MARKUS 9
9
1Jesus okwa ti kuyo: “Ngame otandi mu lombwele: Opu na yamwe mwaambaka ya thikama mpaka itaaya makele eso, manga inaaya mona Oshilongo shaKalunga tashi ya noonkondo dhasho.”
Jesus ta adhimithwa
(Mat. 7:1-13; Luk. 9:28-36)
2Sho pwa piti omasiku gahamano, Jesus okwa kutha Petrus, Jakob naJohannes nokwe ya fala kondundu ondeendeka, ye ki ikalele. Oye okwa shituluka montaneho yawo, 3noonguwo dhe odha adhima dha tokelela. Kombanda yevi kaku na nando omuntu ta vulu oku dhi tokitha ngaaka. 4Elia naMoses oye ya holokele noya kundathana naJesus. 5Petrus okwa lombwele Jesus e ta ti: “Muhongi, opwe tu opalela mpaka okukala. Otatu ka dhikila po omatsali gatatu, limwe olyoye, limwe olyaMoses nalimwe olyaElia.” 6Petrus nayakwawo oya li ya tila noonkondo, onkee oye ina tseya shoka e na oku shi tya.
7Oshikogo oshe ya noshe ya siikile, newi olya zi moshikogo lya ti: “Nguka oye Omumwandje omuholike, mu uveni!” 8Ohaluka sho ya lengalenga, inaa mona we nando olye; Jesus oye awike a li puyo.
9Ano sho ya li taa kuluka ko kondundu, Jesus okwe ya kumagidha, yaa hokololele nando omuntu shoka ya mono, manga Omuna gwOmuntu inaa yumudhwa kuusi.
10Oyo ya taamba elombwelo ndyoka, ihe oya pulathana okuyumuka kuusi shoka taku ti. 11Oyo noya pula Jesus ya ti: “Omolwashike aalongimpango taa ti kutya Elia ote ke ya tango?”
12Jesus okwe ya yamukula: “Eeno, Elia ote ya tango nota opaleke ayihe. Ihe ongiini ano, sho Omuna gwOmuntu a nyolwa kutya oku na okuhepekwa nomahepeko ogendji nokudhinwa? 13Ngame otandi mu lombwele ano kutya Elia okwi ile, ihe oyo oye mu ningile shaa shoka ya hala, ngaashi a nyolwa mOmanyolo.”
Jesus ta aludha omunashintona
(Mat. 17:14-21; Luk. 9:37-43a)
14Sho ya galukile kaalongwa mboka ya kalele po, oya adha ongundu onene yaantu ye ya gongalela, naalongimpango oya li taye ya ludhikitha. 15Aantu mboka sho ya mono Jesus, oya kumwa noya matukile kuye e taye mu popitha. 16Jesus okwa pula aalongwa a ti: “Otamu ludhike ano shike nayo?” 17Gumwe gwomongundu okwe mu yamukula: “Muhongi, onde ku etele omumwandje omumati e niwe kompwidhuli, ye iha popi. 18Shaa tuu tayi mu kwata, otayi mu hata po. Oye ta eta ondutu, ti ikokota omayego noti ikukutile. Onda li nda lombwele aalongwa yoye, ye yi tidhe mo, ihe oya nyengwa.”
19Jesus okwa ti kuyo: “Epipi ngoye lyaa na eitaalo, osigo uunake tandi kala pune? Osigo uunake ndi na oku mu idhidhimikila? Mu eteni kungame.” 20Oyo noye mu eta kuye.
Ompwidhuli sho ya mono Jesus, oya mbungambunga omumati, e ta gwile pevi, noye mu galangatitha e te eta natango ondutu. 21Jesus okwa pula he yomumati a ti: “Okwa kala ngeyi omasiku ge thike peni?”
Oye a yamukula: “Okuza kuunona we. 22Olwindji ombepo ya tya ngawo oye mu undulile momulilo nomomeya, opo yi mu yone po. Ano ngele oto shi vulu, tu sila ohenda, ngu u tu kwathe.”
23Jesus okwa ti kuye: “Ngele tii shi vulu, wa ti? Kehe shimwe otashi vulu okuningilwa ngoka i itaala.”
24Mbalambala he yomumati okwi igidha a ti: “Ondi itaala, kwatha ndje nuuna ndaa na eitaalo.”
25Jesus sho a mono aantu taa ngundumanene po, okwa ganda ombepo ya nyata ndjoka hayi ningi, omuntu kaa vule okupopya nokuuva ko, a ti: “Otandi ku lombwele, za mo muye ngoye ino ya mo we.”
