JESAJA 3
3
Evundakano muJerusalem
1Oshoka tala, Omuwa Omunankondoawike ota ka kutha Jerusalam naJuda shoka tashi ya kwatha naashoka yi inekela. Ota kutha po iikulya nomeya gawo, 2oofule naakwiita yawo, aatokolihapu naahunganeki yawo, oonganga naakuluntu yawo, 3ooyene yomatanga nomalenga gawo, aagandjindunge noonkulungu dhawo naayanekeli. 4Omuwa oshigwana ote ke shi lelitha kuumatyona, naapwidhi otaye shi pangele. 5Ayehe otaa ka thiminikathana. Aagundjuka otaye ki inomena aakulupe, naantu yaamakaha otaa ka dhina aasimanekwa.
6Esiku onali ya, uuna aakwanezimo taa hogolola gumwe mezimo lyawo e taa ti kuye: “Molwaashoka u na omizalo, ninga omukuluntu gwetu methimbo ndika edhigu.”
7Ihe ngwiyaka ota ka yamukula ta ti: “Hangame nando! Itandi vulu oku mu kwatha. Kandi na iikulya nenge omizalo. Inamu ninga ndje omukuluntu gweni!”
8Eeno, Jerusalem osha pangulwa! Juda otashi teka po! Ashihe shoka taa popi notaa longo, osha tsa ondumbo nOmuwa; otaa hindi Omuwa mwene, noshi li po shi igalala. 9Omeho gawo ga pota otage ya pe ombedhi. Uulunde wawo ohaye u igalaleke ya fa Aasodomu, ihaye u holeke. Oya pangulwa noye shi iyetele.
10Aayuuki otaa ka kala ye na elago, niinima ayihe otayi ya longele uuwanawa. Otaa ka vula okunyanyukilwa iiyimati yiilonga yawo. 11Ihe yaye aalunde! Shoka ya ningile yakwawo, otaa ke shi ningilwa.
12Aaniimaliwa otaa ka thindila aantu yandje pevi, naanangunga yawo taye ya nyokoma.
Aantu yandje, aaleli yeni oye mu tula mohwati, opo mwaa tseye ondjila ndjoka tamu ende nayo.
Omuwa ta tokola aantu ye
13Omuwa okwi ilongekidha a holoke moompangu, ota thikama a pangule aantu ye. 14Omuwa ota fala aakuluntu naawiliki yoshigwana she moompangu. Ota tamanana ta ti: “Omwa yugu po iitsambe yomiviinu, nomagumbo geni ogu udha iinima mwe yi yuga oohepele. 15Kamu na uuthemba wokuthemenena aantu yandje nokukutha po eliko lyoohepele. Ongame Omuwa Omupangeliawike nOmunankondoawike nde dhi popi.”
Elondodho kaakiintu Aajerusalem
16Omuwa ote ti: “Taleni, nkene aakiintu Aajerusalem tayi inomo! Ohaye ende ya yelutha omayulu mombanda. Aluhe ohaa ndengandenga. Ohaa ende okanyaganye e taa kwelengendjitha oongondo dhokomagulu gawo. 17Omolwaashika Omuwa ta menitha aakadhona yomuSion iipena ya ninge omapalu nota holola epenge lyawo.”
18Esiku otali ya, uuna Omuwa ta ka hula aakiintu Aajerusalem ayihe mbyoka haye yi inomene — oongondo dhokomagulu, nuulenga komitse nomoothingo dhawo, 19omagola, uugondo wopiikesho yawo, nomawiiwili; 20omatsilu, uulyenge wopoompando, omapaya ga nyonyombwa, oohanga dhomugwayo gwiizimba, niigegeti; 21uulinga ye u zala kominwe nokomayulu gawo, 22oonguwo dhawo adhihe dhokoshituthi, oondjatha, omalwaakani nuumpunda wiimaliwa; 23uuyitalelo, oonguwo dholiina, iisaali niikayiwa.
24Peha lyokugwaya omugwayo gwa nika nawa otaa ka nika nayi; peha lyepaya otaa zala oombale; peha lyomafufu ga fufulwa nawa otapu ya epalu; peha lyonguwo yoliina otaa zala ehahi; peha lyembweshukilo iiyadhi.
25Aalumentu yomoshilando, eeno tuu, naamboka aalumentwelela aanankondo otaa ka dhipagelwa molugodhi. 26Iiyelo yoshilando otayi ka lila nokutakuma, noshilando sho shene otashi ka kala sha fa omukiintu, omuhulwakadhi a kuutumba mevi.
Currently Selected:
JESAJA 3: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
