Svun Lucas 4

Ja' li' yaloj ti chlo'loat ox yu'un totil pucuj ti Jesuse

(Mt 4.1-11; Mc 1.12-13)

1Ti Jesuse chi'inbil xa loq'uel yu'un Ch'ul Espiritu ti c'alal iloc' ta uc'um Jordane, iyulesbat ta sjol ti ac'u batuc ta xocol balamile. 2Cha'vinic (40) c'ac'al tey ta xocol balamil, ja'o tey iq'uelbat yo'on yu'un ti pucuje yu'un tsujat ox ta mulil, muc' bu ive' ti c'u sjalil teye, c'alal i'ech' xa'ox li cha'vinic (40) c'ac'ale tey xa lic vi'najuc. 3Ti totil pucuje, xi iyalbe ti Jesuse:

—Mi yech ti vo'ot Xch'amalot ti Rioxe, alboquic li ton li'i ti ac'u c'atajuc ta pane ―x'utat.

4Itac'av ti Jesuse:

—Ja' yech tsibabil ta sc'op Riox chac li'i: “Ma'uc no'ox ta pan chcuxi li crixchanoe.” Xi ts'ibabil ―xi ti Jesuse.

5Ti pucuje iyic' muyel ta jp'ej toyol vits ti Jesuse, ora iyac'be yil ti c'u x'elan tspasic mantal ta muc'tic jteclumetic li jyu'eletic ta sjunlej balamile. 6Ti pucuje ja' yech iyal chac li'i:

—Chacac'be acuentain scotol syu'elic xchi'uc slequilalic li jteclumetic le'e. Yu'un vo'on ac'bilon ta coc ta jc'ob, xu' chcac'be ti much'u sc'an co'on chcac'bee. 7Mi chaquejletaone, mi chavich'on ta muq'ue, ja' avu'un scotol ―x'utat.

8Itac'av ti Jesuse:

—Li sc'op Rioxe ja' yech chal chac li'i: “Ich'o ta muc' la vajvale ja' ti Rioxe, ja' no'ox tunan yu'un xi ts'ibabil. ―Xut.

9Ti pucuje iyic' ech'el ta Jerusalén ti Jesuse, isva'an ta jol templo, ja' yech iyalbe chac li'i:

―Ti mi ta melel vo'ot Xch'amalot ti Rioxe, jipo aba yalel li'toe; 10yu'un li sc'op Rioxe ja' yech chal chac li'i:

“Ti Rioxe cha stacbetal yaj angeltac

ja' cha xchabi yo' mu c'u xapas oe.

11Ja' stsacoj chac'ot,

yo' mu xayayij o ta tone.” Xi ts'ibabil ―x'utat yu'un pucuj ti Jesuse.

12Itac'av ti Jesuse:

—Pero xi ts'ibabil noxtoc ta sc'op Rioxe: “Mu me xa q'uelbe yo'on ti Cajvaltique, ja' ti Rioxe.” ―X'utat yu'un Jesús ti pucuje.

13Ti c'alal iyil ti pucuje ti mu c'usi xch'un jtosuc ti Jesuse, iyicta comel ja' to ta yan c'ac'al tsq'uel mi oy to c'u xut xch'un lo'loel yu'une.

Ja' li' yaloj ti ta yosilal Galilea lic chanubtasvanuc ti Jesuse

(Mt 4.12-17; Mc 1.14-15)

14Ti Jesuse isut ech'el ta Galilea, xu' xa yu'un tspas scotol ta syu'el ti Ch'ul Espiritue, ivinaj sc'oplal ta sjunlej yosilal Galilea xchi'uc ti butic nopol xile. 15Ichanubtasvan ta bic'tal temploetic, lec i'ile yu'un ti crixchanoetique.

