ONDJIMBOLELA 8
8
1Ando owa li omumwamememati, wa yama komagundji gameme!
Nge tandi ku tsakaneke pondje,
ando tandi ku thipi komilungu,
nokape na ngoka ta dhini ndje.
2Ando tandi ku fala mokagumbo kameme,
ando to ka pukulula ndje,
ando tandi ku nwetha omaviinu
mwa tulwa iizimba ya nika nawa,
oshinuwa sha kolwa moogranati dhandje.
3Olumoho lwe olu li kohi yomutse gwandje,
nolulyo lwe otalu papatele ndje.
4Ne aafuko Aajerusalem, otandi mu ganitha:
Inamu pendutha ohole nenge mu yi kudhile,
manga inaayi shi yuulukwa.
Ondjimbo ontihamano
Ookuume:
5Olye ngoka te ya ta zi kombuga
te egamene omuholike gwe?
Mbushiki:
Onde ku pendutha mokati komiyapula.
Oko tuu nkoka nyoko e ku pulumuthile,
oko a li noshitheta, sho e ku eta paantu.
6Tula ndje komutima gwoye nda fa oshihako,
ngaashi okalinga koshihako kokwooko kwoye;
oshoka ohole oya kola ya fa eso,
uukodhi wayo ihau kodhuluka wa fa oshaasi.
Ehayango lyayo olyo ehayango lyomulilo,
ehayango lyOmuwa.
7Efundja lyomeya ihali vulu okudhima ohole,
nomilonga ihadhi vulu oku yi kungulula po.
Omuntu nando na gandjele ohole eliko lye alihe,
ota ka dhinwa ashike.
Aamwayina yomufuko:
8Tse otu na okamwamemekadhona onkelo inaaka tumba natango omagundji.
Omumwameme nguka otatu mu ningi ngiini,
uuna te endelwa?
9Ye ngele ekuma, otatu mu tungile oshungo yoshisiliveli,
ihe ngele omweelo, otatu mu siikile niipilangi yomisedeli.
Omufuko:
10Ngame mwene ekuma,
nomagundji gandje oga fa ooshungo.
Momeho ge onda ningi nda fa ngoka te eta egwaneneno.
11Salomo okwa li e na oshitsambe shomiviinu kuBaal Hamon;
okwe shi thitha kaanashitsambe.
Kehe ngoka oku na okufuta iimaliwa yoshisiliveli eyuvi omolwiiyimati yasho.
12Oshitsambe shandje shomiviinu oshandjelela,
oshi li pungame mpaka.
Salomo na likole iimaliwa ye eyuvi,
nomathele gaali ogaamboka taa langele iiyimati ye.
Mbushiki:
13Muyalekwa gwandje ngoka wa kala miikunino,
ookuume ohaa pulakene ewi lyoye,
li pulakenitha ndje wo!
Omufuko:
14Galuka ko, muholike gwandje,
ngaashi omenye nenge ompalala ongundjuka
koondundu dha mena omiti dhiizimba.
Currently Selected:
ONDJIMBOLELA 8: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
