IILONGA 24

Paulus ta tamanekwa kAajuda

1Sho pwa piti omasiku gatano, omuyambimukuluntu Ananias okwa yi kuKesarea pamwe naakuluntu yamwe nomunongompango, edhina lye Tertullus. Oyo oye ya koshipala shomuleli Feliks, ya tamaneke Paulus. 2Paulus sho e etwa mo, Tertullus okwa tameke okupa Paulus uusama a ti: “Omusimanekwa Feliks! Sho wa lele noondunge ethimbo ele, oshe tu pe ombili. Omalunduluko ogendji omawanawa moluuwanawa woshilongo shetu oga ningwa. 3Tse ohatu hempulula aluhe naakuhe oshinima shika notatu ku pandula noonkondo. 4Ihe inandi hala unene okumana po ethimbo lyoye, onkee otandi ku indile, u idhidhimike okupulakena ehokololo lyetu pafupi. 5Omulumentu nguka otwe mu mono kutya omupiyaganeki. Oye ota piyaganeke Aajuda muuyuni auhe noye omuwiliki gwoshimpaga shAanasareti. 6Oye okwa li ta kambadhala nokuli okunyateka otempeli yetu, onkee otwe mu kwata. [Otwa li twa hala oku mu pangula pampango yetu yene, 7ihe omuwiliki omukuluntu gwaakwiita, Lisias, okwe ya po nokwe tu mu yugu koonkondo. 8Nena Lisias okwe tu lombwele ihe kutya natu ye, tu mu tamanekele koshipala shoye.] Ngele wa pula omulumentu nguka, nena oto ka vula okutseya iinima ayihe mbyoka tatu yi mu tamanekele.” 9Aajuda oya koleke wo kutya iinima mbyoka ayihe oyoshili.

Paulus ti ipopile koshipala shaFeliks

10Opo ihe omuleli okwa pe Paulus ompito yokupopya, Paulus okwa popi a ti:

“Onda tseya kutya owa kala omupangeli moshigwana shika oomvula odhindji, onkee onda nyanyukwa, sho ndi na ompito okwiipopila koshipala shoye. 11Ngaashi naanaa ngoye mwene to vulu oku shi tseya, opwa piti ashike omasiku omulongo nagaali, ngame sho nda yile kuJerusalem oku ka galikana Kalunga motempeli. 12Aajuda inaa mona ndje nando tandi ludhike nomuntu motempeli. Osho wo inaa mona ndje tandi tsu aantu omaminimini moosinagoga nenge peha lilwe lyontumba moshilando. 13Nokuli itaa vulu nando oku ku pa etompelo lyiinima mbyoka taa tamanekele ndje. 14Ihe otandi hempulula mpaka koshipala shoye: Ngame ohandi longele Kalunga kootate nokulandula ondjila ndjika taa ti kutya oya puka. Ondi itaala wo iinima ayihe mbyoka ya nyolwa mompango yaMoses nomomambo gaahunganeki. 15Ondi na wo etegameno limwe pamwe nayo kutya Kalunga ota ka yumudha aantu ayehe kuusi, naawanawa naawinayi. 16Onkee ohandi kambadhala aluhe okukala ndi na eiyuvo lya yela koshipala shaKalunga noshaantu.

17“Ano sho nda ningi oomvula odhindji ndaa mo muJerusalem, onda yile ko okufaalela aantu yoshigwana shetu omagano giimaliwa nokuyambela Kalunga omayambo. 18Ano manga nda li tandi longo iilonga mbika, oyi itsu ndje motempeli, nda adhika opo nda mana ko omasiku geiyogo. Kapwa li nando ongundu yaantu noinapu holoka epiyagano lyasha. 19Opwa li ashike Aajuda yamwe ya za kuAsia. Naye ye yo yene mpaka koshipala shoye, ye ku hokololele, ngele ondi na uusama washa. 20Nongele pamwe aalumentu mbaka ye li mpaka, oya monene ndje ondjo yasha, sho nda li tandi ipopile koshipala shawo moshigongi shaatokoli, nena naye shi popye. 21Nenge pamwe osho ndi igidhile, manga nda thikama koshipala shawo nda ti: ‘One otamu pangula ndje, sho ndi itaala kutya aasi otaa ka yumudhwa.’ ”

22Ihe Feliks sho a li a tseya oshindji kombinga yondjila yOmuwa, okwa mweneke manga iihokolola. Oye okwa lombwele Aajuda ta ti: “Otandi ka pulakena ishewe oohapu dheni, uuna Lisias, omuwiliki omukuluntu gwaakwiita, te ke ya.” 23Opo ihe okwa lombwele omukuluntu gwaakwiita ngoka ha tonatele Paulus, kutya na tsikile natango oku mu langela, ihe ne mu pe emanguluko lyontumba, opo nookuume ke ya mone ompito yoku mu yakula moompumbwe dhe.

Paulus koshipala shaFeliks naDrusila

24Omasiku gamwe sho ga piti po, Feliks okwe ya pamwe nomukadhi Drusila, ngoka a li Omujuda. Feliks okwi ithana Paulus nokwe mu pulakene, sho ta hokolola okwiitaala Jesus Kristus shoka taku ti. 25Ihe Paulus sho a tsikile okupopya kombinga yuuwanawa, eikwatonawa nesiku lyepangulo ndyoka tali ya, Feliks okwa haluka nokwa ti kuye: “Sha gwana manga, otandi ke ku ithana ishewe, ngele nda mono ethimbo.” 26Ihe kombinga onkwawo okwa li ta dhiladhila kutya pamwe Paulus ote mu pe iimaliwa, onkee okwa kala he mu ithana olwindji, a popye naye.

27Oomvula mbali sho dha piti po, Porkius Festus okwa ningi omuleli gwoshitopolwa shoka peha lyaFeliks. Ano Feliks sho a li a hala okuhokiwa kAajuda, okwa ethele Paulus mondholongo.

Currently Selected:

IILONGA 24: ONDB

Highlight

Copy