IILONGA 27
27
Paulus ta yi kuRoma nosikepa
1Ano sho pwa tokolwa kutya otu na okuya kuItalia nosikepa, Paulus noonkwatwa yalwe ooyakwawo oya gandjwa miikaha yomukuluntu gwaakwiita gumwe, edhina lye Julius. Oye okwa li omukuluntu gwetanga lyaakwiita yAaroma ndyoka haku tiwa “Etanga lyomupangeli Omuroma”. 2Nena otse otwa londo mosikepa yokuAdramiti, ndjoka ya li pokuthikama yu uka pomahelulilo ngoka ge li komunkulo gwefuta moshitopolwa shaAsia, notwa yi ihe. Aristarkus Omumakedonia gwokuTessalonika okwa yi pamwe natse. 3Esiku lya landula okwa thiki kuSidon. Julius okwa li e na ombili naPaulus nokwe mu pe epitikilo oku ka talela po ookuume, opo ye mu pe shoka te shi pumbwa.
4Okuza muSidon otwa tsikile olweendo nosikepa, ihe molwaasho ombepo oya li tayi tu dhenge noonkondo moshipala, otwa gama kombinga yontuntu yaKipro, opo tu henuke ombepo ndjoka onene. 5Ano sho twa taaguluka efuta ndyoka lya gama komunkulo gwaKilikia naPamfilia, otwa thiki kuMira, oshilando shomuLikia. 6Hwiyaka omukuluntu gwaakwiita okwa mono ko osikepa tayi zi kuAleksandria yu uka kuItalia nokwe tu lombwele, tu londe muyo.
7Otse otwe ende kashona nakashona nuudhigu uunene, sigo lwahugunina otwa li ontega noshilando shedhina Knidos. Ihe ombepo sho ya li tayi tu dhenge moshipala, otwa nyengwa okuya koshilando shoka. Onkee otwa pitilile oshimpoko shaSalmoni notwe ya popepi nontuntu yaKreta kombinga ndjoka ihaaku pepe ombepo ondhigu. 8Otwe ende twi igameka popepi nomunkulo notwa thiki nuudhigu uunene peha ndyoka hali ithanwa “Omatulilo omawanawa”, popepi noshilando shaLasea.
9Opwa adhika pwa pita ethimbo ele, nosha ningi oshidhigu kutse okutsikila olweendo, oshoka esiku enene lyehanganitho nalyo wo olya adhika lya pita nale. Onkee Paulus okwe ya londodha a ti: 10“Aalumentu ne, ondi wete kutya olweendo lwetu okuza mpaka otalu ka kala oludhigu nolu udha iiponga oyindji. Nokuli osikepa yo yene nofulaha yayo otayi ka mona oshiponga oshinene, ihe noomwenyo dhaantu otadhi ka kana wo.” 11Ihe omukuluntu gwaakwiita okwa li i inekela oohapu dhomuwiliki nodhamwene gwosikepa, onkee ina zimina shoka sha tiwa kuPaulus. 12Nokuli ehelulilo ndyoka kalya li unene ewanawa okukalwa pethimbo lyokufu. Onkee oyendji yomaalumentu mboka ya li mosikepa, oya li yu uvite kutya ihwepo ashike, yi idhenge mefuta yo ya kambadhale ya tale, ngele taa thiki kuFoiniks. Ndika olyo ehelulilo lyomuKreta lya taalela uuningininombugantu nuuningininombangalantu, moka ya li taa vulu okukala mo pokufu.
Oshikungulu mefuta
13Ombepo oya tameke ihe okupepa kashona tayi ziilile lwokuumbugantu. Nena aalumentu oya dhiladhila kutya otaa vulu okuthika hoka ya hala okuya. Onkee oya hili mo ohangela noye ende ya kunkula nomunkulo gwontuntu yaKreta, ngaashi tashi vulika. 14Ihe mbalambala ombepo onenenene, ndjoka hayi ithanwa. “Oshikungulu shokuuzilombangalantu”, oya tukuluka tayi ziilile kontuntu. 15Oyo oya yakele osikepa, onkee sho twa nyengwa oku yi ukililitha mokati kombepo, otwa gu mo ngomondhikwa, notwe etha osikepa, yi falafalwe kombepo. 16Opo ihe otwa mono epopilo lyasha, sho twa thiki kuumbugantu wokantuntu kedhina Kauda. Oko hoka twa vulu okuninga nawa okawato komosikepa, ihe otwe shi ningi nuudhigu uunene. 17Nena oyo oye ka hilile ihe mosikepa noya manga osikepa noongodhi. Ihe oya li ya tila kutya pamwe osikepa otayi ki idhenga kiituntu yokohi yomeya pomunkulo gwaLibia, onkee oya kulukitha othayila noye etha osikepa, yi endithwe kombepo. 18Oshikungulu shika oshinene osha tsikile oku tu dhungadhunga noonkondo, onkee esiku lya landula oya tameke okuumbila ofulaha mefuta, 19nesiku etitatu lya landula ko oyu umbu mo niikaha yawo yene iilongitho yosikepa. 20Otwa kala omasiku ogendji inaatu mona nande etango nenge oonyothi, nombepo oya tsikile okupepa noonkondo. Lwahugunina otwa kanitha etegameno alihe lyokukala nomwenyo.
