MARKUS 3

Omulumentu e na oshikaha sha lemana

(Mat. 12:9-14; Luk. 6:6-11)

1Jesus okwa yi ishewe mosinagoga, moka mwa li mu na omulumentu e na oshikaha sha lemana. 2Aantu mboka ya li mo, oya langele Jesus, ye mu tale, ngele ote mu aludha mEsabati, opo ya wape oku mu tamaneka. 3Jesus okwa lombwele omulumentu ngoka e na oshikaha sha lemana a ti: “Hedha huka montaneho.” 4Opo okwe ya pula a ti “Oshike sha pitikwa okuningwa mEsabati, okulonga uuwanawa nenge okulonga uuwinayi, okuhupitha omwenyo gwomuntu nenge oku gu yona po?”

Ihe oyo ya mwena owala. 5Jesus okwe ya tala noshipala sha lula ye a nika oluhodhi omolwokwaavulika kwawo. Nena okwa lombwele omulumentu ngoka a ti: “Utha oshikaha shoye.” Oye okwe shi utha, osho nosha aluka. 6Aafarisayi oya zi mo mosinagoga noya gongala nziya, ya kundathane naamboka ya gama kombinga yaHerodes, opo ya dhipage Jesus.

Ongundu onene yaantu pomunkulo gwefuta

7Jesus okwa yi naalongwa ye komunkulo gwefuta lyaGalilea. Aantu oyendji oye mu landulile ko, ya zi muGalilea, kuJudea, 8Jerusalem, Idumea nahandiyaka yaJordan nosho wo popepi naTiro naSidon. Aantu oyendji ye thike mpoka oye ya kuJesus, oshoka oyu uvu shoka a li ta longo. 9Omolwowindji waantu Jesus okwa lombwele aalongwa ye, ye mu kalekele owato popepi, opo kaa thininikwe kaantu. 10Jesus okwa li a aludha aantu oyendji, onkee aavu ayehe oyi ithininikile puye, opo ye mu gume. 11Aantu mboka ye na oombepo dha nyata sho ye mu mono, oya tsu oongolo koshipala she noyi igidha mokule ya ti: “Ongoye Omuna gwaKalunga!”

12Jesus okwa ganda oombepo dha nyata, dhaaye mu popye, kutya oye lye.

Jesus ta hogolola aayapostoli omulongo nayaali

(Mat. 10:1-4; Luk. 6:12-16)

13Jesus okwa londo kondundu nokwi ithana aalumentu mboka ye mwene a hala, ye ye kuye. 14Oye nokwa hogolola aalongwa omulongo nayaali, ya kale puye e te ya luku aayapostoli. Okwe ya tumu, ya ka uvithe 15noya kale ye na oonkondo dhokutidha mo oompwidhuli.

16Mboka omulongo nayaali e ya hogolola, oyo: Simon, ngoka Jesus e mu luku wo Petrus; 17Jakob yaSebedeus nomumwayina Johannes, mboka Jesus e ya luku Boanerges, otali ti: aalumentu yendundumo lyomvula; 18Andreas, Filippus, Bartolomeus, Mateus, Tomas, Jakob yaAlfeus, Taddeus, Simon omulaadhi 19naJudas Iskariot, ngoka e mu gwaaleke.

Jesus naBelsebul

(Mat. 12:22-32; Luk. 11:14-23; 12:10)

20Jesus okwe ya kaandjawo, naantu oyendji oya gongala ishewe. Onkee Jesus naalongwa ye inaa vula we okulya. 21Ihe aakwanezimo lye sho ye shi uvu, oya yi ko, ye ke mu kwate, oshoka oya ti: “Ota yi oonkwengu!”

22Ihe aalongimpango mboka ya zi kuJerusalem oya ti: “OBelsebul, omukuluntu gwoompwidhuli e mu pe oonkondo dhokutidha mo oompwidhuli.”

23Jesus okwi ithana aantu, ya hedhe kuye nokwe ya lombwele momayele e ta ti: “Satana ota vulu tuu okutidha mo Satana mukwawo? 24Oshilongo ngele tashi itsile ondumbo, nena oshilongo shoka itashi vulu okukala po. 25Egumbo ngele tali itsile ondumbo, nena egumbo ndyoka itali vulu okukala po. 26Osho wo Satana ngele ti ikondjitha noti itsile ondumbo, nena ita vulu okukala po, ota hulu po.

27“Ihe kaku na ngoka ta vulu okugwayela megumbo lyomunankondo, e mu yuge eliko lye, okuninga ta manga tango omunankondo ngoka, opo ihe ta yugu egumbo lye.

28“Ngame otandi mu lombwele: Oondjo adhihe nomasheko agehe, nando oga kale ge thike peni, aantu otaye ga dhiminwa po. 29Ihe ngoka ta sheke Ombepo Ondjapuki, ke na mpoka na dhiminwa po oondjo dhe sigo aluhe, oshoka ota kala e na oondjo dhaaluhe.” 30Jesus okwa popi ngeyi, oshoka oya ti kutya oku niwe kombepo ya nyata.

Aakwawo yaJesus yashili

(Mat. 12:46-50; Luk. 8:19-21)

31Yina yaJesus naamwayina aalumentu oye ya noya thikama pondje. Oya tumu kuye noye mu ithana, e ye kuyo. 32Ihe ongundu yaantu oya kuutumba ya ngundumanena Jesus noye mu lombwele ya ti: “Tala, nyoko naamwanyoko oye li pondje, taye ku kongo.”

33Jesus okwe ya yamukula a ti: “Meme naamwameme oolye?” 34Oye okwa tala kumboka ya kuutumba puye nokwa ti: “Tala, meme naamwameme oyo mbaka. 35Oshoka kehe tuu ngoka ta gwanitha ehalo lyaKalunga, oye omumwameme omulumentu nomumwameme omukiintu nameme.”

Currently Selected:

MARKUS 3: ONDB

Highlight

Copy