Svun Marcos 9

1Ti Jesuse ja' yech iyal noxtoc chac li'i:

—Ta melel chacalbeic, ti jayvo' li'oxuque mu to bu chacham acotolic, ja' to mi avilic ti c'alal xlic pasvanuc ta mantal xchi'uc syu'el ti Rioxe ―x'utatic yu'un ti Jesuse.

Ja' li' yaloj ti iyac' xojobal ti Jesuse ti iyil oxvo' yajchanc'ope

(Mt 17.1-13; Lc 9.28-36)

2Ti c'alal ilaj vaquib c'ac'ale, ti Jesuse imuy ech'el ta jp'ej toyol vits, ja' no'ox iyic' ech'ele li Pedroe, xchi'uc li Jacoboe, xchi'uc li Juane. Ti Jesuse tey ijel sjunlej ti spat xocone, tey sq'uelojic li oxvo'e. 3Li sc'u'e xlebebet tajmec saquil. Muc' much'u yech sna' x'uc'umaj ta sjunlej balamil ti bats'i sac chictae. 4Ja'o iyilic ti Eliase xchi'uc ti Moisese, tey chlo'ilajic xchi'uc ti Jesuse. 5Ti Pedroe, xi iyalbe ti Jesuse:

—Jchanubtasvanej, ¡toj lec ti li'otique! Ta jmeltsanticotic oxp'ejuc sucbil yanal te': Jp'ej avu'un, jp'ej yu'un Moisés, jp'ej yu'un Elías ―xi li Pedroe.

6Yu'un li yajchanc'optaque ixi'ic tajmec, yech'o ti mu xa sna' c'usi chal li Pedroe. 7Ital lumal toc, ibut'ij scotolic. Iya'iic ic'opoj ta yut lumal toc ti Rioxe, ja' yech iyal chacli'i: «Li'i ja' Jch'amal jc'anoj tajmec: a'yibeic me li c'usitic chayalbeique.» ―Xi.

8Ta jliquel o isq'uelic ta jujot xocon, pero stuc xa tey va'al iyilic ti Jesuse.

9Ti c'alal iyalic tal ta vitse, ti Jesuse iyalbe ti yajchanc'optaque:

—Mu to me much'u xavalbeic ti c'usi avilique. Ja'to xa valic mi li cha'cuxi vo'on ti Xch'amal crixchano li c'ote ―x'utatic. 10Yech'o un mu to much'u iyalbeic, isnac' ta yo'on stuquic. Pero tey ono'ox tsjac'ulanbe sbaic ti c'usi smelol ti ta xcha'cuxie. 11Isjac'beic ti Jesuse:

—¿C'u yu'un ti chalic li jchanubtasvanejetic ta smantal Rioxe ti ja' ba'yi chtal ti Eliase? ―Xutic ti Jesuse.

12Itac'av ti Jesuse:

—Ja' melel ti ja' ba'yi ta xtal ti Eliase, ti ja' chtal slecubtas scotole. ¿Ti mi yeche, c'u yu'un ti chal ta sc'op Riox ti persa chquich' jvocol vo'on ti Xch'amal crixchano li c'ote xchi'uc ti mu xic'anee? 13Chacalbeic, ti Eliase i'ay xa, pero li crixchanoetique ispasbeic ti c'usi isc'an yo'onic ispasbeique, ja' chac c'u cha'al tsibabil ono'ox ta sc'op Riox ti ta xc'ot ta pasele ―x'utatic yu'un ti Jesuse.

Ja' li' yaloj ti isloq'uesbe pucuj ta yo'on jun crem ti Jesuse

(Mt 17.14-20; Lc 9.37-43)

14Ti c'alal iyulic yo' bu comemic li yane, tey joyintabilic yul staic yu'un epal crixchanoetic xchi'uc jayvo ti much'utic ta xchanubtasvanic ta smantaltac Rioxe. Yu'un oy c'usi chjac'ulanbatic. 15Ti crixchanoetique ti c'alal iyilic ti Jesuse, xch'ayet xa yo'onic, ba sc'oponic ta anil. 16Ijac'batic yu'un ti Jesuse:

—¿C'usi chavalbe abaic xchi'uc li cajchanc'optaque? ―X'utatic.