21Ano aantu sho ya ningi omasiku ogendji inaaya lya sha, Paulus okwa thikama mokati kawo nokwe ya lombwele e ta ti: “Aalumentu ne, ando omwa li mwa taamba epukululo lyandje ne inamu za mo muKreta, ando omwa vulu okuyanda uupyakadhi mbuka auhe noshiponga shika. 22Ihe ngashingeyi otandi mu indile, mu ikolelele. Oshoka kape na nando ogumwe gwomune ta kanitha omwenyo gwe; osikepa oyo ayike tayi ka yonuka po. 23Oshoka uusiku mbuka omuyengeli gwaKalunga kandje, Kalunga ngoka handi mu longele, okwa li i ihololele ndje 24nokwa lombwele ndje a ti: ‘Paulus, ino tila! Ongoye ou na oku ka thikama koshipala shomupangeli Omuroma. Nokuli omolwoye Kalunga ota ka hupitha ayehe mboka ye li pamwe nangoye mosikepa.’ 25Onkee ano aalumentu ne, ikoleleleni, oshoka ngame ondi inekela lela kutya Kalunga ota ka tsakanitha naanaa shoka e shi lombwele ndje. 26Tseni otatu ka falafalwa kombepo sigo okomunkulo gwontuntu yontumba.”
27Uusiku wesiku etimulongo netine otwa adhika tatu alaalithwa natango kombepo mEfuta lyopokati. Ihe lwopokati kuusiku aanasikepa oya dhimbulula kutya otu li popepi nevi. 28Onkee oya kulukitha ongodhi yoshumbu noya mono kutya uule womeya gefuta owa li u thike poometa omilongo ne, naasho ye shi ningi ishewe konima yokathimbo, oya mona kutya uule womeya ou thike poometa omilongo ndatu. 29Oyo oya li ya tila kutya pamwe osikepa otayi ki idhenga komamanya gokohi yomeya, onkee oya kulukitha oohangela ne dhokosindo yosikepa noya li ya hala nokuhalelela, etango li pite. 30Nena aanasikepa oya kambadhala okuza mo mosikepa, yi ihupithe. Oya tula okawato mefuta noya shendjeleke yakwawo ongotaa umbile oohangela dhokondete yosikepa mefuta. 31Ihe Paulus okwa lombwele omukuluntu gwaakwiita naakwiita a ti: “Aanasikepa mbaka ngele itaa kala mosikepa, nena kamu na nando ompito yokuhupa.” 32Nena aakwiita oya tete oongodhi ndhoka dha manga okawato noye ke etha, ka ye nefuta.
33Ano etango sho lya li pokupita, Paulus okwa kumagidha aantu ayehe, ya lye, a ti: “Ngashingeyi omwa ningi omasiku omulongo nagane mwa tegelela, ku tye hwepo, ne inamu makela nando osha. 34Onkee ano otandi mu indile, mu lye sha, oshoka iikulya otayi mu koleke, mu wape okuhupa. Oshoka one itamu ka adhika nando okoshiponga shasha.” 35Ano Paulus sho a popi ngeyi, okwa kutha oshikwiila, a hambelele Kalunga e te shi pambula nokwa tameke ihe okulya. 36Nena oyo ayehe oyi itsu omukumo noya tameke okulya. 37Aantu atuhe mboka twa li mosikepa, otwa li omathele gaali nomilongo heyali naantu yahamano. 38Ano aantu sho ya kuta, oya tameke ihe okweekelahi iilya mefuta, opo osikepa yi ninge ompu.
Osikepa tayi teka
39Etango sho lya piti, aanasikepa oya mono evi, ihe inaa tseya edhina lyeha ndyoka. Oyo oya dhimbulula okatulilo ke na omunkulo gwo opala noya tokola ihe, ya kambadhale okuukitha osikepa kokatulilo hoka, ngele otashi vulika. 40Onkee oya tete oongodhi ndhoka dha manga oohangela e taye dhi gwithile mefuta. Pethimbo olyo tuu ndyoka oya dhitula oongodhi ndhoka dha kwata iihingitho. Opo ihe oya yelutha pombanda othayila yondete noyu ukitha osikepa lwokomunkulo. 41Ihe osikepa oyi idhenge moshituntu shevi kohi yomeya e tayi tyuulile. Ondete yosikepa oya patekene noinayi vula we okwiinyenga, ihe osindo oya teyagulwa po komakuthikuthi.
42Nena aakwiita oya dhiladhila okudhipaga oonkwatwa ayehe, opo dhaa wape okuya ontuku tadhi yogo ontente. 43Ihe omukuluntu gwaakwiita sho a hala okuhupitha Paulus, okwe ya keelele kaaye shi ninge. Oye okwa lombwele ihe aalumentu ayehe mboka ye shi kuyoga ontente kutya naa nukile tango mefuta e taa yogo, sigo taa thiki komunkulo kevi. 44Nena mboka ya hupu ko, ye ya landule ihe taa lyatelele kiipilangi nenge kiitekela yosikepa. Osho ngeyi tse atuhe otwa hupu notwa thiki nawa kevi.
Currently Selected:
IILONGA 27: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.