26Oyo oyi igidha noye mu mbungambunga e tayi zi mo muye. Omumati okwa ningi a fa kee na omwenyo, onkee aantu oyendji oya ti kutya okwa sa. 27Ihe Jesus okwa kwata oshikaha she nokwe mu ambidhidha, e ta thikama.
28Jesus sho a yi megumbo, aalongwa ye oye mu pula, manga ye li naye oyo ayeke ya ti: “Omolwashike twa nyengwa okutidha mo ompwidhuli ya tya ngawo?”
29Oye okwa ti kuyo: “Oludhi lwombepo ya tya ngeyi ihalu tidhwa mo kusha shilwe, okegalikano alike.”
Jesus ta popi okuhepekwa kwe
(Mat. 17:22-23; Luk. 9:43b-45)
30Oyo oya zi ko nkoka noya pitile muGalilea. Jesus okwa li inaa hala, aantu ya tseye mpoka e li, 31oshoka okwa li ta longo aalongwa ye kutya: “Omuna gwOmuntu ota ka gandjwa miikaha yaantu mboka taa ke mu dhipaga, nongele ye mu dhipaga, e tapu piti omasiku gatatu, ota ka yumudhwa kuusi.”
32Kaya li yu uvite ko oohapu ndhoka, ihe oya tila oku mu pula.
Omunene olye
(Mat. 18:1-5; Luk. 9:46-48)
33Oyo sho ye ya kuKapernaum, Jesus okwa yi megumbo nokwa pula aalongwa ye e ta ti: “Mondjila omwa li tamu kundathana shike?”
34Ihe oya mwena owala, oshoka mondjila oya li taa kundathana kutya olye omunene e vule ooyakwawo ayehe. 35Jesus okwa kuutumba nokwi ithana aalongwa mboka omulongo nayaali e ta ti kuyo: “Ngoka a hala, a kale gwotango, na kale omuhugunini kwaayehe nomuyakuli gwaayehe.” 36Oye okwa kutha okanona nokwe ka thikameke montaneho yawo, okwe ka papata momaako ge e ta ti kuyo: 37“Kehe tuu ngoka ta taamba kamwe komuunona wa tya ngeyi medhina lyandje, oye ta taamba ndje; naangoka ta taamba ndje, hangame ta taamba, ihe ota taamba ngoka a tuma ndje.”
Ngoka kee na ondumbo natse, okwa gama kutse
(Luk. 9:49-50)
38Johannes okwa ti kuye: “Muhongi, otwa mono omuntu gumwe ta tidha mo oompwidhuli medhina lyoye, tse notwe mu indike, oshoka ka li gwomongundu yetu.”
39Jesus okwa yamukula a ti: “Inamu mu indika, oshoka kaku na ngoka ta vulu okuninga oshikumithalonga medhina lyandje e ta popi ndje nayi nuupu. 40Oshoka ngoka kee na ondumbo natse, okwa gama kutse. 41Oshoka ngame otandi mu lombwele: Kehe ngoka te mu pe oshitenga shomeya, mu nwe, molwaashoka ne oyaKristus, ita kala inaa pewa ondjambi ye.”
Omahongololo
(Mat. 18:6-9; Luk. 17:1-2)
42“Ngoka ta hongolola kamwe komuushona mbuka wi itaala ndje, okwa gwana a mangelwe emanya edhigudhigu mothingo ye e tu umbilwa muule wefuta. 43Oshikaha shoye ngele tashi ku hongolola, shi teta ko. Okuya momwenyo oshilema okwe ku opalela ku vule okukala niikaha iyali e to umbilwa moheli, momulilo ihaagu dhimi po. [44Moka omazinyo taga li onyama yawo go itaga si, nomu na omulilo ihaagu dhimi po.] 45Ompadhi yoye ngele tayi ku hongolola, yi teta ko. Okuya momwenyo u na ompadhi yimwe okwe ku opalela ku vule okukala noompadhi mbali e to umbilwa moheli. [46Moka omazinyo taga li onyama yawo go itaga si, nomu na omulilo ihaagu dhimi po.] 47Eho lyoye ngele tali ku hongolola, li tsipula mo. Okuya mOshilongo shaKalunga u na eho limwe okwe ku opalela ku vule okukala nomeho gaali e to umbilwa moheli. 48Moka omazinyo taga li onyama yawo go itaga si, nomu na omulilo ihaagu dhimi po.
49“Omuntu kehe oku na okuyelithwa nomulilo.
50“Omongwa ogwo oshinima oshiwanawa; ihe uuna tagu hahuka, otagu toyalekwa nashike?
“Kaleni mu na omongwa mune yene, ne mu kale mu na ombili mokati keni.”
Currently Selected:
MARKUS 9: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
