Svun Juan 7

Ja' li' yaloj ti mu to'ox x'ich'e ta muc' yu'un yits'intac ti Jesuse

1Ti c'alal laj yal chac taje, ti Jesuse tey no'ox xjoyet ta yosilal Galilea. Mu sc'an xbat ta yosilal Judea yu'un li jurioetique yo'onuc smilic. 2Pero c'alal po'ot xa'ox sta sc'ac'alil li q'uin ti tspasic sucbil yanal te' snainique, ja' li sq'uinic li jurioetique, 3Ti Jesuse ja' yech i'albat yu'un ti yits'intac cha li'i:

―Mu me xacom li'toe; batan ta Judea, yo' xilic o c'usitic chapas la vajchanc'optac teyo'e. 4Ti much'u tsc'an chvinaj sc'oplale mu mucluc tspas ti c'usi tspase. Lavi yu'un xa ono'ox atamojbe spasel li c'usi chapase, ac'bo yil scotol crixchanoetic. ―Xutic.

5Yu'un ti yits'intaque muc' xch'unic uc ti ja' t'ujbil yu'un ti Riox. 6Itac'batic yu'un ti Jesuse:

―Ta acuenta li vo'oxuque xu' ti c'usuc no'ox orae, pero ta jcuenta li vo'one, sc'anto sta yorail. 7Li vo'oxuque mu chopluc chayilic li crixchanoetic li' ta balamile; yan li vo'one chopol chiyilic, yu'un ta xcalbeic ta jamal ti chopol li c'usitic ta spasique. 8Batan li vo'oxuc ta q'uine; Li vo'one muc'bu chibat, yu'un mu to sta yora ti chibate. ―Xut ti yits'intaque.

9Ti c'alal laj yalbe chac taje, tey icom ta Galilea.

Ja' li' yaloj ti i'ay onox ta q'uin ti Jesuse, ja' li q'uin ti ch-ochic ta sucbil yanal te'e

10Ti c'alal batemic xa'ox ta q'uin ti yits'intaque, ja'to ibat ti Jesuse, muc' much'u iyalbe, ta mucul ibat. 11Ti jurioetique, tsa'ic tey ta q'uine, ja' yech chalulanbe sbaic chac li'i:

―¿Buy xana'ic ti jun vinique? ―Xut sbaic.

12Scotol ti j'ilq'uinetique naca ja' slo'ilic ti Jesuse. Li jlome ja' yech chalic chac li'i: «Toj lec yo'on»; ―xiic. Pero li yane ja' yech chalic li'i: «Chopol yu'un ja' tslo'lo li crixchanoetique.» ―Xi'ic.

13Mi jun muc much'u jamal iyalbe sc'oplal ti Jesuse, yu'un xi'emic o ti jurioetique.

14C'alal o'lol xa'ox sc'an xlaj li q'uine, ti Jesuse i'och ta templo tey lic chanubtasvanuc. 15Ti jurioetique xch'ayet xa o yo'onic, ja' yech iyalic chac li'i:

―¿C'uxi sna'be smelol li c'usitic chal li jchi'iltic le'e ti muc bu xchanoje? ―Xiic.

16Itac'av ti Jesuse:

―Li c'usi chichanubtasvan oe muc' bu jyulesoj ta jol jtuc, ja' yaloj ti much'u stacojon tale. 17Ti much'u oy ta yo'on tspas ti c'usitic tsc'an ti Rioxe, cha'ibe smelol ti c'u x'elan chichanubtasvane, mi liquem tal ta stojol Riox o mi jyulesoj ta jol jtuc. 18Ti much'u ta syules ta sjol stuc li c'usi chale, yu'un ja' tsc'an ich'el ta muc' stuc; yan ti much'u ja' chac' ta ich'el ta muc' ti much'u tacbil tal yu'une, ja' chal ti c'usitic melele, muc' bu ta snop c'op.

19»Mi mu ja'uc Moisés layac'beic comel li smantaltac Rioxe? Pero mi jun muc' bu chach'unic. ¿C'u yu'un ti avo'onuc amilicone? ―X'utatic.

