Svun Juan 19

1Ti Pilatoe iyal mantal ti ac'u yac'bel arsial ti Jesuse, i'ac'bat. 2Ti soltaroetique ixotic ch'ix, ixojbeic ta sjol ti Jesuse, ja' scorona ti ta alele, iyac'beic slap jlic ic'lo'an tsajal c'u'ul 3Ja'o inopojic ech'el yo bu ti Jesuse, ja' yech iyalbeic chac li'i:

—¡Toj lec ti vo'ot Reyot yu'un li jurioetique! ―Xutic.

Ja' o ismajbeic sat.

4Q'uelavilic, li' chquic' loq'uel tale ja yo' xavilic o ti muc' bu ijtabe smule, ―x'utatic.

5C'alal iloc' tal ti Jesuse, slapoj xa'ox ti corona ch'ixe, sc'u'unoj xa'ox ti ic'lo'an tsajal c'u'ule. Ti Pilatoe xi iyale:

―¡Q'uelavilic li' li vinique! ―X'utatic.

6C'alal iyilic ti totil paleetique xchi'uc ti jchabiejtemploetique, x'avlajetic xa liquel:

―¡Joc'ano ta cruz! ¡Joc'ano ta cruz! ―Xiic. Xi i'albatic yu'un ti Pilatoe:

―Iq'uic ech'el, ba milic ta cruz vo'oxuc che'e, li vo'one ch'abal smul chca'i ―x'utatic.

7―Li yaj meltsanejc'op jurioetique, itac'avic:

—Li vo'oticotique oy jleyticotic, chal ti much'u tsp'is sba ta Xch'amal Rioxe, persa chich' milel. ―Xiic.

8C'alal iya'i yech ti Pilatoe, más to ixi'. 9Ti Pilatoe i'ochic noxtoc ta yut spalacio, xi isjac'be ti Jesuse:

―¿Bu liquemot tal li vo'ote che'e? ―Xut.

Ti Jesuse muc' xtac'av. 10Ti Pilatoe ja' yech iyalbe chac li'i:

—¿C'u yu'un ti mu xatac'bone? ¿Mi mu xana' ti oy cabtel ti xu' chacac' ta milel ta cruze, xchi'uc ti xu' chajcoltae? ―Xut.

11Itac'av ti Jesuse:

—Mu c'u xu' xacha'leon ti manchuc yac'ojbot permiso ti Rioxe; yech'o un, li much'u li yac' entrucal ta atojole, ja' más tsots smul chac c'ucha'al li vo'ote ―x'utat.

12C'alal iya'i ti Pilatoe ti c'usi iyal ti Jesuse, isnop ox c'uxi tscolta; pero ti jurioetique x'avlajetic xa tajmec:

―¡Mi chacolta li vinic le'e, yu'un mu co'oluc ajol xchi'uc ti Césare! ¡Ti much'u tsp'is sba ta reye, ja' tscrontain ti Césare! ―Xutic ti Pilatoe.

13C'alal iya'i yech ti Pilatoe, iyal ti ac'u iq'ueuc loq'uel ti Jesuse, ja' o ichoti yo' bu tsmeltsan c'ope, ja' bu Gabatá sbi ta ebreo c'ope, pac'bil ton xi smelol. 14Ja'o xa ta sc'ac'alil ch-chapsbaic ta scuenta li q'uin coltaele, po'ot xa'ox ol c'ac'al. Ti Pilatoe xi iyalbe ti jurioetique:

—¡Q'uelavilic li' lavajreyique! —X'utatic.

15X'avlajetic xa liquel scotolic:

―¡Loq'ueso ech'el! ¡Loq'ueso ech'el! ¡Joc'ano ta cruz! ―Xiic.

Ijac'batic yu'un ti Pilatoe:

―¿Mi lec xa na'ic ti ta jipan ta cruz lavajreyique? ―X'utatic.