17Itac'av jun ti much'utic tey tsobolique:

―Jchanubtasvanej, yu'un li' quic'ojbot tal li jcreme. Ochem pucuj ta yo'on, pasem o ta uma'. 18Buyuc no'ox chlic ilbajinatuc yu'un ti pucuje, ta xjipe ta lum; ta spotspotsvocan ye, ta sc'ux sba ye, ta ste' sba yoc sc'ob. Icalbe la vajchanc'optaque ti ac'u sloq'uesic li pucuje, pero muc' xloc' yu'unic ―xi ti vinique.

19Itac'av ti Jesuse:

―¡Mu xa ch'unic tajmec! Jal xa li' jchi'ucoxuque, ¿C'usi to sjalil chajt'sicbeic? Ic'becon tal li creme ―x'utatic yu'un ti Jesuse.

20Iyiq'uic tal li creme, ti c'alal iyil Jesús ti pucuje, ja'o iyilbajin ti creme, ilic stup'-ic', iyal ta lum. Tey xa xbalet, spotspotsvocan xa ye. 21Ti Jesuse isjac'be ti stot ti creme:

―¿C'u xa ora sliquel ti x'elan tspase? —Xut.

Itac'av stot li creme:

―Ta sbic'tal ono'ox sliquel —xi. 22Ep ta ech'el ic'ot ta c'oc', ep ta ech'el ip'aj ta vo' yu'un tsc'an chmile yu'un ti pucuje. Mi vo'ot xa xloc' avu'une, abulajan c'uxubinbon, loq'uesbon ―xi ti stot ti creme.

23―Itac'av ti Jesuse:

—¿C'u yu'un ti chajac'bon to mi xu' chach'une? Ti much'u ta xch'une xu' ta xc'ot ta pasel scotol ti c'usi sc'ane ―x'utat.

24Ti stot ti creme tsots i'avan:

―Ta jch'un. ¡Coltaon ta xch'unel más! ―Xi.

25Ti Jesuse, ti c'alal iyil ti istsob sbaic tal ta anil ti epal crixchanoetique, iyut ti pucuje, ja' yech iyalbe chac li'i:

―Uma' pucuj, pac'chiquin, vo'on chacalbe, loc'an ta yo'on li crem li'i. Mu xa me xacha'och noxtoc ta yo'on ―xi ti Jesuse.

26Ti pucuje, i'avan. Isliquesbe to comel stup'ic li creme ja' o iloc', chamem yilel iscomtsan. Ep much'utic iyalic ti icham xa oe. 27Ti Jesuse istsacbe sc'ob li creme, isnit liquel; ora ilic.

28Ti Jesuse i'och ta jp'ejna, ti c'alal stuquic xa'oxe, li yajchanc'optaque isjac'beic ti Jesuse:

—¿C'u yu'un ti muc' xloc' cu'unticotic li pucuje? ―Xutic.

29―Itac'av ti Jesuse:

—Li jtos pucujetic ti ijloq'uese, mu xloc' ta yech no'ox, ja'to ta xloc' mi chac'oponic Rioxe, ―x'utatic yu'un ti Jesuse.

Ja' li' yaloj ti xcha'ech'elal iyal ti chmile ti Jesuse

(Mt 17.22-23; Lc 9.43-45)

30C'alal iloq'uic ech'el teyo'e, i'ech'ic ta Galilea. Ti Jesuse mu sc'an xvinaj ti bu ch-ech'e, 31yu'un ja' o ixchanubtas li yajchanc'optaque. Ja' yech iyalbe chac li'i:

―Vo'on ti Xch'amal crixchano li c'ote chi'aq'ue entrucal ta stojol li crixchanoetique. Chismilic, pero ta yoxibal c'ac'al chicha'cuxi ―xi ti Jesuse.

32Muc' xa'ibeic smelol ti c'usi i'albatique xchi'uc ixi'ic ta sjac'bel c'usi smelol.

Ja' li' yaloj ti ja' chcom ta jpasmantal ti much'u mu sna' stoy sbae

(Mt 18.1-5; Lc 9.46-48)

33Ti c'alal ic'otic ta jteclum Capernaume, ti c'alal teyic xa ox ta nae, ti Jesuse isjac'be li yajchanc'optaque:

—¿C'usi li chavalbe abaic tal ta bee? ―X'utatic.

