2 SAMUEL 24
24
David ta yalula oshigwana
1Ondjahi yOmuwa oya hwamene Israel ishewe. Okwa hongakanitha David, e ya etele oshiponga. Omuwa okwa ti kuye: “Inda, u ka yalule Aaisraeli nAajuda.” 2Nena David okwa lombwele Joab, ondjayi yetangakwiita lye ta ti: “Inda nomalenga goye komazimo agehe gaIsrael okuza kooha dhoshilongo sigo okooha oonkwawo, u yalule oshigwana. Onda hala okutseya omwaalu gwasho.”
3Ihe Joab okwa yamukula omukwaniilwa a ti: “Nkeyama, Omuwa Kalunga koye ni indjipaleke Aaisraeli lwethele ye vule mpo ye thike ngashingeyi, nangoye kala u na omwenyo, u shi mone. Ndele omolwashike wa hala okuninga ngawo?” 4Ihe omukwaniilwa okwa vulikitha Joab nomalenga ge; oya zi koshipala she e taa yi, ya ka yalule Aaisraeli.
5Oya tokola Jordan e taa yungu ontanda kuumbugantu waAroer, oshilando shopokati kolusilu moshitopolwa shaGad. Okuza mpoka oyu uka kuumbangalantu kuJaser, 6nokuGilead nokuKadesh, moshitopolwa shAaheti. Nena oya yi kuDan, nokuza kuDan oya yi kuuninginino kuSidon. 7Opo ihe oya yi kuumbugantu koshilandohote Tiro nokiilando ayihe yAahevi nAakaanana, nohugunina okuBeersheba, muumbugantu waJuda. 8Konima yoomwedhi omugoyi nomasiku omilongo mbali oya galukile kuJerusalem, sho ya mana okweenda oshilongo ashihe. 9Oya hokololele omukwaniilwa omwaalu gwaantu mboka taa vulu okuya kiita; aakwiita 800 000 muIsrael na 500 000 muJuda.
10Ihe konima David sho a yalulitha aantu, eiyuvo lye olye mu hepeke nokwa ti kOmuwa: “Onda yono nayi kungoye, sho nda ningi ngeyi. Kwatha ndje u dhimine ndje po. Onda ningi uugoya.”
11-12Omuwa okwa lombwele Gad, omuhunganeki gwaDavid, ta ti: “Inda, u ka lombwele David, otandi mu pe oompito ndatu, a hogolole po yimwe. Otandi ka gwanitha ndjoka ta hogolola.” Ongula yanakwasha, konima David sho a penduka, 13Gad okwa yi kuye, te mu hokololele shoka Omuwa a popi e ta pula ta ti: “Oshike tashi kala po? Omimvo ndatu dhondjala yekomba moshilongo shoye, nenge oomwedhi ndatu hamu yaayaa ontuku aatondi yeni, nenge omasiku gatatu gelega mevi lyeni? Shi dhiladhila nduno, u lombwele ndje shoka tandi ka lombwela Omuwa.”
14David okwa yamukula a ti: “Ngame ondi li muudhigu uunene! Ihe ine hala ndi geelwe kaantu. Omuwa oye mwene ne tu geele, oshoka oye omunahenda.” 15Osho ngaaka Omuwa okwa tumu elega muIsrael lya kala okuza ongula ndjoka ethimbo ndyoka a hogolola. Okuza kooha dhoshilongo sigo kooha oonkwawo Aaisraeli omayuvi omilongo heyali oya si. 16Omuyengeli gwOmuwa sho a li pokuhanagulapo Jerusalem, Omuwa okwa geyuluka e ta ti komuyengeli ngoka a li te ya dhipaga: “Opuwo nduno! Sha gwana!” Omuyengeli okwa li polupale lwaArauna Omuyebusi.
17David okwa mono omuyengeli ngoka a li ta dhipaga aantu e ta ti kOmuwa: “Ngame, ongame omusama. Ongame nda puka. Aantu mbaka oya ningi shike? Geela ndje negumbo lyandje.”
18Esiku olyo tuu ndyoka Gad okwa yi kuDavid e ta ti kuye: “Inda kolupale lwaArauna, u tungile Omuwa oshiyambelo.” 19David okwa vulika kOmuwa e ta yi, ngaashi Gad e mu lombwele. 20Arauna sho a mono omukwaniilwa nomalenga ge taye ya kuye, okwa yi kuye e ti inyongamene kuye 21e ta pula ta ti: “Nkeyama, oshike we ya mpano?”
David okwa yamukula a ti: “Onde ya, ndi lande po olupale lwoye nokutungila Omuwa oshiyambelo, opo elega li pite po.”
22Arauna okwa ti: “Nkeyama, lu kutha po, u yambele Omuwa, ngaashi wa hala. Oondumetana odho ndhika, u dhi fikile omayambo koshiyambelo, oondjoko dhadho niiyungulitho oyo mbika, yi longitha iitemitho.” 23Arauna okwa gandja ayihe mbika komukwaniilwa e ta ti kuye: “Omuwa Kalunga koye na taambe omayambo goye.”
24Ihe omukwaniilwa okwa yamukula a ti: “Aawe, otandi yi futu. Itandi yambele Omuwa Kalunga kandje omafikilondjambo inaaga pula ndje sha.” Oye nokwa landa olupale noondumetana iimaliwa iisiliveli omilongo ntano. 25Nena okwa tungile Omuwa oshiyambelo e ta yamba omafikilondjambo nomakwatathanondjambo. Omuwa okwa yamukula omagalikano ge, nelega olya kodha muIsrael.
Currently Selected:
2 SAMUEL 24: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