Ti totil paleetique xi istaq'uique:

―¡Li vo'oticotique chabal yan rey cu'unticotic, ja' no'ox ti Cesare! ―Xiic.

16Ti Pilatoe iyac' entrucal ti Jesuse, iyal ti ac'u ba sjipanel ta cruze, iyiq'uic ech'el.

Ja' li' yaloj ti isjipanic ta cruz ti Jesuse

(Mt 27.32-50; Mc 15.21-37; Lc 23.26-49)

17Ti Jesuse scuchoj loq'uel scruzal tey ibat yo' bu «Baquel Jol Anima» sbi li balamile, (Gólgota sbi ta ebreo c'ope). 18Tey isjipanic ta cruz ti Jesuse, isjipanic ta cruz cha'vo' viniquetic uc, ti scruzal Jesuse ja' ta o'lol. 19Ti Pilatoe iyac' ta ts'ibael jpech tabla, ja' yech yaloj chac li': «Li'i ja' ti Jesus ta Nazarete, ja' yajreyic li jurioetique» xi ts'ibabil, tey isbajbeic ta sjol scruzal ti Jesuse. 20Ep jurioetic isq'uelic ti c'usi yaloj ti c'usi ts'ibabile, yu'un tey nopol ta ti' jteclum ijipanat ta cruz ti Jesuse, ts'ibabil ta ebreo c'op, ta griego c'op, ta latin c'op. 21Ti totil paleetic yu'un ti jurioetique, ora ba yalbeic ti Pilatoe:

―Mu xa ts'iba yech chac le'e: “Ti ja' yajreyic ti jurioetique, ti xie”, más lec ja' yech xa ts'iba chac li'i: “Li'i tsp'isba ta Rey yu'un li jurioetique, xi xavac' ta ts'ibael ti yechuque.” —Xutic.

22―Itac'av ti Pilatoe:

—Ti c'u x'elan icac' ta ts'ibaele, ac'u comuc xa o yech ―x'utatic.

23C'alal laj xa'ox sjipanic ta cruz Jesús ti soltaroetique, ispasic ta chanch'ac ti sc'u'tac ti Jesuse, juch'ac iyich'ic. Istambeic noxtoc li snatil c'ue jlic no'ox jalbil ch'abal sts'is, 24Ti soltaroetique, xi iyalbe sbaique:

Mu ya'uc jatic li jlic li'i, tajincotic, jq'ueltic much'u chich' ―xut sbaic.

Ja' ic'ot ti c'usi ts'ibabil ta sc'op Rioxe: «Ta xch'acbe sbaic li jc'u'taque, ta xtajinic, ta sq'uelic much'u junucal chich' li jnatil jc'u'e.» Xi onox. Ja yech ispasic ti soltaroetic chac taje.

25Ti sme' Jesuse xchi'uc ti smuque, ja' ti María sbi uque ti yajnil Cleofase, xchi'uc ti jun María liquem tal ta jteclum Magdalae, tey va'ajtic ta yoc scruzal ti Jesuse. 26Ti c'alal iyil sme' ti Jesuse, ti ja' tey xchi'uc li yaj chanc'op ti mas sc'anoj ta jmeque, xi iyalbe li sme'e: Ants, ja' xa avol le'e ―xut.

27Ja' o xi iyalbe li yajchanc'ope:

Le'e ja' xa ame' ―xut.

Ti c'alal yech i'albate, iyic' ech'el ta jna ti sme' Jesuse.

Ja' li' yaloj ti icham ti Jesuse

(Mt 27.45-56; Mc 15.33-41; Lc 23.44-49)

28Ti c'alal ilaj chac taje, ti Jesuse sna'oj ti ic'ot xa ta pasel scotole, yo' ti xc'ot o ta pasel ti c'u x'elan ts'ibabil sc'oplal ta sc'op Rioxe, ja' yech iyal chac li'i:

―Chtaquij xa jti' ―xi.

