Yohanna 4
4
Yeso ma toone Samariya ke
1Ɓaa Farisiyawa ɓa, ɓǝn kura me, Yeso yǝn taa emfǝɗkaa dem a faɗ u Yohanna wa, ɗǝm yǝn tom ɓǝ baptisma, 2pa a ɓongtǝrato sem Yeso ma nkweera ira yǝn tomsǝ baptisma wa ra, ǝn emfǝɗkaa ɓǝsa. 3Pa Ankundi kurasǝ mara sǝra wa, yǝ lee put Yahudiya wa, yǝ kang Galili.
4Waso tomon ɗaɗ Yeso yǝ ɓǝɗ ma lau Samariya wa. 5Pa yǝ wo a ur ko ɗaan Samariya un yarsǝ me Saikar wa. Ur kawa yǝ kwang ma put Yakubu yǝ nasǝ auwesi Yusufu wa. 6A hansǝsa bundu Yakubu wa kǝnso. Yeso yǝ kongsǝ a siko wa, pa yǝ kaɗ a ee bundu sisi. Mbusa ǝn tom si kaa ɗa.
7Pa toone Samariya ke yǝ wo bundu me yǝ nkwee mbraa. Pa Yeso yaa nkee me, “Ənǝ paa mbraa nǝ wee.” 8A fer siso emfǝɗkaa ɓǝsa ɓǝ wee kano a ɗaaso ɗuurun, me ko ɓǝ kǝr mbuseya.
9Pa toone eɗ Samariya ya, yǝ nkee Yeso me, “Tomtomni ngase yaa Yahuda ya, kǝ ngǝ kǝna mbraa wewe ma a nani, sinǝ yaa Samariya yau?” Yǝ nkee maaso, me ɓaa Yahudawa ɓa, ɓǝ pǝra ma ɓaa Samariyawa ɓa ra.
10Yeso yaa kak yaa nkee me, “Me kangǝ maa saltǝra Kaa ran, ɗǝm me ngǝ maa yaa yǝn kǝna ngǝsǝ mbraa ya, kama kǝ nga kǝna, sase kǝn, kiyǝ ngǝ na mbraa huurtu ma.”
11Pa toone kaya yǝ nkee me, “Yaa kwang ya, nwa ngǝ sem ma mbu wiin mbraa ɓa ra, bundu kawa ɗǝm kututuɓ. Pa kǝ ngǝ taa mbraa huurtu so wa nau? 12Ngǝ faɗ paate Yakubu yaa yǝ leetǝsǝ ɓundu wa ya, sase ma nkweera ira ma em ɓǝsa ma naa isa, ɓǝ weesǝ mbraa ima wa nǝu?”
13Yeso yǝ kak yaa nkee me, “Nsaad yaa yǝ weesǝ mbraa ma ya, mbraa kǝ ɓaarǝ a si ɗǝm. 14Pa yaa yǝ weesǝ mbraa kǝnǝsa na ɓa, mbraa a ɓaarǝ a si ɗǝm ra. Mbraa kǝnǝsa na ɓa kǝ tom nuu mbraa wa a sanii, u ǝn nfeesǝ aa na huurtu pakarese wa.”
15Pa toone kaya yaa nkee me, “Yaa kwang ya, ǝnǝ na mbraa sǝma, me nǝ ɓaarǝ nǝ kura mbraa sima ɗǝm ra, ɗǝm nǝ ɓaarǝ nǝ wo a hamɓa me nǝ nkwee mbraa ra.”
16Pa Yeso yaa nkee me, “Ngo ko ngǝ yar kerange, sǝ wo.”
17Pa yǝ kak yaa nkee me, “Nase nǝ sem ma kere ra.”
Yeso yaa nkee me, “Ngǝ nkee ɓongtǝran, ngǝ nkeesǝ me ngǝ sem ma kere ra wa, 18me a ɓongtǝrato, ngǝ nsaa kera wonon, yaa sǝsǝ ke waso ya, sem kerange ra.”
19Pa toone kaya yǝ nkee Yeso me, “Yaa kwang ya, waso nǝ maan me ngǝ an nawanto ya. 20Sirta ɓǝta ɓǝ nyoo Kaa a yol wa, pa waaso Yahudawa sǝ nkee me, tomon ɗaɗ tǝ nyoo Kaa a Urshalima.”
