Svun Lucas 2

Ja' li' yaloj ti i'ayan ti Jesuse

(Mt 1.18-25)

1Ti c'alal ja' o chac taje, li muc'ta jyu'el Augusto Césare ja'o isloq'ues mantal ta sjunlej balamil ti ac'u yac' ta tsaquel sbiic scotol li crixchanoetique. 2Ti c'alal isliques yeche ja'o ti c'alal tiq'uil ta coviernoal ta yosilal Siria ti Cirenioe. 3Yech'o ti ba yac' ta tsaquel sbiic scotol li crixchanoetic ta jujun slumalique.

4Ti Josee iloc' ech'el ta jteclum Nazaret ta yosilal Galilea, ibat ta yosilal Judea ic'ot ta jteclum Belén, yu'un ja' tey slumal ti rey Davide, yu'un ti Josee ja' smuc'tatot ti Davide. 5Ja' tey ba yac' ta tsaquel sbiic xchi'uc li yajnile ja' ti Mariae, ti oy xa ox xch'ute. 6Ti c'alal teyic ta Belene, ja'o ista sc'ac'alil icol ti Maríae. 7Tey i'ayan ti sba yole, isvol ta poc', ispuch'an ta yav sve'el vacax, yu'un toj noj xa istaic li na ti bu ch-aq'ue ta loq'uel li vayebale.

Ja' li' yaloj ti ic'oponatic yu'un ángel ta vinajel ti jchabichijetique

8Ta ti' Belene oy tey jayvo' jchabichijetic tey chchabi xchijic ta ac'ubaltic. 9Ja' o iyilic jun yaj-angel Cajvaltic, joyintabil ic'otic ta xojobal ti Cajvaltique; toj xi'el ic'otic tajmec. 10Ti angele ja' yech iyal chac li'i: «Mu xaxi'ic, yu'un oy c'usi lec chacalbeic yo' jun o avo'on acotolique: 11Nax i'ayan ta Belén ta slumal David jun jcoltavanej avu'unic, ja' Cristo, ja' Cajvaltic. 12Chacalbeic c'u x'elan chataic li unene. Volbil ta poc', tey puch'anbil ta yav sve'el vacax.» ―X'utatic yu'un ti angele.

13Ja'o ivinaj epal angeletic ta vinajel, iyalbeic slequilal ti Rioxe; ja' yech iyalic chac li'i:

14«¡Ich'biluc ta muc' ti Riox ta vinajele!

¡Ac'u pasuc ta jun yo'onic li crixchanoetic li' ta sba balamile, ja' ti much'utic ta slequil yo'on Riox chich'ic c'uxubinele!» —Xiic.

15Ti c'alal isut ta vinajel ti angeletique li jchabichijetique ja' yech iyalbe sbaic chac li'i:

—Batic ta Belén che'e, ba jq'ueltic c'usi ic'ot chac c'u cha'al liyalbotic ti Cajvaltique ―xut sbaic.

16Sujom ibatic, tey istaic ti Maríae xchi'uc ti Josee, li unene tey puch'ul ta yav sve'el vacax istaic. 17Ti c'alal iyilic li unene, isvinajesic ti c'usi i'albatic yu'un ti angele, ta scuenta sc'oplal li unene. 18Ti much'utic iya'i ti c'usi iyal ti jchabichijetique, xch'ayet xa yo'onic. 19Ti Maríae isnac' ta yo'on scotol ti c'usitic iya'ie, muc'bu ixch'ay ta sjol, tey isnopilan c'usi smelol. 20Ti c'alal isutic li jchabichijetique, iyalbeic slequilal ti Rioxe, iyich'ic ta muc' ta scuenta ti c'usi iyilique xchi'uc ti c'usitic iya'iique, yu'un ja' yech ic'ot scotol chac c'u cha'al i'albatique.

Ja' li' yaloj ti ibat xchi'uquic ta muc'ta templo ti Jesuse

21Ti c'alal ilaj vaxaquib c'ac'al yayanel ti unen creme, iyich' circuncisión. Jesús iyac'beic sbiin yu'un ja' yech iyal ti angele ti c'alal ch'abal to'ox ta ch'utile.

22Ti c'alal its'aqui sc'ac'alil yu'un ti Maríae ti c'u sjalil yaloj ti Moisese, ti mu stac' xbatic ta templo li antsetic c'alal ta xcolique, iyiq'uic ech'el ta muc'ta templo ta Jerusalén ti Jesuse yu'un ba yaq'uic entrucal ta stojol ti Cajvaltique. 23Ti x'elan ispasique yu'un ja' onox yech yaloj mantal ti Rioxe: «Scotol li sba ach'amalique, mi creme, chavac'becon entrucal yu'un ja' cu'un.» Xi onox. 24Ja' no'ox yech noxtoc iyac'beic smoton Riox chac c'u cha'al yaloj mantale: Ac'u yac'becon cha'cotuc toltora o mi cha'cotuc yol paloma. —Xi ono'ox.

25Oy jun j'israel tey nacal ta Jerusalen Simeón sbi, toj lec c'usitic tspas, lec yo'on, smalaoj chtal ti much'u chtal coltavanuc ta slumal ti j'israeletique, li Simeone chi'inbil yu'un ti Ch'ul Espiritue. 26Albil xa ono'ox yu'un ti Ch'ul Espiritue, ti ja'to ta xcham c'alal xilbe sat ti Cristoe, ja' ti much'u chtaque tal yu'un ti Rioxe. 27Ti Simeone i'ac'bat sna' yu'un ti Ch'ul Espiritue ti ac'u batuc ta muc'ta temploe; ti Josee, xchi'uc ti Maríae, iyiq'uic ech'el ta templo li unen Jesuse, yu'un ba spasic chac c'u cha'al chal li mantale, 28ti Simeone ispet li unene, iyalbe slequilal ti Rioxe, ja' yech iyal chac li'i:

29«Lavie Cajval, ic'ot xa ta pasel ti c'usi avaloje:

vo'on li avajtunelone jun xa co'on chicham ti mi yech chac'ane.

