2 SAMUEL 21
21
Oluvalo lwaSaul talu dhipagwa
1Muuyuni waDavid okwa li ondjala yekomba ya kala omimvo ndatu. David okwa pula Omuwa molwayo, Omuwa nokwa ti: “Saul nezimo lye oyo ye na oshipwe shedhipago; okwa dhipagele Aagibeon.” 2(Aagibeon kaya li Aaisraeli; oya li okangundu okashona kAayamori mboka ya li yu uvanekelwa kAaisraeli, ye ya hupithe, ihe Saul okwa kambadhala oku ya komba po molwokuladhipalela Israel naJuda.) 3David okwi ithana Aagibeon nokwe ya pula ta ti: “Nandi mu ninge ngiini? Onda hala okwoopaleka epuko ndyoka mwe li ningilwa, opo mu yambeke oshigwana shOmuwa.”
4Oya yamukula ya ti: “Oontamanana dhetu naSaul nezimo lye itadhi vulu okwoopalekwa noshisiliveli nenge noshingoli, tse inatu hala wo okudhipaga Omuisraeli nando gumwe.”
David okwa pula a ti: “Nena nduno otamu dhiladhila, ndi mu ningile shike?”
5Oya yamukula ya ti: “Saul okwa li a hala e tu hanagule po, pwaa kale nando ogumwe gwetu e na omwenyo shaa mpoka muIsrael. 6Onkee tu pa mo aalumentu yaheyali yomoluvalo lwe, notatu ke ya endjeleleka montaneho yOmuwa puGibea, omukunda gwaSaul, omukwaniilwa a hogololwa kOmuwa.”
Omukwaniilwa David okwa yamukula a ti: “Otandi ye mu pe.”
7Ihe molweuvaneko eyapuki ndyoka yu uvanekelathana naJonatan, David okwa hupitha omuna gwaJonatan Mefiboshet, omutekulu gwaSaul.
8Ihe okwa kutha Armoni naMefiboshet, aamati yaali mboka Rizpa yaAja e ya valele Saul; okwa kutha wo aamati yatano yomuna gwaSaul Merab, mboka a valele Adriel yaBarsillai gwokuMehola. 9David okwe ya gandja kAagibeon, mboka ye ya endjeleleke kondundu koshipala shOmuwa; ayehe yaheyali oya sile pamwe. Oya dhipagwa petameko lyomasiku gotango gokuteya, petameko lyeteyo lyiishokelya.
10Nena ohonda yaSaul Rizpa yaAja oya yala iinguma yomahahi pemanya mpoka pwa li omidhimba; oya kala hoka okuza ketameko lyokuteya, sigo omvula ya loko iipongo. Inayi pitika oondhila dhi lambele puyo omutenya nenge iilyani yi yi gume uusiku.
11David sho u uvu shoka Rizpa yaAja a ningi, 12okwa yi e ta kutha ko iipongo yaSaul noyomwana Jonatan kAajabesh muGilead. (Oye yi yakele kekuma lyoshilando muBetshan, nkoka Aafilisti ya li ya tsilika omidhimba, uuna ya dhipagele Saul kondundu Gilboa.) 13David okwa kutha iipongo yaSaul naJonatan nokwa gongele wo iipongo yaalumentu yaheyali mboka ya li ye endjelelekwa. 14Nena oya fumvike iipongo yaSaul noyaJonatan mombila yaKish, he yaSaul, muZela moshilongo shaBenjamin, ya gwanitha ayihe mbyoka omukwaniilwa a popi. Konima yaambika Kalunga okwa yamukula omagalikano gawo e ta sile evi ohenda.
Olugodhi naalefule yAafilisti
(1 Ondjal. 20:4-8)
15Okwa li wo ku na iita yilwe pokati kAafilisti naIsrael. David okwa yi naantu ye, ya kondjithe Aafilisti. Metifa lyolugodhi David okwe etwa mo komvulwe. 16Omulefule, edhina lye Ishbibenob, ngoka a li a humbata egonga lyoshikushu lyuudhigu wookilohalama ndatu netata nokwa li a zala egongamwele epe, okwa dhiladhila kutya ota dhipaga David. 17Ihe Abisai, omuna gwaZeruia, okwe ya a popile David. Okwa ponokele omulefule e te mu dhipaga. Nena aantu yaDavid oyu uvaneke kutya ita lyata we kiita. Oya ti: “Ongoye etegameno lyaIsrael; tse inatu hala, tu ku kanithe.”
18Konima yaambika opwa li olugodhi nAafilisti puGob; molugodhi nduka Sibbekai Omuhusha okwa dhipaga omulefule edhina lye Saf.
19Okwa li ishewe olugodhi olukwawo nAafilisti puGob. Nena Elhanan yaJair gwokuBetlehem okwa dhipaga Goliat Omugat, ngoka a li e na egonga li na oshikwatelo shi thike pondisimbumu.
20Okwa li ishewe olugodhi olukwawo muGat, moka mwa li omulefule e hole okukondja. Okwa li e na ominwe oohamano kiikaha nokoompadhi. 21Sho a sheke Israel, Jonatan, omuna gwamumwayina gwaDavid, edhina lye Shamma, okwe mu dhipaga.
22Ayehe mbaka yane oya li oluvalo lwaalefule yokuGat, noya li ya dhipagwa po kaantu yaDavid.
Currently Selected:
2 SAMUEL 21: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
