Svun Mateo 25

Lo'il scuenta lajunvo' tojol tsebetic

1»Ti c'u x'elan tspasvan ta mantal ti Rioxe, ja yech c'u cha'al lajunvo' tojol tsebetic ti iyich' ech'el sc'oq'uic ti c'alal ba snupic tal ta be li jnupunel creme. 2Li vo'vo'e lec p'ijic; li vo'vo'e sonsoic. 3Li sonso tsebetique ja' no'ox iyich' ech'el ti c'u yepal ch'olol yaceiteal li sc'oq'uique, muc' xich'beic ech'el smasil; 4yan li p'ijil tsebetique isnojesbe ech'el yaceiteal li sc'oq'uique, iyich'ic to ech'el más. 5Li jnupunele muc' xtal ta ora. Li tsebetique i'och svayel scotolic. 6Ta ol ac'ubal i'aptaatic: “¡Le' xa xtal li jnupunel creme! ¡Ba nupic tal ta be!”— X'utatic. 7Ora ijulavic li tsebetique. Ixch'olbeic más yaceiteal li sc'oq'uique. 8Li sonso tsebetique, iyalbeic li vo'vo' tsebetic lec p'ijique: “Ac'boticotic jset'uc avaceiteic yu'un chtup' xa li jc'oc'ticotique.” —Xiic. 9Itac'avic li p'ijil tsebetique: “I'i, yu'un mu xloc' o cu'unticotic uc xchi'uc mu ono'ox xloc' o avu'unic uc mi chacac'beticotique. Ja' más lec ba manotal avu'un atuquic, ba manbeic tal li much'u ta xchonic aceitee.” —X'utatic. 10Ti c'alal ja' o batem smanic li yaceiteique, ja'o iyul li jnupunele. Li tsebetic ti chapajtique tsobol i'ochic ta ve'el xchi'uc li jnupunele. Iyich' maquel li ti' nae. 11Ts'acal to iyulic li yan tsebetique. Ja' yech iyalic chac li'i: “¡Cajval, Cajval, abulajan jamboticotic li sti' anae!” —Xiic. 12Pero ja' yech itac'batic chac li'i: “Muc'bu cha jambeic, yu'un mu xa cojtiquinic.” —X'utatic.

13»Ja' no'ox yech li vo'oxuque, viq'uiluc no'ox me asatic, tsc'an ti chamalaicon no'oxe, yu'un mu xana'ic c'usi c'ac'alil xchi'uc jayib ora chicha'sut tal, ―x'utatic yu'un ti Jesuse.

Lo'il scuenta jun vinic ti iyac'be comel sliqueb li yaj'abteltaque

(Lc 19.11-27)

14»Ti c'u x'elan tspasvan ta mantal ti Rioxe, ja' yech chac c'u cha'al jun vinic ti ibat ta nome, ti c'alal mu to'ox ch-bate, istsob li yaj'abteltaque, iyac'be comel scuentain li c'usuc yu'une. 15Li june i'ac'bat vo'mil (5,000) ta sep oro, li june i'ac'bat cha'mil (2,000), li june i'ac'bat jmil (1,000): Ja' ti c'u yepal xq'uel yu'unic jujuntale. Ti c'alal laj yac' comel staq'uin li vinique, ja'o ibat. 16Li much'u i'ac'bat vo'mile (5,000) lic equelajuc o, ijolin yu'un vo'mil (5,000). 17Ja' no'ox yech li much'u i'ac'bat cha'mile (2,000), ijolin yu'un cha'mil uc (2,000). 18Yan li much'u jmil (1,000) no'ox i'ac'bate, isjoc'be xch'enal ismuc ta lum, yech no'ox isnac'be staq'uin li yajvale.

19»Jal i'ay li yajvalique, ti c'alal isut tale, istsob noxtoc li yaj'abteltaque, i'ich'batic cuenta c'u yepal ijolin yu'unic li taq'uine. 20Ja' ba'yi ic'ot li much'u iyich' comel vo'mile (5,000), yich'ojbe tal noxtoc vo'mil sjol, xi c'ot yale: “Cajval, li' li vo'mil (5,000) ataq'uin avac'bon comele xchi'uc vo'mil (5,000) ijolin cu'un.” —Xut li yajvale. 21Itac'av li yajvale: “Lec ibat avu'un, lequil j'abtelot lec acuentain li c'usitic la cac'be comele; jutuc ti lacac'bee pero sjunul avo'on la'abtej o, yech'o un, lavie chacac'be acuentain más. La' ochantal, co'oluc junuc avo'on xchi'uc la vajvale.” —X'utat. 22Ital li much'u yich'oj cha'mil uque, xi yul yale: “Cajval, li' li cha'mil ataq'uin avac'bon comele xchi'uc cha'mil ijolin cu'un.” Xut li yajvale. 23Itac'av li yajvale: “Lec ibat avu'un, lequil j'abtelot; lec acuentain li c'usitic la cac'be comele, jutuc ti lacac'bee pero sjunul avo'on la'abtej o. Yech'o un, lavie chacac'be acuentain más. La' ochantal, co'oluc junuc avo'on xchi'uc la vajvale.” —X'utat.