30Yu'un iquil xa ta jsat li coltael

31ti achapanoj

ti chavac'be yil scotol li crixchanoetique,

32ti ja' luz chc'ot yu'unic li yantic nacionetique

xchi'uc ti ja' slequilal chc'ot li jteclum Israele.» —Xi li Simeone.

33Ti Josee xchi'uc ti sme' unene xch'ayet xa o yo'onic ti x'elan iyalbe sc'oplal unen ti Simeone. 34I'ac'batic bentisyon yu'un ti Simeone, xi i'albat ti María sme' Jesuse:

―Q'uelavil, li unen li'i albil xa ono'ox sc'oplal ti ja chtal yac' ti ep much'utic ta xlomic o ta lume xchi'uc ti oy much'utic ta stam o sbaic li ta Israele. Ja' chvinaj o ti ep ti much'utic mu xich'ic ta muq'ue, 35ja' yo' xvinaj o ti c'usitic oy ta yo'onic li crixchanoetique. Pero li vo'ote, co'ol c'ucha'al espada ti cha syayijesbe avo'on scotol li c'usitic ch-c'ot ta pasele.

36Ja'o tey noxtoc jun j'alc'op ants Ana sbi, ja' stseb ti Penuele, ja' smuc'tatot ti Aser ti ta más vo'nee. Me'el xa ox tajmec ti Anae. Tseb to'ox tajmec ti c'alal inupune, vucub no'ox jabil iyic' ti smalale; 37oy xa ta ochenta y cuatro jabil ti icom ta me'anale. Scotol c'ac'al tey o ta templo, ta c'ac'al ta ac'ubal ta xtun yu'un ti Cajvaltique, ta sc'opon Riox xchi'uc ta xicta yot. 38Ti c'alal laj yalbe sc'oplal unen ti Simeone, li Anae inopoj ech'el, tey lic yalbe coliyal ti Rioxe xchi'uc isvinajesbe sc'oplal ti unene, iyalbe scotol ti much'utic smalaojic li coltael chtal tey ta Jerusalene.

Ja' li' yaloj ti isutic ech'el ta Nazaret ti Josee xchi'uc ti Maríae

39Ti c'alal laj spasic scotol ti c'usitic yaloj ta smantaltac ti Rioxe, li Josee xchi'uc ti Mariae isutic ta slumalic ta Nazaret ta yosilal Galilea. 40Li unen creme lec ich'i, lec tsots, p'ij tajmec. Ac'bil bentisyon yu'un ti Rioxe.

Ja' li' yaloj ti tey itae ta muc'ta templo ti Jesuse ti c'alal c'ox to'oxe

41Ti stot sme' ti Jesuse chc'otic ono'ox jujun jabil ta q'uin coltael tey ta Jerusalén. 42Ti c'alal oy xa'ox lajcheb sjabilal ti Jesuse, ibat ta q'uin uc yu'un ja' yech stalelic ti ja'o xa yech sjabilalic chlic baticuc ta q'uin li cremotique. 43Ti c'alal ilaj ti q'uine, isutic ta snaic ti Josee xchi'uc ti Maríae, li scremique, ja' ti Jesuse, tey icom ta Jerusalén, muc' xilic bu icom. 44Isnopic ti xchi'uc ech'el li crixchanoetique, ti c'alal ixanavic xa'ox jun c'ac'ale, isjac'beic ti xchi'iltaque xchi'uc ti much'utic xojtiquinique, 45pero muc' bu istaic. Icha'sutic ta Jerusalén yu'un ba sa'ic.

46Ta yoxibal to c'ac'al tey istaic ta templo, tey chotol ta o'lol yo' bu stsoboj sbaic ti much'utic ta xchanubtasvanic ta smantaltac Rioxe, tey cha'i li c'usitic chalique, xchi'uc oy c'usitic tsjac'ulanbe smelol. 47Scotol ti much'utic iya'iique xch'ayet xa o yo'onic ti toj p'ije, xchi'uc ti c'u x'elan itac'ave. 48Ti Josee xchi'uc ti Maríae, ti c'alal iyilic ti tey xchi'uc li jchanubtasvanejetique, xch'ayet xa yo'onic uc; li sme'e xi iyalbee:

―Crem, ¿c'u yu'un ti x'elan chapasbonticotique? Lajsa'ticotic xa tajmec xchi'uc la tote, icat co'onticotic ti muc' bu lajtaticotic ta sa'ele —xut.

49Itac'av ti Jesuse:

—¿C'u yu'un ti cha sa'icone? ¿Mi mu xana'ic ti tsc'an li'on ta sna li Jtote? ―Xi.

50Pero li stuquique muc' xa'ibeic smelol ti c'usi i'albatique.

51Tsobol xa isut xchi'uquic ta Nazaret ti Jesuse, ti c'u sjalil tey tsobol xchi'uquique, lec ixch'un mantal. Ti sme'e isnac' ta yo'on scotol ti c'usitic ispas ti Jesuse. 52Ti Jesuse más to ip'ijub ech'el, xchi'uc ich'i ech'el; lec i'ile yu'un ti Rioxe xchi'uc ti crixchanoetique.

Currently Selected:

Svun Lucas 2: LeqAC

Highlight

Copy