34Muc' xtac'avic, yu'un ja' chalbe sbaic tal be ti much'u junucal ti más ich'bil ta muc' ch-c'ote. 35Ichoti ti Jesuse, iyalbe ti ac'u nopojicuc tal slajchava'alique, ja' yech iyalbe chac li'i:

—Ti much'u tsc'an ti ta bail ta xc'ote, ja' tsc'an ti ta slajeb chac' sbae xchi'uc ti ac'u tunuc ta stojol li xchi'iltaque ―x'utatic yu'un ti Jesuse.

36Iyic' tal jun c'ox crem isva'an ta o'lol yo' bu tsobolique ispet, ja' yech iyal chac li'i:

37―Ti much'u chich ta muc ta jcuenta vo'on junuc c'ox crem chac c'u cha'al li'i, vo'on chiyich' ta muc'; pero ma'uc no'ox jtuc chiyic' ta muc' ja' no'ox yech yich'oj ta muc' chc'ot ti much'u li stac tale ―x'utatic yu'un ti Jesuse.

Ja' li' yaloj ti much'utic lec chiyilotique, mu xiscrontainotic

(Mt 10.42; Lc 9.49-50)

38Ti Juane ja' yech iyalbe ti Jesuse:

—Jchanubtasvanej, oy much'u iquilticotic ti ta tsloq'ues pucujetic ta abie, ijpajesticotic yu'un ma'uc jchi'iltic ―xut Jesús li Juane.

39―Itac'av ti Jesuse:

Mu me xapajesic, yu'un ti much'u ta tsloq'ues pucujetic ta jbie, mu xu' ti ts'acal to chopol c'usi chiyalbee. 40Ti much'u muc' bu chiscrontainotique, yu'un lec chiyilotic. 41Much'uuc no'ox ti chayac'beic jbochuc vo' yu'un ti chilic ti chatunic cu'un vo'on ti Cristoone, ta melel chacalbeic ti chich' ono'ox smotonic uque.

Ja' li' yaloj ti toj xi'el sba li mulile

(Mt 18.6-9; Lc 17.1-2)

42»Much'uuc no'ox ti chac'be sa' smul junuc li c'oxetic li'i ti yich'ojicon ta muq'ue, ja' más lec ti ac'u yich' chucbel jp'ejuc muc'ta tanal molino ta snuq'ue, ti ac'u yich' jipel yalel ta mare. 43Ti mi ja' chata o amul lac'obe, más lec tuch'o loq'uel; ja' más lec mi junjun ac'ob chabat ta vinajele, ja' chopol mi xchi'uc xchibal ac'ob labat ta c'oq'ue, yo' bu mu xtup' o ta jmoje. 45Ja' no'ox yech mi ja' chata o amul lavoque, tuch'o loq'uel, ja' más lec mi junjun avoc cha'och ech'el ta vinajele; ja' chopol mi xchi'uc xchibal avoc chavich' jipel ochel ta c'oq'ue. 47Ja' no'ox yech mi ja' chata o amul lasate, pitso loq'uel, ja' más lec mi jp'ej p'ej asat cha'och ech'el yo bu tspas mantal ti Rioxe; ja chopol mi xchi'uc xchap'ejel asat chavich' jipel ochel ta c'oq'ue, 48yo' bu mu xcham li xuvitetique xchi'uc yo bu mu xtup' o ta jmoj li c'oq'ue.

49»Scotol li c'usitic chich' lecubtasele ta ats'am xchi'uc tac'oc'. Ti much'utic ta xtunic yu'un ti Rioxe ja'to onox chlecubic o li vocole. Lec ch-ileic yu'un ti Rioxe chac c'u cha'al lec iyil smoton ti c'alal iyich' yats'mele. 50Li ats'ame mu xu' ti ch'abale. Ja'to chmuib o li ve'lile ti c'alal oye. Ti sna'uc soc li ats'ame, mu xu' xcha'lecub. Ja' no'ox yech ja' tsc'an ti lec avo'onique yo' lec xavil o abaique ―x'utatic yu'un ti Jesuse.

Currently Selected:

Svun Marcos 9: LeqAC

Highlight

Copy