Svun Marcos 11
11
Ja' li' yaloj ti i'och ta Jerusalén ti Jesuse
(Mt 21.1-11; Lc 19.28-40; Jn 12.12-19)
1Ti c'alal nopol xa'ox sc'an xc'otic ta Jerusalene, tey ic'otic ta Betfajé xchi'uc ta Betania ta yoc vits Olivotic, ti Jesuse istac ech'el cha'vo' yajchanc'optac. 2Ja' yech iyalbe chac li'i:
—Batanic le' ta parajele, ta ochel no'ox tey chucul chataic jcot chex burro, mu to much'u scajlebinoj. Jitunic, nitic tal. 3Mi oy much'u cha sjac'beic c'u yu'un ti chajitunic li burroe, yu'un ja' xtun yu'un ti Cajvaltique, ta xtal no'ox jsutesticotic ta ora, xavutic ―x'utatic ech'el yu'un ti Jesuse.
4Ibatic, tey chucul istaic ta ti'il be ta ts'el ti'na jcot chex burro, isjitunic tal.
5Ja' o tey va'ajtic jayvo' crixchanoetic, ijac'batic chac li'i:
―¿C'usi chapasic, c'u yu'un ti chajitunic li burroe? ―X'utatic.
6Ja' yech iyalbeic chac c'u cha'al i'albatic yu'un ti Jesuse, i'ac'batic tal. 7Isnitic tal ti burroe. Iyac'beic stasin spimilc'u'ic, iscajlebin tal ti Jesuse. 8Ep much'utic isq'ui spimilc'u'ic ta be yo' bu i'ech' tal ti Jesuse. Jlom isc'asic yanal te', iyaq'uic ta be.
9Ti much'utic babee xchi'uc ti much'utic tijajtique, i'avan scotolic:
―¡Coltaoticotic! ¡Ich'biluc ta muc' ti much'u ja' tacbil tal yu'un ti Cajvaltique! 10¡Ac'u ich'atuc ta muc' ti much'u tal spasotic ta mantal chac c'u cha'al ispas mantal ti jmuc'tatotic David ta más vo'nee! ¡Ich'biluc ta muc' ti jtotic Riox ta vinajele! ―Xiic.
11I'och ta Jerusalén ti Jesuse, tuc' ibat ta templo, isq'uel comel ta sjoyob li temploe. C'alal laj sq'uel comel scotole, ja' o ibat ta Betania xchi'uc slajchava'al li yajchanc'optaque yu'un malem xa ox c'ac'al.
Ja' li' yalojbe sc'oplal ti ic'uxe ti ch'abal sate
(Mt 21.18-19)
12Ta yoc'omal c'alal iloq'uic tal ta Betaniae, ti Jesuse ivi'naj. 13Iyil ta nom jtec' ic'ux, ti oy yanale, inopoj ech'el ba sq'uel mi oy sat noxtoc. Pero ch'abal sat ista, naca no'ox yanal oy yu'un ma'uc to'ox yora tsatin. 14Ti Jesuse iyalbe li te'el ic'uxe:
—¡Mu xa much'u cha slo'be o asat taj moj! —Xut.
Ti yajchanc'optaque tey ya'yojic ti c'usi iyal ti Jesuse.
Ja' li' yaloj ti isnuts loq'uel jchonolajeletic ta ti' muc'ta templo ti Jesuse
(Mt 21.12-17; Lc 19.45-48; Jn 2.13-22)
15Ti c'alal ic'otic ta Jerusalene, i'ochic ech'el ta ti' muc'ta templo, ti Jesuse isnuts loq'uel scotol li jchonolajeletique xchi'uc li jmanolajeletique. Isbutq'uinbe smexaic li jeltaq'uinetique isbutq'uinbe xilaic li jchonpalomaetique; 16Muc' xac' jelavuc xchi'uc yicatsic ta ti' muc'ta temploe. 17Lic chanubtasvanuc, ja' yech iyal chac li'i:
―Ja' yech ts'ibabil ta sc'op Riox chac li'i: “Li jnae ja' snail sc'oponobil Riox scuenta scotol crixchanoetic ta sjunlej balamil”, Pero li vo'oxuque, c'atajem avu'unic ta snail ch'en j'eleq'uetic ―x'utatic.