21Pa Yeso yaa kak yaa nkee me, “Toone, aa na ɓongtǝra ma mbu nǝn nkee ngǝsǝ ɓa, me ferko kǝn kǝ wo, u ɓeta ɓaa nkaa ɓǝ nyoo Kaa a yolo wa ra, hana Urshalima ra. 22Saa ɓaa Samariya ɓa, sǝ maa mbu sǝn nyoosǝn nyoo ɓa ra. Pa waato ɓaa Yahudawa ɓa, tǝ maa mbu tǝn nyoosǝ ɓan, me konkweera wa fiɗ a Yahudawa ni. 23Pa ferko kǝn ǝn wowo, nga waso ma yǝ wee won, u ɓaa ɓǝn nyoosǝ Kaa ma ɓongtǝrato ɓa, kǝɓǝ nyoo Paapa a Wiso ma ɗǝm ɓongtǝrato, me paapa yǝn kǝr nkaamǝra ɓeta sǝra ɓaa nyoo. 24Kaa yǝ wiso, ɓaa ɓǝn nyoo sǝsǝ ɓa ɗǝm, tomon ɗaɗ ɓaa nyoo a wiso ma ɓongtǝrato ɗǝm.”
25Pa toone kaya yǝ nkee Yeso me, “Nǝ maan me Almaseho yǝn wowo ya ǝn yarsǝsǝ me Krisiti ya. Me yǝ won, kiyǝ tǝ weɗa mbusa nsaad.”
26Yeso yaa nkee me, “Nase nǝn kansǝ ma ngase ya, ǝn niina sase.”
27Ɓǝn feɗ kanmǝran feɗe, pa emfǝɗkaa ɓǝsa ɓǝ wosǝ ɓǝ wǝr yǝn kankan ma toone wa, pa ɓǝ tom mbu nhiinyanhiinya ɓa. Pa yaake sem kǝn yǝ taasǝ toone siya me, “Ngǝn taa mbiu ra,” hana ɓǝ taa Yeso me, “Ngǝn kan ma toone ya men mbiu ra?”
28Pa toone kaya yǝ lee hun usu kǝnso, yǝ faɗ a ɗaaso uru wa, yǝ nkee ɓeta, 29“Saawo, Sǝ wǝr eɗ yǝ nkee nǝsǝ mbu nǝ pǝtasǝ tomo ɓa nsaad, yaa minda ǝn sase Almaseho?” 30Pa ɓeta ɓǝ toma fiɗo a ɗaaso uru wa, ɓǝ wo a Yeso ni.
31Ɓaa tomo maaso wa, pa emfǝɗkaa Yeso ɓa, ɓaa kǝna me, “Malǝm, aa se mbuseya.”
32Pa Yeso yǝɓǝ nkee me, “Nǝ ma mbuseya ka, u sǝ maa mbuka a si ra wa.”
33Pa emfǝɗkaa ɓǝsa ɓǝ taa ɓaatǝ me, “Ko yaake yǝ wosǝsǝ ma mbuseya nǝu?”
34Pa Yeso yǝ nkee me, “Mbuseya ɓǝna, ǝn siso nǝ tom mbu yaa yǝ timinǝsǝ ya, yǝn taasǝ ɓa, na ɗǝm feɗ tinima ima. 35Sǝ nkeenyaa me, ‘Pee ofe kurun a ɗaɗ koma rau’? Pa nǝn nkeesǝ, sǝ sengge nyaanyaa yaɓ, ɓǝ ween, ɓǝ kana ɗaɗɗon. 36Hana waso, an ɗaɗɗe ya, yǝn taa nsaa usu, ɗǝm yǝn kwau mbuseya u ǝn nasǝ huurtu pakarese wa ya, pa me maso, an rǝke ya ma an ɗaɗɗe ya, ɓǝkǝ tom hur kuɗa wa ke. 37A hamɓa wa, mǝɗkǝra mara ra ǝn ɓongtǝra, u nkeesǝ me, ‘Ate yǝ rǝkǝ, ate ɗǝm yǝ ɗaɗɗa.’ 38Nǝ timisǝ me sǝ ɗaɗ mbu sǝ kong a si ɓa ra. Ɓaata ɓǝ wee kongsan, pa saase sǝ kura nepto kongsa ɓoson.”
