Гъэсэпэтхыдэхэр 6
6
ЕХАНЭ ӀЫХЬЭ
Щэнгъасэ псалъэ зэмылӀэужьыгъуэхэр
1Зыгуэрым и цӀэкӀэ шэсыпӀэ уиувамэ,
нэгъуэщӀым и щӀыхуэ птыжыну хьэкъ
зыщыпщӀыжамэ,
2псалъэр пӀэщӀэкӀагъэххэщи,
уи жыӀи теубыда ухъуащи,
3зи ӀэмыщӀэ уихуам, си щӀалэ,
зыкъыӀэщӀэпхын щхьэкӀэ пщӀэн хуейр мыращ:
еужьэрэкӀ, уи щхьэр хуэгъэтӀылъ,
елъэӀу, лъэгуажьэмыщхьэ зыхуигъауи,
4зумыгъыӀэ гупсэхугъуэ зи цӀэ,
уи напӀи зэтумылъхьэ!
5ЗыкъыӀэщӀэх а Ӏуэхум щакӀуэм ӀэщӀэкӀыжа
бланэм ещхьу,
бзуущэм и бзулъахъэ илъэтыкӀыжа бзум
хуэдэу.
6Еплъыт хъумпӀэцӀэджым, хуэмыху;
кӀэлъыплъыт абы игъэхъей лэжьыгъэм,
и Ӏущыгъэм щыщи къызыхэгъахуэт!
7ИӀэкъым абы унафэщӀи,
кӀэлъыплъакӀуи, Ӏэщхьэтети,
8ауэ гъэмахуэ псом зэрегъэпэщ гъуэмылэр,
и шхыни кърехьэлӀэ гъавэ хыжыгъуэр
икӀыхункӀэ.
9Куэдрэ ухэлъыну, хуэмыху?
Уи жей Ӏувыр сыт щыгъуэ щыптеунур?
10МащӀэу укъыпыжеикӀынщ, мащӀэу ущхьэукъуэнщ,
уи Ӏэр уи щхьэ щӀэдзауэ тӀэкӀу ущылъынщи,
11къыптеуэнщ итӀанэ къулейсызыгъэр
хъунщӀакӀуэм#6:11 Е «хьэулейм». ещхьу,
къыплъэщӀыхьэнщ тхьэмыщкӀагъэри
хъырцыжьым хуэдэу.
12МыхъумыщӀэ-бзаджащӀэр
псалъэпцӀыр кърихьэкӀыурэ мэзекӀуэ,
13ӀупщӀэнапщӀэ ищӀ хуэдэурэ,
и Ӏэ и лъэхэр игъэджэгу хуэдэурэ,
14игу илъ зэпытыр пцӀыщ,
гухэлъу ищӀыр бзаджэщ,
сыт щыгъуи зэныкъуэкъур къыхэзылъхьэр арщ.
15Зэгуэр апхуэдэм бэлыхьлажьаер тепсыхэнущ,
зы напӀэзыпӀэми и лъабжьэр ирихынущ –
къелыпӀи иӀэкъым абы.
16Ӏуэхугъуих и жагъуэщ Тхьэуэ Зиусхьэным,
хэбгъэзыхьмэ, блы ирокъу гущыкӀ зыхуищӀыр:
17пагагъэ зыхэлъ плъэкӀэр,
бзэгу пцӀыӀуэпцӀышэр,
хейм илъ зыгъажэ Ӏэр,
18зи гущӀэ лъапсэм мурад мыгъуэр щызыхъумэр,
бзаджагъэ щӀэным хуэлъэр,
19пцӀы зэфэзэщу зэӀылъ щыхьэт нэпцӀыр,
зэш быным я зэхуаку ныкъуакъуэ
къыдэзылъхьэр.
Нэчыхь хьэкъым епцӀыжыным ущызыгъащтэ нэгъуэщӀ псалъэхэр
20Щыхъумэ уигу, си щӀалэ, уи адэ и унафэхэр,
уи анэ и псалъи иумыгъэгъазэ.
21ГущӀагъщӀэлъыбзэу сыт щыгъуи ахэр зехьэ,
гъащӀэ гъуэмылэуи къехьэкӀ#6:21 Журт. «ИгъащӀэкӀэ ахэр къэмытӀэтэжыну уи гум къепхэкӀи, ахэр уи пщэми къешэкӀ». КъикӀым теухуауэ зэддзэкӀауэ аращ..
22УщежьэкӀэ – ахэрщ уезышажьэр,
жейм ущыхилъафэкӀэ, хъумакӀуэ пхуэхъури,
укъыщыхишыжкӀи, чэнджэщ къозытри
ахэрщ.
23А унафэхэр нэхунэ блэрщ, ущиер – нурщ,
узыгъэӀущ гиер – гъащӀэм ухуэзышэ
гъуэгущ,
24цӀыхубз емыкӀущӀэм,
нэгъуэщӀым и щхьэгъусэм и бзэ ӀэфӀ
гъэпцӀакӀуэм уащихъумэу.
25Думыгъэшэх абы дахагъэу къуэлъым уи гур,
нэзкӀапэр игъэджэгуу ар къыщоплъкӀэ
зумыгъащтэ.
26ЦӀыхубз дэхуэхам и уасэр щӀакхъуэ Ӏыхьэщ#6:26 Е «ЦӀыхубз дэхуэхам и ягъэкӀэ щӀакхъуэ тыкъыр щхьэкӀэ лъаӀуэу хыхьэжаи щыӀэщ»., –
нэчыхь зиӀэ бзылъхугъэ зыпыпшакъэ –
щӀэптынур уи псэращ.
27Уи щыгъыныр пхимысыкӀыу уи гуфӀакӀэ мафӀэ
пхудэлъхьэн?
28ЛыцӀынэӀэнэуи уимысу дэп жьэражьэм
утеувэфын?
29Апхуэдэщ хамэм и щуӀэгъэ дэгъуэлъым и
Ӏуэхури –
абы еӀуса дэтхэнэ зыми хуэфащэ хьэкъ
игъуэтыжынщ.
30Нэмыплъ ираткъым дыгъум#6:30 Е «Нэмыплъ ираткъэ дыгъум»., мэжэщӀэлӀагъэм
ирихулӀэу Ӏэбэм,
и ныбэ лажьэм кърихуэкӀырт ар.
31Яубыду щытми, пшынэнущ ар хуэдиблкӀэ,
и унэ фӀыгъуэу илъыр ита папщӀэ.
32Нэчыхь зиӀэ цӀыхубзыр гупэхэлъ къэзыщӀыр
акъылыншэщ,
апхуэдэу зекӀуэм и ӀэкӀэ зеукӀыж.
33Удынрэ хъуэну абы хуэфащэр игъуэтынщ,
укӀытэгъуэу зэрыхуами къикӀ иӀэнкъым;
34зи фызыр хамэм езыфыгъулӀэ лӀыр мэгубжь,
гущӀэгъу жыхуаӀэри ищӀэнкъым илъ
щищӀэжкӀэ.
35Лъы уасэ зи цӀи къыӀихынкъым,
сыт хуэдэ тыгъэ хуумыщӀами,
къэувыӀэнкъым.
Currently Selected:
Гъэсэпэтхыдэхэр 6: АдгФЛ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2009, 2018, 2021