24»Ts'acal to ital li much'u jmil no'ox yich'oje, ja' yech yul yalbe li yajvale: “Cajval, jna'oj ti toj tsots avo'one, ti jp'el xavale; ti chac'aj ti bu ma'uc ats'unoje, ti chatsob ti bu ma'uc a vajoje. 25Yech'o un lixi', ijmuc ta lum la taq'uine. Li' quich'ojbotale, ich'o sutel yu'un avu'un onox.” —Xut li yajvale. 26Itac'bat yu'un li yajvale: “Li vo'ote chopol j'abtelot, toj ch'ajot, mi ana'oj ti ta jc'aj ti bu ma'uc jts'unoje, ti ta xquich ti bu ma'uc jvajoje, 27ay atic' ta banco ti yechuque, ti c'alal li sutale, yul quich'be xchi'uc sjol li jtaq'uin ti yechuque.”— X'utat yu'un li yajvale. 28Iyalbe li much'utic teyique: “Pojbeic li jmil cac'ojbee, ja' ac'beic li much'u yich'oj lajunmile —xi. 29Yu'un ti much'u oy yu'une, ta x'ac'bat más yo' xp'ol o yu'un mase; yan ti much'u ch'abal yu'une, ta xpojbat ta jmoj ti c'u yunen epal oy yu'une. 30Li jun j'abtel li'i mu c'usi bal o, jipic loq'uel, aq'uic ech'el ta ic' osil. Tey ac'u yoq'uita sba, tey c'uxuxetuc o ye.”

Ja' li' yaloj ti ta sta yora chalbe bu chbatic crixchanoetic ti Cajvaltic Jesucristoe

31»C'alal xicha'sutal xchi'uc jlequilal jxojobal vo'on ti Xch'amal crixchano li c'ote, chital xchi'uc scotol caj-angeltac, chichoti ta lequil muc'ta chotlebal. 32Ta stsob sbaic tal ta jtojol scotol li crixchanoetic ta sjunlej balamile. Ta jch'ac ta jujutos chac c'u cha'al jchabichij ti parte chac' li chije xchi'uc li chivoe. 33Li chijetique ta xcac' ta jbats'i c'ob, yan li chivoetique ta xcac' ta jsurto. 34Vo'on li Reyone ja' yech chcalbeic ti much'utic teyic ta jbats'ic'obe: “Li vo'oxuque la'ic yu'un c'uxubinbiloxuc yu'un ti Jtote; ochanic yo' bu tspas mantal ti Jtote yu'un yech ono'ox xchapanoj ti c'alal ispas li balamile. 35Ti c'alal livi'naje, avac'becon ave'elic; ti c'alal itaquij jti'e, avac'becon ava'alic; ac'u mi jyanlum crixchanoon ti muc' xavojtiquinicone, avoteson ta anaic. 36Ti c'alal avilic ti ch'abal jc'u' jpoq'ue, avac'becon; ti c'alal ipone, ay avula'anicon; ti c'alal tiq'uilon ta chuquele, ay aq'uelicon.” —Ta xcutic. 37Ja' yech chtac'avic ti much'utic lec yo'onique: “Cajval, ¿c'usi ora laquilticotic ti lavi'naje ti icac'ticotic ave'ele? ¿C'usi ora laquilticotic ti itaquij ati'e ti lacac'beticotic vo'e? 38¿C'usi ora lacotes ta jnaticotic ti muc' xacojtiquinticotique? ¿C'usi ora iquilticotic ti ch'abal ac'u' apoq'ue ti lacac'beticotique? 39¿C'usi ora iquilticotic ti la'ipaje ti ay jvula'anoticotique? ¿C'usi ora iquilticotic ti tey tiq'uilot ta chuquele ti ay jq'ueloticotique?”— Xiic. 40Vo'on li Reyone ja' yech ta jtac'beic chac li'i: “Ta melel chacalbeic, ta scuenta ti ac'uxubinic li jchi'iltac ti muc' bu ich'bilic ta muc' li' ta sba balamile, co'ol xchi'uc vo'on ac'uxubinicon ya'el.” —Ta xcutic.

41»Ti much'utic tey ta jsurtoe xi ta xcalbeique: “Loc'anic ta jtojol yu'un toj chopoloxuc; batanic ta c'oc' ta sbatel osil, yo' bu meltsanbil ta scuenta li totil pucuje xchi'uc li bic'tal pucujetique. 42Yu'un ti c'alal livi'naje, muc' xavac'becon ave'elic; ti c'alal itaquij jti'e, muc' xavac'becon ava'alic; 43ti c'alal lic'ot ta anaic c'ucha'al jyan lum crixchanoe, avalic ti mu xavojtiquinicone, muc' xavotesicon ta anaic; ti c'alal avilic ti ch'abal jc'u' jpoq'ue, muc' xavac'becon; ti c'alal ipone xchi'uc ti c'alal tiq'uilon ta chuquele, muc' x'ay aq'uelicon.” —Ta xcutic. 44Ja' yech ta xtac'avic chac li'i: “Cajval, pero ¿c'usi ora laquilticotic ti lavi'naje, ti itaquij ati'e, ti muc' xacojtiquinticotique, ti ch'abal ac'u' apoq'ue, ti ipote, ti tiq'uilot ta chuquele ti muc' xa jc'uxubinticotic chavale?” —Xiic. 45Vo'on li Reyone ja' yech ta jtac'beic chac li'i: “Ta melel chacalbeic, yu'un ja' ti c'alal muc' xac'uxubinic junuc li jchi'iltac ti muc' bu ich'bilic ta muc' li' ta sba balamile, yu'un co'ol xchi'uc vo'on muc' xac'uxubinicon ya'el.” —Ta xcutic. 46Li much'utic chopolique ta xba yich'ic castico ta sbatel osil, yan ti much'utic lec yo'onique ta xcuxiic ta sbatel osil.» ―X'utatic yu'un ti Jesuse.

Currently Selected:

Svun Mateo 25: LeqAC

Highlight

Copy