लूका 13

आपरो पाप लक पस्तावा करो

1वोना बेरा काही लोग गीन, यीसु ला, काही गलीली मानूस गीनको बारे मा सांगन आइन, जिनको खून को बरोबरी बलिदान कियो गयो जनावर लक, राजपाल पिलातुस ना करयो होतो। 2तबा यीसु ना उन लोग गीनला कहीस, तुम्ही काजक सोचासो का यो गलीली मानूस बाकी लोकगीन लक लगत पापी सेत, यो कारन लक, उन पर आफद आइसेस। 3असो गोस्टी नहात मी तुमी ला सागंसू, का तुमी पस्तावा कर मन नही बदलने, तो वसोच नास होय जाने। 4अखीन तुमी काजक, सोचासो का सीलोह मा मीनार पड़न को कारन 18 लोकगीन मर गईन, उ येरुसलेम को सब रव्हन वारा लक जादा पापी होतिन। 5असो नहात अदी तुमी पस्तावा कर, मन नही बदलने तो असोच नास भई जाने।

बेफर अँजीर को झाड

6तबा यीसु ना उनला, एक उदाहरन सांग्यो, कोनी, मानूस को अंगूर को बारी मा, एक अँजीर को झाड़ होत्यो। उ वोमा फर खोजन आयो पर वोला, एक भी फर नही मिलयो। 7तबा वोना अंगूर को बगीचा को माली ला कहीस, चोव! मी तीन- साल लक, यो अँजीर को झाड़ मा फर खोजन आयो, पर एकच फर नही पायो। एला, काप डाखो काहे का यो फालतू मा जघा घेरासेत। 8पर माली ना कव्हयो, मालीक यो साल अखीन रव्हन दे, मी एको, चारि कन खन्दकेना येको, जड़ मा मी खात डाखसू। 9तबा मंग भी नही फलेत, त काप दियो जाहेत।

कुबड़ी बायको ला पवीतर दिवस मा साजरो करनो

10पवीतर दिवस#13:10सब्त मा यीसु कोनी, सभाघर मा उपदेस देवत होत्यो। 11वहान एक बाई होती जोन ला 18 साल लक, एक कमजोर करन वालो, बुरो आतमा झोमो होत्यो वा वोवन केना, कुबड़ी भई गई होती। वा कसी, भी सीधी नही होय सकत होती। 12यीसु ना वोला चोवके, ना बुलायो अखीन वोला कहीस, हे बाई तु साजरी भई गइसेस। 13अखीन वोना वोको, पर हात रख्यो, उ वोच बेरा साजरो भई गई अखीन, परमेस्वर ला धन्यवाद बड़ाई देवन लगी।

14तबा सभाघर को मुखिया गीन, हिजड़#13:14गुस्सा लक भर गयो गईन काहेका, यीसु ना पवीतर दिवस मा बाई ला साजरो करीस, तबा लोकगीन कव्हन, लगीन 6 दिवस काम को सेत, वोना दिवस मा साजरो होव, अना पवीतर दिवस मा नोको आव।

15पर पिरभू ना कहीस, हे कपटी गीन का पवीतर दिवस मा तुम आपरो जानवर गधा बईल गीनला डोगा मा पानी देवसो का नही? 16का साजरो नाहती, का यो बायका जोन अबराहम को टूरी सेत, जोनला सैतान ना अठरा साल लक बन्धो होतो, पवीतर दिवस यो बंधन लक सुटाई जाय? 17यीसु को यो गोस्टी आयक केना, वोको सब बिरोध करनवारा लजा गईन, अना सप्पा लोकगीन वोना महीमा को काम चोवके खुसी लक भर गईन।

राई को दाना

(मत्ती 13:31,32; मरकुस 4:30-32)

18यीसु ना कव्हयो परमेस्वर को, राज कोन को जसो सेत, मी एको बरोबरी काजक लक करु? 19सरग को राज एक राई को दाना जसो सेत, जोनला कोनी मानूस ना बगीचा मा लगायो, वा गजब मोठयो भयी गयो, अखीन पक्सी ओना झाड़ को डार मा बसेरा करन लगीन।

खमीर को कहानी

(मत्ती 13:33)

20मंघा यीसु ना कव्हयो, “परमेस्वर को राज को बरोबरी काजक लक करु? 21वो खमीर को जसो सेत जोनला लेय के, एक बायको ना दहा किलो कनीक मा मिला दियो सबा 10 कीलो आप खमीर बन गयो।”

तंगगल्लि

(मत्ती 7:13; 14:21-23)

22यीसु गाँव-गाँव नगर-नगर सीकावत, येरुसलेम नगर को कन, जाय रहयो होतो। 23कोनी ना पुसयो ओ पिरभू! का जरा सो लोक गीन सूटकारा पाहेत?