20Itac'av li crixchanoetique:

—¡Ochem pucuj ta avo'on! ¿Much'u ti yo'onuc smilote? ―Xiic.

21Xi itac'batic yu'un ti Jesuse:

―Jun no'ox sq'uelobil jlequilal jyu'elal icac' avilic ta sc'ac'alil ta jcuxtic, pero toj ch'ayel o avo'onic. 22Ti Moisese ja' la yalbeic ti c'u x'elan ta aq'uel li circuncisione (ac'u mi ma'uc liquem tal ta Moisés yu'un liquem tal ta amuc'tatotic ta vo'ne), pero li vo'oxuque chavac'beic circuncisión jun vinic ac'u mi ta sc'ac'alil ta jcuxtic. 23Lavi une, ti chapasic ti c'usi yaloj ti Moisese, chavac'beic yich' circuncisión jun c'ox crem ac'u mi ta sc'ac'alil ta jcuxtic ¿c'u yu'un ti chopol chavilicon o ti iquet'esbe xchamel jun vinic ta sjunlej ta sc'ac'alil ta jcuxtique? 24Mu xa valic ti chopol c'usi tspas jun crixchano ta anil no'oxe. Q'uelic lec mi ta melel oy smule— X'utatic yu'un ti Jesuse.

Ja' li' yaloj ti ixch'unic jlom ti tacbil tal yu'un Riox ti Jesuse

25Oy jayvo' ti much'utic tey nacajtic ta Jerusalene, ja' yech lic sjaq'uic chac li'i:

―¿Mi ma'uc li vinic le'e ti tsa'ic ti yo'onicuc smilique? 26Q'uelavil, li'to ta xchanubtasvane, pero muc' much'u c'usi chalbe. ¿Min van xch'unojic li jmeltsanej c'opetique ti ja' ti much'u tacbiltale? 27Pero li vo'otique jna'ojtic bu liquem tal li vinic le'e; pero ti c'alal xtal ti Cristoe muc' much'u sna' ti bu chtale ―xut sbaic.

28Ti c'alal iya'i yech ti Jesuse, ti c'alal tey ch-chanubtasvan ta temploe, tsots ic'opoj:

―¡Xavojtiquinicon che'e, xa na'ic bu liquemon tal! Pero mu ta jmantaluc jtuc ti li tale, ja' li stac tal ti much'u melel li c'usi chale, ti xu' jpat o co'ontique, ja' ti much'u mu xa vojtiquinic li vo'oxuque. 29Li vo'one xcojtiquin yu'un tey liquemon tal ta stojol, yu'un ja' stacojon tal. ―X'utatic yu'un ti Jesuse.

30Ta ox stsaquic, pero muc' much'u i'och sc'ob ta tsaquel yu'un mu to'ox sta sc'ac'alil. 31Ep much'utic ixch'unic ti ja' ti much'u tacbil tale, ja' yech iyalic chac li'i:

―Calal xtal ti Cristoe, ¿mi más to van chac' iluc slequilal syu'elal cha c'ucha'al li vinic li'e? —Xiic.

Ja' li' yaloj ti ta ox stsaquic Jesús ti jfariseoetique

32Ti jfariseoetique iya'iic ti c'u x'elan chalbeic sc'oplal ti Jesuse; yech'o un ti totil paleetique xchi'uc ti jfariseoetique co'ol isnopic ti istaquic ech'el jchabiej temploetic ti ac'u ba stsaquic tal ti Jesuse. 33Yech'o un ti Jesuse ja' yech iyal chac li'i:

―Muc' bu jal li' jchi'ucoxuque, chisut ech'el ta stojol ti much'u stacojon tale. 34Li vo'oxuque cha sa'icon, pero mu xataicon, yu'un mu xu' chabatic yo' bu chibate. ―X'utatic.

35Ti jurioetique lic sjac'ulanbe sbaic ta jujun tal:

―¿Bu chbat yaloj li vinic li'e ti mu jtatic ta sa'ele? ¿Min van tey chbat yo' bu nacal li jurioetic ti spuquioj sbaic ech'el ta yan balamile, min van ja' chba xchanubtas li jyan lum crixchanoetique? 36¿C'usi smelol ti x'elan chale: “Cha sa'icon pero mu xataicon, ti bu chibate mu xu' chabatic”? —Ti xie, ―xut sbaic.

