योहन 13
13
यीसु लक चेला को पाय धोवनो
1फसह को तिहार को पुढा जबा यीसु ना जान लियो का मोरी बेरा आय गयो से, का मी जगत ला सोड़के बाबूजी को जवर जावनो से, ता आपरो लोकगीन लक जोन जगत मा होतीन, उनलक जसो माया उ राखत होतो, आखरी बेरा भी वसोच माया राखिस।
2अना जबा सैतान#13:2 इबलीस समोन को टूरा यहूदा इस्करियोति को मन मा यो गोस्टी डाक चुकयो होतो, का ओला धरवाए। 3यीसु ना यो जानके की, बाबूजी ना सब काही मोरो हात मा कर देईसेस। अना मि परमेस्वर को जवर लक आईसेऊ, अना परमेस्वर को जवर जासू। 4जेवन लक उठके आपरो कपरा#13:4कपरा ला उतार देईस, अना गमछा लक आपरी कम्मर ला बाँधिस 5तबा बरतन मा पानी भरके चेला को पाय धोवन लगयो, अना गमछा लक पोसन लगयो। 6जबा उ समौन पतरस को कठा गयो, तबा पतरस ना ओला कहीस, का “हे पिरभू, का तु मोरो पाय धोवसेस?”
7यीसु ना साँगीस, “जोन मि करासेऊ, तु ओला अबा नही जानस, पर एको मंघा समज जाजोस।”
8पतरस ना ओला कहीस, “तोला मी आपरो पाय कभ्भू नही धोवन देहू।” असो आयक के यीसु ना कहीस, अदी तू मोला तोरो पाय नही धोवन देजोस ता हरामेसा को लाय तोरो मोरो काही नाता नहात।
9समौन पतरस ना ओला कहीस, हे पिरभू ता मोरो पाय ला च नही पर हात अना डोस्का ला भी धोय देव।
10यीसु ना ओला कहीस जोन आंग खोर लियो सेत, वोला पाय को सिवा अखीन काही धोवन को जरूरत नहाय, पर वा सुध्द से। तुम्हि सुध्द सेव पर सबच नही। 11उ आपरो धरानवालो ला जान गयो होतो, एको लाई ओना कहीस, तुम्हि सब का सब सुध्द नहाव।
12जबा उ उनको पाय धोय चुकयो, अना आपरो कपरा डाकके बस गयो, ता उन लक कव्हन लगयो, का तुम्हिला समजमा आयो! मिना तुमरो सँग काजक करीसेव? 13तुमी मोला गुरू अना पिरभू कव्हसो अना साजरो च कव्हसो, काहे का मि वाच सेऊ। 14अदी मी पिरभू अना गुरू होयके तुमरो पाय धोयो, तो यो जरुरी सेत का तुमी भी एकमेक को पाय धोवो। 15काहे की मिना तुमला उदाहरन चोवायो सेऊ, का जसो मिना तुमरो सँग करीसेऊ तुमी भी वसोच करो। 16मि तुमी लक खरो कव्हसू, दास आपरो पिरभू लक मोठो नही होवासे, अना ना धाडयो गयो आपरो धाड़न वालो लक, 17तुमी यो गोस्टी जानासेव, अना अदी उन पर चलो तो धन्य सेव।
18मी तुम्हि सबको बारेमा नही सांगासेऊ, काहेका जोनला मिना निवाड़ी सेव ओला मि जानासू। पर यो एको लाय भयो से का, पवितर गिरंथ को उ गोस्टी पूरो भयी जाय “का जोन ना मोरो जेवन जेयो सेत, वोनाच मोला लात मरा सेत।” 19अता मि तुमला हेत दिलासू, का जबा यो गोस्टी भय जाहे तो तुमी भरोसा करो। की मि वाच सेव। 20मि तुमी लक खरो कव्हासू जोन मोरो धाड़न वारो ला अपनावसे, उ मोला अपनावासे अना जोन मोला अपनावसे उ मोरो धाड़नवालो ला अपनावासे।
दगाबाज को कन ईसारा
(मत्ती 26:20-25; मरकुस 14:17-21; लूका 22:21-23)
21यो गोस्टी ला साँगके यीसु आतमा मा बैचेन भयो अना ओना गवाही देइस मि तुमी लक खरो कव्हसु, की तुमी मा लक एक से, जोन मोला धराहे। 22चेला गीनला संका भई की वा कोन को बारे मा सांगासे? ता वय एकमेक कन चोवन लगीन। 23उन चेला मा लक एक जोन यीसु लक माया करत होतो, ओको छाती कन नवके बसत होतो। 24तबा समौन पतरस ना ओला ईसारा करके पुसयो, साँग, उ कोन को बारे मा कव्हासे?