एको पर यीसु ना कव्हयो, 24सकड़ो किवाड़ लक, धसनो को पूरो-पूरो कोसीस करो, काहेकि मी तुमी ला कव्हसू, कोसीस करनो पर भी गजब लोकगीन धसन को लायक भी नही रहेत। 25जब घरा को मालीक उभो भई केना, किवाड़ लगा देहेत, तबा तुम्हि बाहेर लक खट-खाटावने, अखीन कव्हने आमरो लाय किवाड़ उघाड़!तब उ तुम्हिला सांग देहत, तुम्ही कहान लक आइसेव, मी नही जानासू? 26तबा तुमच कव्हने, आमी तोरो संग जेवन करीसेस, तुमी बजार मा उपदेस देत होतो। 27पर उ तुमरो लक, कव्ह देहत, “अरे अन्याय को काम करन वालो, #13:27बुरा करन वालो मी तुम्ही ला नही जानासू तुम्ही कोन सेव? तुमी मोरी नजर लक हट जाओ!” 28जबा तुमी ही अबराहम इसहाक याकूब अखीन, सबा भविस्यवक्ता गीनला, परमेस्वर को राज मा चोवने, पर अपरो आप ला उन लक बेगरो चोयके तुम्हि रोवने अखीन पस्तावा करने #13:28तड़प-तड़प कर रोवना। 29दिन उगती, दिन बुड़ती, उत्तर अखीन दक्सिन का लोक गीन आहेत अखीन, परमेस्वर को राज मा मोठोयो, जेवनार मा जेवन करयेत#13:29परमेस्वर को राज मा जेवन करेत । 30चोवो जोन मघा सेत, उ पुढा भई जाहेत। अखीन जो पुढा सेत, उ मंघा भई जाहेत।

राजा हेरोदेस को कपट

(मत्ती 23:37-39)

31वोच बेरा मा काही मोसे को नियम को गुरू जी गीन, आयके सांगन लगीन, हे गुरूजी तुम्ही यहान लक, बिदाई लेलो काहेका, राजा हेरोदेस तुमी, ला मार डाखनो चाव्हासे।

32यीसु ना उनला कव्हयो, जाके ना उ कोल्हिया ला कव्हने, मी आज काल अखीन परो, बुरो आतमा गीन ला हेड़ासू, अखीन रोगी गीनला साजरो करासू, अखीन परो को दिवस मोरो काम पूरो भई जाहेत। 33आज काल अखीन परो को दिवस मोला चलनो से, काहेका यो नही होय सकासे, का कोनी परमेस्वर को भविस्यवक्ता येरुसलेम तीरथ लक, बाहेर मारो जाहेत।

येरुसलेम नगर को लाय यीसु को माया

(मत्ती 23:37-39)

34यो येरुसलेम नगर तु भविस्यवक्ता गीनको हत्‍या करासे अखीन तोरो कना, जोन परमेस्वर को गोस्टी आना सेत, वोला गोटा लक मार डाकासेत, मीना कितरो बार चाहयोसेव, का तोरो सन्तान गीनला, इक्कठो करू, जसो कुकडी आपरो बच्चा गीन, ला पंखा को खाल्या, लुकाय लेवासे असोच सबा ला, लुकाय लेऊ, पर तु ना मोरो एक नही चलन दियो। 35अता तुम्हारो घर तोरो लय, छोड़ दियो#13:35तुमरा जीवन उजडो हुया जाहेत। मी तुमी लक खरो सांगासू, तुम्हि मोला जबा तकन नही चोवने, तबा तकन तुम्हि आवन वारो बेरा मा असो नही सागंने, का धन्य से उ जोन पिरभू को नाव लक आवासे।

Currently Selected:

लूका 13: NTPSP23

Highlight

Copy