18Calal iya'iic ti much'utic ta xchanubtasvanic ta smantaltac Rioxe xchi'uc ti totil paleetique, lic scomonnopic c'uxi ta staic ta milel ti Jesuse, pero xi'emic o, yu'un scotol crixchanoetic, lec cha'iic ti c'u x'elan ta xchanubtasvane. 19Ti c'alal i'och ac'ubale, iloc' ech'el xchi'uc yajchanc'optac ta Jerusalén ti Jesuse.
Ja' li' yaloj ti itaquij li te'el ic'uxe ti ch'abal sate
(Mt 21.19-22)
20Sob ta yoc'omal tey i'ech'ic tal noxtoc yo' bu ti ic'uxe, iyilic ti taquin xa xchi'uc yisime. 21Li Pedroe iyul ta sjol ti c'usi iyal ti Jesuse, ja' yech iyalbe chac li'i:
―Jchanubtasvanej, q'uelavil li te'el ic'ux ti avut comele, taquin xa ―xut.
22Itac'av ti Jesuse:
―Ch'unic ti oy syu'el ti Rioxe —xi. 23Ta melel chacalbeic, mi oy much'u chalbe li vits li'i: “¡Loc'an ech'el li'toe ba jip aba ta mar mi xute!”, Mi xch'unoj ti chc'ot ono'ox ta pasel li c'usi iyale, yu'un ono'ox ta xc'ot ta pasel. 24Yech'o un chacalbeic, scotol ti c'usitic chac'anbeic ti Rioxe, mi j'ech'el ach'unojic ti chayac'beique, ta onox xavich'ic. 25Ti c'alal chac'oponic Rioxe, aq'uic ta pertonal ti much'u oy smul avu'unique, yo' xayaq'uic o ta pertonal yu'un amulic uc ti Jtotic Riox ta vinajele ―x'utatic yu'un ti Jesuse.
Ja' li' yaloj ti ijac'bat ti Jesuse ti much'u i'albon ti x'elan ispase
(Mt 21.23-27; Lc 20.1-8)
27Ti c'alal laj yal chac taje isutic tal xchi'uc yajchanc'optac ta Jerusalen ti Jesuse. C'alal tey xva'et ta ti' muc'ta templo ti Jesuse, tey tal c'oponatuc yu'un totil paleetic xchi'uc ti much'utic ta xchanubtasvanic ta smantaltac Rioxe, xchi'uc jayvo' moletic, 28Isjac'beic ti Jesuse:
—¿C'usi avorten ti x'elan chapase? ¿Much'u layac'be avabtel ti x'elan chapase? ―Xutic ti Jesuse.
29Itac'av ti Jesuse:
—Li vo'one oy c'usi chajac'beic uc, mi chavalbecon ti c'usi chajac'beique, ja' no'ox yech li vo'one chacalbeic ti much'u liyalbe ti x'elan ta jpase. 30¿Much'u itacon tal ti tal yac' ich'vo' ti Juane? ¿Mi Riox, o mi crixchano? ―X'utatic yu'un ti Jesuse.
31Xalxalbe xa sbaic: «Mi chcaltic ti ta smantal Rioxe, “¿c'u yu'un ti muc' xach'unique che'e?” —Xi bi'a. 32¿Mi xu van xcaltic ti ta smantal no'ox crixchanoe?...» ―Xut sbaic'—, yu'un xi'emic o li crixchanoetique ja ti scotolic xch'unojic ti ja' yaj'alc'op Riox ti Juane. 33Yech'o un ja' yech iyalbeic ti Jesuse:
―Mu jna'ticotic ―xiic.
Yech'o un itac'batic yu'un ti Jesuse:
Ja' no'ox yech li vo'on uque, muc' bu chacalbeic c'usi corten ti x'elan ta jpase ―x'utatic yu'un ti Jesuse.
Currently Selected:
Svun Marcos 11: LeqAC
Highlight
Share
Copy
Want to have your highlights saved across all your devices? Sign up or sign in
© Sociedad Biblica de Mexico AC