39Ɓaa Samariya ɓa dem a ur siso, ɓǝ na ɓongtǝra ma Yeso, a ɗuura mara toone sisi nkeesǝ ɓa me, “Eɗ ɗa, yǝ nkeenǝ mbu nǝ pǝtasǝ tomo ɓa nsaad.” 40Pa ɓaa Samariya sǝɓa wosǝ a Yeso ni wa, ɓaa kǝna me, yǝ kaɗ ke ma ɓosa, pa yǝ yauwa ɓǝ kaɗ tǝro raɓ. 41Pa ɓeta dem u faɗsǝ ɓaa ntiiri ɓa wa, ɓǝ na ɓongtǝra ma Yeso, me a mara yǝn nkeesǝ ra.
42Pa ɓaa Samariya ɓa, ɓǝ nkee toone kaya me, “Waso tǝ na ɓongtǝran, pa sem me a mbu ngǝ nkeetǝsǝ ɓa ra, me taase kǝn tǝ kuran ma ngweeme yaaten, ɗǝm tǝ yauwan me, ndǝ ɓongtǝra eɗ ɗa, ǝn an kon nkweera put ntaadi wa ya.”
Yeso yǝ roɓ au an tinima a taanda kuɓu ya
43Ndiira tǝro raɓ kawa, Yeso yǝ lee put Samariya wa, yǝ ko Galili 44Me ka Yeso ma nkweera ira, yǝ pǝta nkeen me, an nawanto ya, yǝ sem ma mbarta a ur usu ra. 45Pa yǝ kansǝ Galili wa, ɓaa Galili ɓa, ɓaa kon nema raɓ, me ɓosa ma ɓǝ wǝr nsaad mbu yǝ tomsǝ a Urshalima ɓan, a fer mbukamsa tadko wa.
46Pa Yeso yǝ ɓaarǝ yǝ kang a ur Kana u Galili wa, a han yǝ kǝrtǝsǝ mbraa aa kang mbraa inabi ma wa. A Kafarnahum, yaake kǝn yǝn tom tinima a taanda kuɓu ra, u auwesi yǝ sem kwakwa ra ya. 47Pa eɗ sisi yǝ kurasǝ me Yeso lee put Yahudiya wa, yǝ won Galili nǝn, pa yǝ ko a sanii, yaa kǝna me koyǝ roɓ auwesi u yǝsǝ a ee woɗɗa ya wa.
48Yeso yaa kak yaa nkee me, “Me ka sem me sǝ wǝr mbu nhiinyanhiinya ɓa ma mbu weɗara ɓa nhe ra, sǝ fǝta na ɓongtǝra wa ra.”
49Pa yaa yǝn tomsǝ tinima a taanda kuɓu ni siya, yǝ nkee Yeso me, “Yaa kwang ya, ngau ndǝ ko, tom ɓa auwane siya, yǝ woɗ ɗa.”
50Yeso yaa kak me, “Ngoo, auwange kiyǝ roɓɓo.”
Pa eɗ kaya yǝ na ɓongtǝra ma mbu Yeso yǝ nkeesǝsǝ ɓa, yǝ faɗ mbusa. 51Pa yǝsǝ a ɗǝɗa koko ɗur wa, ɓǝ pam ma hoota ita, ɓaa nkee me, “Auwange yǝ roɓɓon.” 52Pa yǝɓǝ taa a fer na wa yǝ roɓsǝ, pa ɓaa nkee me, “Ura ma kaa ɗa, songra kara leesǝsǝ wa.”
53Pa pap au siya ya, yǝ maa me mbusa tom keke a fer Yeso yǝ nkeesǝsǝ me, “Auwange kiyǝ roɓɓo.” Pa eɗ kaya ma ɓet taanda ɓisa nsaad, ɓǝ na ɓongtǝra ma Yeso.
54U nwa, ǝn mbu nhiinyanhiinya raɓte Yeso yǝ tomsǝ wa, tǝng yǝ leesǝ Yahudiya yǝ ko Galili wa.
Currently Selected:
Yohanna 4: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