Ja' li' yaloj ti muc x'ich'e ta muc' ta Nazaret ti Jesuse

(Mt 13.53-58; Mc 6.1-6)

16Ti Jesuse ibat ta steclumal ta Nazaret yo' bu ich'ie. Ti c'alal ja' o sc'ac'alil ta xcuxic li j'israeletique, ibat ta templo teyo'e yu'un nopem onox xa'i ti chc'otilane. Iva'i, yu'un ja' chapta li sc'op Rioxe. 17I'ac'bat li vun ti sts'ibaoj comel ti j'alc'op Isaiase, ti c'alal isjilch'un li vune, ja' ista yo' bu chal chac li'i:

18«Li Espíritu yu'un ti Cajvaltique li' ta jtojole,

yu'un st'ujojon

ta scuenta ch-calbe ya'iic lequil ach'c'op ti much'utic abol sbaique;

tacbilon tal scuenta chcalbe ya'iic ti chich'ic loq'uesel ta chuquel ti much'utic chucajtique

tal jambe sat li ma'satetique;

tal jcolta li much'utic ilbajinbilique;

19Tal calbe ya'iic ti ja' xa sjabilal ti chc'uxubinvan ti Rioxe.» —Xi ti bu isq'uel ti Jesuse.

20Ti c'alal ilaje, isbal li vune, ja' iyac'be ti much'u tey chtun ta temploe, ti c'alal laj yac'bee ichoti. Ti much'utic teyique isq'uelic tajmec ti Jesuse.

21―Ti Jesuse ja yech iyalbe scotolic chac li'i:

—Lavie ic'ot xa li c'usi ts'ibabil ta sc'op Riox ti ava'iique. ―X'utatic.

22Scotolic lec iyalbeic sc'oplal ti Jesuse. Xch'ayet o yo'onic ti lec ti c'usitic iyale. Xi iyalbe sbaique:

―¿Mi mu ja'uc screm li José le'e ―xut sbaic.

23Itac'av ti Jesuse:

—Li vo'oxuque ja' nan yech chavalbecon chac li'i: “Mi yech xaval ti jpoxtavanejote, poxta aba atuc ba'yuc” Xa chiic nan. Xi chavalbecon noxtoque: “Ti c'usi ica'iticotic apas ta capernaume, paso yech li ta alumal atuque.” Xachiic nan —x'utatic yu'un ti Jesuse.

24Xi to iyal noxtoque:

—Ta melel chacalbeic, ch'abal junuc yaj'alc'op Riox ti lec ichbil ta muc' ta slumal stuque. 25Ta melel chacalbeic, ti c'alal li' to'ox ta sba balamil ti Elías yaj'alc'op Rioxe, oy ep me'anal antsetic li' ta slumal Israele, Oxib jabil xchi'uc o'lol muc xac' vo', tsots i'ech' vi'nal ta sjunlej li jteclume; 26Pero ti Elíase muc' xtaque ech'el ta sna me'anal antsetic li' ta Israele, tey itaque ech'el ta sna jun me'anal ants ti tey nacal ta jteclum Sareptae, ti nopol xil sba xchi'uc li jteclum Sidóne. 27Ja' no'ox yech c'alal cuxul to'ox ti Eliseoe, ep crixchanoetic ip ta lepra, pero mi jun muc' xet'esbe xchamelic, ja' no'ox iyet'esbe xchamel ti Naamane ti liquem tal ta Siriae ―x'utatic yu'un ti Jesuse.

28Ti c'alal iya'iic ti much'utic tey tsobol ta temploe, icapic o tajmec. 29Istsaquic loq'uel ta jteclum ti Jesuse, iyiq'uic muyel ta jolvits yo' bu li jteclume, yu'un tsjipic ox yalel ta ch'en, yu'un li jteclume ta ch'ut vitstic pasbil. 30Pero ti Jesuse xcaquet jelavel ta o'lol crixchanoetic, tey xa ibat o.

Ja' li' yaloj ti isloq'uesbe pucuj ta yo'on jun vinic ti Jesuse

(Mc 1.21-28)

31Ti Jesuse ibat ta jteclum Capernaúm ta yosilal Galilea, ta sc'ac'alil ta xcuxic li j'israeletique, tey ichanubtasvan. 32Ti crixchanoetique xch'ayet xa o yo'onic ti c'u x'elan ichanubtasvane, yu'un ja' yech ichanubtasvan chac c'u cha'al ti much'u tsots yabtele.

