ESTER 6
6
Omukwaniilwa ta simaneke Mordekai
1Uusiku tuu mboka omukwaniilwa okwa londokwa koomposi, nokwa gandja elaka, ondjokonona yoshilongo yi etwe kuye, e yi leshelwe. 2Moshitopolwa sha leshwa omwa li wo ehokololo, nkene Mordekai a holola Bigtan naTeresh, aathonwantu yaali aalangeli yoposheelo, mboka ya li ya tsile omukwaniilwa ondumbo, ye mu dhipage ofuthi. 3Omukwaniilwa okwa pula a ti: “Mordekai okwa simanekwa nokwa futwa ngiini, sho a ningi ngeyi?”
Aapiya oya yamukula ya ti: “Ina pewa nando osha.”
4Omukwaniilwa okwa pula a ti: “Olye e li kehale?”
Haman okwa li opo a thiki kehale lyopondje, opo a indile omukwaniilwa, a endjeleleke Mordekai kohake ya dhikwa nale nokuli. 5Aapiya oya yamukula: “Haman oko e li.”
Omukwaniilwa okwa ti: “Ne ye mo.”
6Haman sho e ya mo, omukwaniilwa okwe mu pula: “Omuntu ngoka omukwaniilwa a hala oku mu simaneka unene, oku na okuningwa ngiini?”
Haman okwi idhiladhilile: “Olye mbela omukwaniilwa a hala oku mu simaneka? Ndishi ongame.”
7-8Haman okwa yamukula omukwaniilwa ta ti: “Omulumentu ngoka omukwaniilwa a hala oku mu simaneka, na etelwe oonguwo dhuukwaniilwa, ndhoka wa li wa zala ngoye mwene. Na etelwe wo okakambe haka kayilwa komukwaniilwa noka zalekwa uulenga wopaukwaniilwa komutse.” 9Nena lombwela elenga limwe lya simana, li zaleke omulumentu ngoka oonguwo ndhoka noku mu enditha nehalandjandja lyoshilando a londa kokakambe. Elenga lya simana nali igidhe li tye: “Omulumentu ngoka ta simanekwa komukwaniilwa, osho ta ningwa ngeyi.”
10Nena omukwaniilwa okwa ti kuHaman: “Endelela, u ka kuthe oonguwo nokakambe, ngaashi wa ti. Esimaneko ndika nali ningilwe Mordekai Omujuda, ngoka a kuutumba peelo lyuuwa. Mu ningila naanaa ashihe shoka wa popi.”
11Haman okwa kutha oonguwo nokakambe e ta zaleke Mordekai. Mordekai okwa kayile okakambe, naHaman okwe mu enditha nehalandjandja lyoshilando ti igidha, sho taa ende ta ti: “Omulumentu ngoka ta simanekwa komukwaniilwa, osho ta ningwa ngeyi!”
12Mordekai okwa shuna keelo lyuuwa, manga Haman ta yi kegumbo nokweendelela a siikila oshipala she a tyololoka. 13Okwa lombwele omukadhi nookuume ke ashihe shoka she mu ningilwa. Nena omukadhi nookuume ke aanandunge oya ti kuye: “Eyonuko lyoye olya tameke montaneho yaMordekai. Oye Omujuda, nangoye ito vulu oku mu sinda. Ote ke ku sinda lela.”
Haman ta dhipagwa
14Manga ya li taa kundathana, aathonwantu yomukwaniilwa oye ya noya fala Haman neendelelo komatelekela.
Currently Selected:
ESTER 6: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
