2 ONDJALULO 4
4
Iilongitho yotempeli
(1 Aak. 7:23-51)
1Omukwaniilwa Salomo okwa hambulitha oshiyambelo shoshikushu shoombinemeta 9 noometa 4,5 muule. 2Okwa hambulitha wo ondama yoshikushu ya ngolongwa yoometa 2,2 mevi, oometa 4,4 montaakano noometa 13,2 momukunduluko. 3Koongenge dhondama okwa li omikweyo mbali dhuulenga, gumwe pombanda yomukwawo. Uulenga mbuka owa li molupe lwoontsezi, ndhoka dha li dha tholomwa moshikushu pamwe nondama. 4Ondama oya tentekwa koontsezi omulongo nambali dhoshikushu, ndhoka dha pilamenathana: ndatu dha taalela kuumbangalantu, ndatu okuuninginino, ndatu okuumbugantu nandatu okuuzilo. 5Oongenge dhondama odha li dhi na uupapi wuunene u thike poomilimeta 75. Ongenge yayo oya li ya fa yekopi, ya tivulilwa kondje ya fa ongala ya sheneka. Ondama otayi gwana konyala oolita omayuvi gahamano. 6Oya hambula wo oombaalitha omulongo, ntano odhokutulwa kuumbugantu wotempeli nantano okuumbangalantu. Odha li hadhi longithwa okuyoga iitopolwa yiimuna mbyoka ya lungunithwa yi ninge omafikilondjambo. Omeya gomondama oga li haga iyogwa kaayambi.
7-8Okwa hambulitha iihukikwanyeka omulongo pamautho ngoka yi na okuhambulwa, niitaafula omulongo, nokwe yi tula mela enene motempeli, iihukikwanyeka itano niitaafula itano okombinga kehe. Okwa hambulitha wo iiyaha yoshingoli ethele.
9Okwa tungitha ehale lyaayambi nehale enene. Omiyelo dhopokati komahale odha li dha kolongithwa oshikushu. 10Ondama oya li mokolonela yokuuzilombugantu wotempeli.
11-16Huram okwa longekidha wo oombiga, iihupulo niiyaha. Okwa tsakanitha iilonga mbyoka a li e na okulongela omukwaniilwa Salomo omolwotempeli yOmuwa:
Oongudhi mbali
Iipaka iyali koombando dhoongundhi
Uulenga wa tatwa koshipaka kehe
Iiyimati yomugranati yoshikushu omathele gane ya kunduka oshipaka kehe momikweyo mbali, kehe gumwe ethele limwe
Uutemba omulongo
Oombaalitha omulongo
Ondama
Oontsezi omulongo nambali dha humbata ondama
Oombiga, iihupulo noofoloko. Omuhambudhi onkulungu Huram okwa longekidhile omukwaniilwa Salomo iikwaniipangitho mbika ayihe yoshikushu sha yelithwa, yi longithwe motempeli yOmuwa.
17Omukwaniilwa okwe yi tholomitha ayihe moshitholomeno pokati kaSukkot naZereda molusilu lwaJordan. 18linima mbika oya li oyindji noonkondo nokape na ngoka a yeleke owindji woshikushu shoka sha longithwa.
19Omukwaniilwa Salomo okwa hambulithile otempeli iiyakulitho yilwe wo: oshiyambelo, niitaafula yokutenteka iikwiila iiyapuki; 20iihukikwanyeka noolamba dhoshingolilela, ndhoka dha li hadhi minikile komeho gEhala lyUuyapukielela ngaashi sha sheywa; 21uulenga woongala, oolamba niikonde yokutetitha uulapi woolamba; 22iimbele, iiyaha, omatemba, iitsininitho niikangwa yomakala. Ayihe mbika oya ningwa moshingolilela. Omiyelo dhotempeli nomiyelo dhEhala lyUuyapukielela odha li dha kolongithwa oshingoli.
Currently Selected:
2 ONDJALULO 4: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.