HABAKUK 3
3
Egalikano lyaHabakuk
1Ndika olyo egalikano lyomuhunganeki Habakuk:
2Omuwa, ondu uvu iilonga yoye
nondu udha etilo nesimaneko.
Ngashingeyi longa ishewe pethimbo lyetu
iilonga iinene mbyoka ho longo shito.
Kala omunahenda, nonando owa geya.
3Kalunga ote ya ishewe ta ziilile kuEdom;
Kalunga omuyapuki te ya ta ziilile kondundu Paran.
Eadhimo lye otali kuwike egulu,
nombanda yevi oyu udha okuhambelelwa kwe.
4Ote ya mokushela kwolwaadhi;
uuyelele tau gena tau zi miikaha ye,
omo oonkondo dhe dha holekwa.
5Ota tetekelwa kelega
e ta lombwele eso, li mu landule.
6Ngele ta thikama, evi otali kakama;
ngele ta tayima, iigwana otayi dhekweta.
Oondundu dhaaluhe otadhi tandauka,
niikulundundu otayi ongotele,
oondundu ndhoka e endele momathimbo gonale.
7Onda mono oshigwana shaKushan sha tila
noshigwana shaMidian tashi kakama.
8Omuwa, omilonga odho wa geela?
Efuta olyo lye ku hanyeke?
Ongoye wa londo kiikogo;
oshikogo shoshikungulu osha li etemba lyoye,
sho we etele aantu yoye esindano.
9Owi ilongekidha wa lukila uutati,
owa pameka okuumba iikuti.
Oompadhi dhoye otadhi mwakula evi.
10Oondundu sho dhe ku mono, odha kakama;
omeya oga pooka ga zi momawangandjo.
Omeya gokohi yevi oga pupu,
nomakuthikuthi gago oga lundalala.
11Keadhimo lyiikuti yoye tayi tooka
noketayimo lyegonga lyoye tali wema,
etango nomwedhi oya kankama.
12Mondjahi owa taakana evi;
nomuugeyi owa lyatagula iigwana.
13Owa holoka, u hupithe aantu yoye,
u hupithe omukwaniilwa omuhogololwa gwoye.
Ongoye wa lyatele pevi omuwiliki gwaakolokoshi,
naalanduli ye owe ya yonagula po.
14Iikuti yoye oya yaha ondjayi yiita ye,
sho ye ya ongoshikungulu, e tayi tu halakanitha,
otaa yolo ya fa mboka taa hepeke oohepele meholamo.
15Ongoye wa lyatagula efuta nuukambe woye,
nomeya omanene oga tutumika.
16Ondu uvu ayihe mbika nonda tila;
omilungu dhandje odha kakama.
Olutu lwandje olwa thithonoka,
oompadhi dhandje otadhi telagana.
Otandi mwena nda tegelela,
ethimbo li ye,
uuna Kalunga ta geele mboka taye tu ponokele.
17Nonando omikwiyu inadhi ima,
nomiviinu dhaa na omandjembele,
nando omiolivi inadhi ima sha,
nepya inali vala iilya,
nonando oonzi adhihe tadhi si,
niigunda yiimuna oyi li owala,
18otandi nyanyukwa natango nonda panda,
oshoka Omuwa Kalunga oye Omukulili gwandje.
19Omuwa ota pe ndje oonkondo.
Ota koleke oompadhi dhandje,
ndi tondoke ngompundja;
ota gamene ndje,
ngele tandi ende koondundu.
Currently Selected:
HABAKUK 3: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