Ja' li' yaloj ti co'ol xchi'uc ninabvo' slequil yo'onic ti much'utic ta xch'unique

37Ta sbaq'uel q'uine ja' xa li más tsots sc'oplale. Ti Jesuse isva'an sba, tsots ic'opoj, ja' yech iyal chac li'i:

―Ti much'u chtaquij sti'e, ac'u taluc ta jtojol ac'u yuch' li vo' ta xcaq'ue, 38Ti much'u ta xch'un ti vo'on tacbilon tal chac c'ucha'al chal li sc'op Rioxe, ta yut yo'one ja' yech chc'ot chac c'u cha'al ninab vo' ti tey xch'olch'on oe. ―Xi ti Jesuse.

39Ti x'elan iyal ti Jesuse, ja' iyalbe sc'oplal ti much'utic chch'unic ti Jesuse, ta xtal scuentainelic yu'un ti Ch'ul Espiritue; yu'un ti ch'ul Espiritue mu to'ox bu talem, ja' ti mu to'ox bu muyem ech'el ta vinajel ti Jesuse yo' bu ti slequilale.

Ja' li' yaloj ti mu co'oluc isnopic much'u ti Jesuse

40Oy jayvo' ti much'utic teyique, ti c'alal iya'iic ti c'usi iyale, ja' yech iyalic chac li'i:

—Ta melel li vinic li'e, ja' ti yaj'alc'op Rioxe ―xiic.

41―Li yane ja' yech iyalic chac li'i:

—Li'i ja' ti Cristoe —xiic.

Pero li yane xi iyalique:

—I'i, yu'un ti Cristoe ma'uc tey ta xloc'tal ta Galilea —xiic. 42Li sc'op Rioxe chal ti persa ja' smom David ti Cristoe, xchi'u ti tey ta x'ayan ta Belén yo' bu slumal ti Davide. —Xiic li jlome.

43Ti crixchanoetique mu xa stsac sba sc'opic ta scuenta ti c'u x'elan chalbeic sc'oplal ti Jesuse. 44Ti jlome yo'onicuc stsaquic ech'el ta chuquel, pero muc' much'u istsac.

Ja' li' yaloj ti muc' xich'ic ta muc' Jesus ti jchabiejtemploe.

45Ti jchabiejtemploetique isutic ech'el yo' bu ti jfariseoetique xchi'uc ti totil paleetique, Ijac'batic:

—¿C'u yu'un ti muc' xatsaquic tale? ―X'utatic.

46Li jchabiejtemploetique itac'avic:

—¡Yu'un muc' much'u yech xc'opoj chac c'u cha'al xc'opoje! ―Xiic.

47Xi i'albatic yu'un ti jfariseoetique:

—¿Mi la lajic xa ta lo'loel uc? 48¿Mi xch'unojic chavilic junuc li cajmeltsanejc'optique xchi'uc li jfariseoetique? 49Pero li crixchanoetic ti tey cha'iic c'usi ti chale, mu sna'ic li mantaletique, ta ono'ox x'ac'batic castico yu'un ti Rioxe. ―Xiic.

50Ti Nicodemoe, ja' ti much'u ay sc'opon ta ac'ubaltic ti Jesuse, ti jfariseo uque, xi iyalbe li xchi'iltaque:

51―Li mantaletic cu'untique chal ti mu xu' xcac'betic castico jun jchi'iltic mi mu to bu ca'yojtic ti c'usitic chale, mi mu to bu jna'ojtic ti c'usi spasoje. ―Xi.

52Itac'av li xchi'iltaque:

―¿C'u cha'al, mi tey liquemot tal ta Galilea uc? Q'uelo lec c'usi chal li sc'op Rioxe muc'bu chal mi oy tey ta xloc' tal junuc j'alc'op ta Galileae ―x'utat ti Nicodemoe.

[53Jujun tal xa ibat ta snaic.

Currently Selected:

Svun Juan 7: LeqAC

Highlight

Copy