29Tey pachal jboch binagre. Ists'ajic esponja, ixojic ta isopo te', isluchbeic muyel ta ye ti Jesuse. 30Ti c'alal ists'uts' binagre ti Jesuse ja' o yech iyal chac li'i:

—Ic'ot xa ta pasel scotol. ―Xi.

Ja' o isnijan sba, iloc' xch'ulel.

Ja' li' yaloj ti ixenbat lanza ta xocon ti Jesuse

31Ja' o xa ti c'alal ta xchapan sbaic ta scuenta li q'uin coltaele, ti jurioetique mu sc'anic ti tey jipajtic ta cruz ch-ech' yu'unic li sc'ac'alil ta scuxique, Yu'un li jun c'ac'al scuenta tscuxic taje, más to toj tsots sc'oplal cha'iic, yech'o un ba yalbeic ti Pilatoe ti ac'u yal mantal ac'u ba sc'asbel yoquic ti much'utic tey jipajtic ta cruze xchi'uc ti ac'u yic'bel loq'uel li sbec'tal stacupalique. 32Ti soltaroetique ibatic, isc'asbeic yoc ba'yi li june, ti c'alal ilaje ja' o isc'asbeic yoc li otro jun tey jipil ta cruz xchi'uc ti Jesuse. 33Ti c'alal inopojic ech'el yo' bu ti Jesuse, iyilic ti chamem xae. Yech'o ti mu xa bu isc'asbeic ti yoque.

34Ac'u mi chamem xa iyilic ti Jesuse, ti jun soltaroe ixenbe to lanza ta xocon, ora iloc' xch'ich'el xchi'uc vo'. 35Ti much'u yolel chalbe sc'oplal li c'usitic ic'ot ta pasele, ja' ti much'u iyil ta sat stuque, melel li c'usitic chale, sna'oj lec ti melel li c'usitic chale ja' yo' xa ch'unic o li vo'oxuque. 36Scotol ti c'usitic ic'ot ta pasele, ja' ic'ot ti c'usitic ts'ibabil ta sc'op Rioxe: «Mi jun sbaquel mu sc'asbat.» —Xi onox. 37Ts'ibabil noxtoc ta sc'op Riox: «Chavilic ti much'u xenbil ta lanza xocon avu'unique.» —Xi onox.

Ja' li' yaloj ti imuque ti Jesuse

(Mt 27.57-61; Mc 15.42-47; Lc 23.50-56)

38C'alal ic'ot ta pasel scotol chac taje, li José liquem tal ta Arimateae, ba sc'anbe permiso li Pilatoe mi xu' syales ta cruz ti ánima Jesuse. Ti Josee ta mucul xch'unoj ti Jesuse yu'un xi'em o li yajmeltsanejc'op ti jurioetique. Ti Pilatoe iyac' permiso ti xu' syalese, ti ac'u ba smuque. Isyales ti Josee. 39Ital ti Nicodemo uque, ja' ti ay lo'ilajuc ta ac'ubaltic xchi'uc ti Jesuse, yich'oj c'otel perfume meltsanbil ta mirra xchi'uc ta aloe oy nan (30) kilouc yalal. 40Ti Josee xchi'uc ti Nicodemoe iyic'beic ech'el sbec'tal stacupal ti Jesuse, isc'amulanic ta saquil poc', tey capal isc'amic ti mirrae xchi'uc ti aloee, yu'un ja' yech stalelic ti c'alal tsmuc sbaic li jurioetique. 41Ti bu isjipanic ta cruz ti Jesuse, oy tey nopol ts'unubaltic, oy tey ch'ojbil ton ta scuenta anima, ach' ch'en to, mu to much'u tey tic'bil. 42Ja' tey ay stiq'uic ti Jesuse yu'un nopol no'ox, ti istiq'uic ta orae, yu'un ja'o xa ta xlic ta smalel c'ac'al li sc'ac'alil ta xcuxic li jurioetique.

Currently Selected:

Svun Juan 19: LeqAC

Highlight

Copy