GENESIS 5
5
Oluvalo lwaAdam
(1 Ondjal. 1:1-4)
1Mpaka ope na omusholondondo gwoluvalo lwaAdam. (Kalunga sho a shiti aantu, okwe ya shiti ye mu fa. 2Okwe ya shiti omulumentu nomukiintu. Okwe ya laleke nuuyamba e te ya luku “aantu.”) 3Adam sho a gwanitha omimvo 130, okwa vala omumati e mu fa e te mu luku Set. 4Konima yokuvalwa kwaSet, Adam okwa kala nomwenyo omimvo 800 nokwa vala aamati naakadhona. 5Adam okwa si e na omimvo 930.
6Set sho a gwanitha omimvo 105, okwa vala Enos. 7Konima yokuvalwa kwaEnos, Set okwa kala e na omwenyo omimvo 807, nokwa vala aamati naakadhona. 8Set okwa si e na oomvula 912.
9Enos sho a gwanitha omimvo 90, okwa vala Kenan. 10Konima yokuvalwa kwaKenan, Enos okwa kala e na omwenyo omimvo 815, oye nokwa vala aamati naakadhona. 11Enos okwa si e na omimvo 905.
12Kenan sho a gwanitha omimvo 70, okwa vala Mahalalel. 13Konima yokuvalwa kwaMahalalel, Kenan okwa kala e na omwenyo omimvo 840. Oye nokwa vala aamati naakadhona. 14Kenan okwa si e na omimvo 910.
15Mahalalel sho a gwanitha omimvo 65, okwa vala Jared. 16Konima yokuvalwa kwaJared, Mahalalel okwa kala e na omwenyo omimvo 830, oye nokwa vala aamati naakadhona. 17Mahalalel okwa si e na omimvo 895.
18Jared sho a gwanitha omimvo 162, okwa vala Enok. 19Konima yokuvalwa kwaEnok, Jared okwa kala e na omwenyo omimvo 800. Okwa vala aamati naakadhona. 20Jared okwa si e na omimvo 962.
21Enok sho a gwanitha omimvo 65, okwa vala Metusala. 22Konima yokuvalwa kwaMetusala, Enok okwe ende pamwe naKalunga omimvo 300 nokwa vala aamati naakadhona. 23Enok okwa li e na omimvo 365. 24Enok okwa longele Kalunga nokwa kana po, molwaashoka Kalunga e mu kutha po. 25Metusala sho a gwanitha omimvo 187, okwa vala Lamek. 26Konima yokuvalwa kwaLamek, Metusala okwa kala e na omwenyo omimvo 782 nokwa vala aamati naakadhona. 27Metusala okwa si e na omimvo 969.
28Lamek sho a gwanitha omimvo 182, okwa vala omumati 29e ta ti: “Omunona nguka ote tu etele epupalitho netalaleko miilonga nomomaupyakadhi giikaha yetu mevi ndika lya thingwa kuKalunga” e te mu luku Noa. 30Konima yokuvalwa kwaNoa, Lamek okwa kala e na omwenyo omimvo 595 nokwa vala aamati naakadhona. 31Lamek okwa si e na omimvo 777.
32Noa sho a gwanitha omimvo 500, okwa vala Sem, Ham naJafet.
Currently Selected:
GENESIS 5: ONDB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.