝsa puu na ɗǝɗa me konǝ ɓǝ fǝta, nǝn kǝna ngǝ ǝnǝ tom sǝmo.’

20“Ate ɗǝm yǝ nkee me, ‘A tǝro wa nǝ konsǝ toone wa, nǝ taa ɗǝɗa na woo ra.’

21“Hoora ira yǝ kang yǝ nkee An taanda isi nsaad mbu ɓǝ nkeesǝsǝ ɓa. A nii ɗaa An taanda sisi dem. Pa yǝ nkee hoora ira, ‘Ngo naakǝn naakǝn, ngǝ ɓǝɗ ɗǝɗa ma hapta u a ɗaaso uru wa, ngǝ kwau hanhanta ma puta ma ntaata ma ɓaa neme portǝsǝ ɓa.’

22Hoora kara yǝ nkee me, “ ‘Yaa kwang ya, mbu ngǝ tisǝ me a tom ɓa, tomon, pa handa peen kwasa.’

23“An taanda sisi yǝ nkee hoora ira me, ‘Ngo a ɗǝta kwang kwangta ma u ngeek ngeek wa, ngǝ nkee ɓeta ɓǝ wo, me ɗuur waano a kungu. 24Nǝn nkeesǝ, me yake sem kǝn a ɗaaso ɓa nǝ yar ɓǝsǝ ɓa u kiya fǝta mbuseya nǝ werkǝsǝ me hiira ɓa ra.’ ”

Kongsa a tom au fǝɗke wa

25Ɓeta dem ɓaa siko ke ma Yeso pa yǝ kǝrtǝ yǝɓǝ nkee me, 26“Me ya yǝn yausǝ me yǝ kǝ nǝ ɓǝɗ ya me ngǝ yau a faɗ papisi hana maasi, hana toonesi hana emɓǝsa, hana ɓoni ɓisa, hana urtu usu raya, yǝ nkaa yǝ tom aufǝɗke yaane ra. 27Pa yaa yǝ toosǝ kwaakǝra ira ra ya yǝ nǝ ɓǝɗɗaa ya, yǝ nkaa yǝ tom aufǝɗke yaane ra.

28“Me atike kǝn yǝn taa me kiya mar hito ɓoti yǝ kaɗ yǝ kau mbu kiya todɓa yǝ wǝrǝ ko koɓa yǝsǝsa ka maa ya feɗ hit yǝn taasǝwa rau? 29Me yǝ tom maaso ra yǝ nkaa yǝ feɗ hit sǝsora me yǝ ntiin ɗǝm yǝ feɗɗa ɓaa ka nhuu me yǝ feɗ hit sisora, 30ɓǝkǝ nkee me, ‘Yǝɗa yǝ ntii hito payǝ nkaa yǝ feɗɗa.’

31“Me kuɓ ko kiya fiɗ ma sosamse pusa puu puu me ɓǝ kong kito ma ya yǝsǝ ma sosamse pusa puu puu raɓ ya ya kaɗ nhe yǝ sengge ko yǝma kwangto kiya nkaa yǝ kong ma kuɓ siso rau? 32Me yǝ nkaara nok sa ɓǝ mǝbmǝb yǝ kǝ timi em tima ɓǝ ko koɓǝ kǝr ɗǝɗa ɓǝka kanda. 33Ɗǝm sase kǝn ya yǝ lee nsaad mbu yǝsǝ ma siyo ɓa ra yǝ nkaa yǝ tom aufǝɗke yaanera.

Mǝɗkǝra a ɗuura tumara

34Pa Yeso yǝɓǝ nkee mǝɗkǝra ra ya nkee me, “Tuma ǝn mbu yaɓ ɓa, pa me yǝ ɓaa ma songsongto usun, kiyǝ tomtomni kiya tom songsong ɗǝmǝu? Yaa yǝsǝ ma ngwee kura kura ya, a lee yǝ kura. 35Yǝ sem ma tinima a nyayora hana a rumra mee a tuk ndiira maɗ ra. Yaa yǝsǝ ma ngwee kura kura ya, a lee yǝ kura.”

Currently Selected:

Luka 14: LLA

Highlight

Copy