33Tey ta bic'tal temploe oy tey jun vinic, ochem pucujetic ta yo'on, tsots i'avan:

34―¡Mu xtal atic' aba ta jtojolticotic! ¿C'usi acuentaoticotic o Jesús Nazaret? ¿Min tal ach'aybon jc'oplalticotic? Jna'oj much'uot, Vo'ot ti ch'aval amul ta stojol ti Rioxe ―xi.

35Ti Jesuse ispajes ti pucuje, xi iyalbee:

―¡Anchan, loc'an ta yo'on li vinique! ―Xut.

Yech'o un ti pucuje isjip ta lun ta bail ta satil li vinique, iloc' ech'el, pero muc' xyayij comel yu'un. 36Xch'ayet xa yo'onic li crixchanoetique, xi iyalbe sbaique:

―¿C'u to van x'elan syu'el li vinic le'e? Yu'un ta jp'el no'ox sc'op xchi'uc ta scotol syu'el, ¡loc'an! Mi xut ti pucuje, ta xloq'uic ―xut sbaic.

37Ti x'elan ispas ti Jesuse, ora ivinaj ta scotol jteclumetic xchi'uc ta scotol parajeletic ti tey no'ox ta sts'el li Capernaume.

Ja' li' yaloj ti itup' sc'ac'al sni'me'el ti Pedroe

(Mt 8.14-15; Mc 1.29-31)

38Ti c'alal iloc' ta templo ti Jesuse, ibat ta sna Simón. Ti sni'me'el Simone tilem tajmec, tey isc'anbeic vocol ti Jesuse ti ac'u scoltae.

39Ti Jesuse inopoj ech'el yo' bu puch'ule, iyal ti ac'u tup'uc li sc'ac'ale. Ora itup', tey xa lic mac'linvanuc.

Ja' li' yaloj ti icol yu'un ep jchameletic ti Jesuse

(Mt 8.16-17; Mc 1.32-34)

40Ti c'alal ich'ay c'ac'ale, ti much'utic oy yaj chamelique iyic'beic ech'el ti Jesuse, c'usuc no'ox chamelal cha'iic; Ti Jesuse xcholet iyac' sc'ob ta sba ti jchameletique, icol scotolic. 41Ep noxtoc ti much'utic iloq'uesbat pucuj ta yo'onique. Ti c'alal iloq'uic ti pucujetique, i'avanic, ja yech iyalic chac li'i:

―¡Vo'ot Xch'amalot ti Rioxe! ―Xiic.

Yech'o un ti pucujetique muc x'aq'ue c'opojicuc más yu'un ti Jesuse, yu'un sna'ojic ti ja' ti much'u tacbil tal yu'un ti Rioxe.

Ja' li' yaloj ti iyal a'yuc sc'op Riox ta yosilal Galilea ti Jesuse

(Mc 1.35-39)

42Ti c'alal isacub ta yoc'omale, iloc' ta jteclum ti Jesuse, ibat yo' bu ch'abal crixchanoe. Ti crixchanoetique isa'ic tajmec, yo'o to c'u cha'al istaic ta sa'el, yo'onicuc spajesic, yu'un mu xaq'uic ech'el.

43Ti Jesuse ja' yech iyal chac li'i:

—Persa chba calbe ya'iic crixchanoetic ta yantic jteclum li lequil ach' c'op ta scuenta ti chlic xa cuentainvanuc ti Rioxe, yu'un ja' tacbilon o tal ti chcal a'yuque ―x'utatic yu'un ti Jesuse.

44Ti Jesuse xcholet iyal ta bic'tal temploetic ta yosilal Galilea ti chlic xa cuentainvanuc ti Rioxe.

Currently Selected:

Svun Lucas 4: LeqAC

Highlight

Copy