JESAJA 8
8
Ehunganeko kombinga yaDamaskus naSamaria
1Omuwa okwa lombwele ndje a ti: “Kutha oshipelende oshinene, u nyolele mo oondanda dha tonata: Maher-Shalal-Hash-Bas. 2Kutha aantu yaali aainekelwa, omuyambi Uria naSakaria yaJerebekia, ya ninge oonzapo dhandje.”
3Mukadhandje okwa ningi omusimba. Sho a vala okamati, Omuwa okwa lombwele ndje a ti: “Mu luka Maher-Shalal-Hash-Bas. 4Okamati manga inaaka tseya okutumbula tate nenge meme, uuyamba waDamaskus auhe niihakanwa ayihe yaSamaria otayi yiwa nayo komukwaniilwa gwaAssur.”
Siloa naEufrat
5Omuwa okwa lombwele ndje ishewe a ti: 6“Aantu mbaka sho ya dhini omeya gomokalonga Siloa haga tondoka kashona, notaa kakama koshipala shomukwaniilwa Rezin noshomukwaniilwa Peka, 7ongame, Omuwa, tandi ka tala ko omupangeli gwaAssur nomatangakwiita ge agehe, a ponokele Juda. Otaa ka matuka ya fa omeya gefundja lyomulonga gwEufrat taga kungulukile kominkulo dhagwo adhihe. 8Otaa ka kungulula po Juda ngefundja tali tsu komapepe e tali siikile ayihe. Otaa ka halakana nevi alihe. Kalunga na kale pamwe natse!”
9Pwidhukeni, ne iigwana, ihe otamu ka sindika! Pulakeneni, ne ooha dhuuyuni: Ihomatekeleni iita, ihe otamu ka dhengwa! Eeno, ilongekidheni, ihe otamu ka sindika! 10Pangeleni oompangela, ihe itamu tompola sha. Uvathaneni, ihe itashi tsakanithwa, oshoka Kalunga oku li pamwe natse.
Omuwa ta londodha omuhunganeki
11Omuwa okwa londodha ndje noonkondo dhe adhihe, ndaa ende nondjila yoshigwana shika. Okwa ti: 12“Ino zimina shoka oshigwana shika tashi ti shi longa, ngoye ino tila iinima mbyoka hashi yi tila. Ino kwatwa kehaluko. 13Ngame Omuwa Omunankondoawike, ngame omuyapuki, ongame awike u na okutila nokuhalukila. 14Omoluuyapuki wandje uutilithi onda fa emanya ndyoka aantu tayi ipumu ko; onda fa omwigo tagu yulu aantu yomiilongo Juda naIsrael nAajerusalem. 15Oyendji otaa ka tantala, otaa ka gwila po notaa ka nyanyulwa. Otaa ka yulwa komwigo.”
Elondodho kaapuli yaathithi
16Onda hala okupungula nawa elondodho ndika lya zi kOmuwa nokupatela ompango moomwenyo dhaalongwa yandje. 17Omuwa okwa holama oshigwana she mwene, ihe ngame onde mu inekela nondi na etegameno muye.
18Ongame nguka naanona mbaka Omuwa e ya pe ndje. Omuwa Omunankondoawike, ngoka oshipangelapundi she shi li kondundu Sion, okwe tu tuma tu ninge oontumwalaka dhi na omwenyo kAaisraeli.
19Nge taku tiwa, mu pule elaka kaathithi nokoompulile, mboka haa nongona nohaa dhilomota, omolwashike ando mwaa ka pule elaka kuKalunga keni? Omolwashike moshinima shaanamwenyo mu na okupula elaka kaathithi?
20Ya yamukula u tye: “Pulakeneni shoka Omuwa te mu nongeke. Inamu pulakena koompulile. Shoka tadhi mu lombwele, itashi mu opalele.”
Omasiku omadhigu
21Oshigwana otashi ka endaenda noshilongo, sha tyololoka nosha sa ondjala. Mondjala yasho nomondjahi yasho otashi ka tuka omukwaniilwa gwasho naKalunga kasho. Otashi ligalala sha tala pombanda, 22nenge sha tongolola pevi, ihe itashi mono sha shaa shi uudhigu nomilema, omilema dhi tilitha, moka ya mbolokotithilwa mo.
Currently Selected:
JESAJA 8: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
