MIKA 7
7
Eyonuko lyaIsrael
1Yaye ngame! Onda fa omuntu a sa ondjala ngoka itaa matha nando iiyimati yomakukila komiti, nomandjembele komiviinu. Omandjembele agehe noonkwiyu dhoondhiye adhihe odha toononwa ko. 2Moshilongo kamu nomwiinekelwa, kamu na nando omuvuliki kuKalunga. Shaa ngoka ota kongo ompito, opo a dhipage. Shaa ngoka ota langele mukwawo, e mu nene ko. 3Ayehe otaa kongo okulonga uuwinayi. Aambala naatokolihapu otaa pula oombumbo. Omunenentu ote ya hokololele shoka a hala, nosho ngeyi taa pangele kumwe. 4Nokuli ngoka omwaanawa nomwiinekelwa gwomokati kawo ke na shilonga.
Esiku olye ya, uuna Kalunga ta geele aantu, ngaashi e ya londodhitha kaahunganeki. Ngashingeyi oye li mevundakano. 5Ino inekela mushiinda shoye, nenge u itule kuume koye. Kotokela oohapu dhoye, nando ou kale to lombwele mukadhoye. 6Momasiku ngaka aamati otaa tala oohe oyo aagoya, aakadhona notaa kondjitha ooyina, naafuko otaa tamanana nooyinamweno; aatondi yomusamane oyo aangandjawo.
7Ihe ngame otandi tegelele Omuwa; ondi inekela Kalunga, ngoka ta hupitha ndje. Kalunga otu uvu ndje.
Omuwa ta hupitha
8Yatondi yandje, inamu kala nokunyanyukilwa ndje. Nando nda punduka, otandi yambuka ishewe. Ngashingeyi ondi li momilema, ihe Omuwa ota ka minikila ndje. 9Onda yono kOmuwa, onkee ondi na okwiidhidhimikila ondjahi ye okathimbo. Ihe pehulilo ota popile ndje notu utha uuwinayi mboka wa ningilwa ndje. Ota fala ndje puuyelele; otandi kala ndi na omwenyo notandi ka mona ehupitho lye. 10Nena aatondi yandje otaye ke shi mona e taa sithwa ohoni — oomboka ye tu nyenkele ya ti: “Omuwa Kalunga keni oku li peni?” Otandi ke ya mona ya dhengwa noya lyatelwa pevi ngaashi uuhoho muuyanda.
11Yantu yaJerusalem, ethimbo lyokutungulula omakuma goshilando otali ya. Pethimbo ndyoka oshilongo sheni otashi ka tamunuka. 12Oshigwana shoye otashi ka galukila kungoye tashi zi koombinga adhihe — kuAssur muuzilo, kuEgipiti muumbugantu, kombinga yaEufrat, komafuta gokokule nokoondundu. 13Ihe evi otali ka ninga ombuga omoluuwinayi waamboka ya kala mo.
Omuwa u uvitile Israel ohenda
14Omuwa, kala omusita gwoshigwana shoye, aantu we yi ihogololele. Nando oyi ikalela mombuga, oku na evi ewanawa lye ya kunduka. Ya fala, u ya napithe momanapelo omanene gaBaasha naGilead, ngaashi ya li haa ningi nale.
15Tu longela iikumitha, Omuwa, ngaashi wa ningile nale, sho we tu tembudha muEgipiti. 16Iigwana otayi ke shi mona e tayi ka sa uunye, nonando oyo iinankondo. Mokutyololoka otaa ka mutika omakana gawo e taa thitike omakutsi gawo. 17Otaa ki igonyena montsi ya fa omayoka; otaa ka za moohote dhawo taa ningi omahwilili e taa kwatwa kuumbanda. Muumbanda wawo otaa ka galukila kOmuwa Kalunga kawo.
18Kaku na kalunga kalwe e ku fa, Omuwa; ongoye to dhimi po omayono gaantu yoye mboka ya hupu po. Ngoye ito kala u na ondjahi sigo aluhe, ihe ngoye oto nyanyukilwa okuholola ohole yoye yashili. 19Oto tu sile ohenda ishewe. Oto ka lyatagulila omayono getu kohi yoompadhi dhoye e to gu umbile kondaandelo yefuta. 20Oto ka hololela aantu yoye uudhiginini woye nohole yoye yashili, koluvalo lwaAbraham nolwaJakob, ngaashi wu uvanekele ootatekulu monalenale.
Currently Selected:
MIKA 7: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