25तबा ओना ओच तरिका लक यीसु की छाती कन नवके ओको लक पुसिस, हे पिरभू उ कोन आय?
26यीसु ना वोकोलक सांगीस, जोनला मि यो भाकर को टुकड़ा डुबा के देहुँ वाच से, ओना टुकड़ा ला डुबायके समोन इस्करियोति को टूरा यूदूस ला देईस। 27टुकड़ा लेवन को मंघा सैतान ओमा समाय गयो। तबा यीसु ना कहीस, जोन काम तु करन चाव्हासेस वा गदने कर। 28पर बसन वालो मा लक कोनी नही जान पायो, का यो गोस्टी ओना ओला काय लाई कहीस। 29यहूदा को जवर पियुसी रव्हत होतो एकोलाय काही-काही ना समजीन का यीसु ओला यो कव्हासे जो काही हमला तिहार को लाई पाहिजे उ लेके आन। या यो कहीस, गरीब गोर ला काही देव।
30येने परकार लक उ टुकड़ा धरयो अना बाहेर हीट गयो, वा रात को बेरा होती। 31जबा उ बाहेर चली गयो ता यीसु ना कहीस अबा मानूस को टूरा को बड़ाई#13:31 महिमा होवासे, अना परमेस्वर की महिमा ओमा भयोसे। 32अदी ओमा परमेस्वर की महिमा होवासे, तो परमेस्वर भी आपरो लक ओकी महिमा करेत, अना तुरतई करेत। 33ओ टूराहुन, मि जरा सो बेरा तकन तुमरो जवर सेउ, मंग तुम्हि मोला ढुंढने, जसो की मि यहूदिगीन लक कव्हसू, जिता मि जावासेऊ, उता तुमी नही आय सको, वसोच तुम्हिला भी कव्हासू। 34मि तुम्हिला एक नवतो हुकूम देवासु, का एकमेक लक माया करो, जसो मि तुम्हरो लक माया राखासु, वसोच तुम्हि एकमेक लक माया राखो। 35अदी आपसी मा माया राखो, ता सबच जान जाहेत, का तुम्हि मोरो चेला आव।
पतरस ला मना करन को ईसारा
(मत्ती 26:31-35; मरकुस 14:27-31; लूका 22:31-34)
36समौन पतरस ना ओला कहीस, हे पिरभू तु किता जावसेस? यीसु ना जवाब देइस, जिता मि जावसु उता तु नही आय सकस, पर येको मंघा मोरो मघानी आवजोस।
37पतरस ना ओला कहीस, हे पिरभू अबा मि तोरो मंघा काय लाई नही आय सकु? मि तो तोरो लाई आपरो जान भी दे देहुँ।
38यीसु ना जवाब देइस, का तु मोरो लाई आपरो जान देजोस? मि तोरो लक खरो सांगासु का कुकड़ा चिल्लावन को पहले तु मोरो नाव लक तीन डाई मुकर जाजोस।
Currently Selected:
योहन 13: NTPSP23
Highlight
Share
Copy
Want to have your highlights saved across all your devices? Sign up or sign in
The New Testament in Powari Language © The Word for the World International and Powari Madhya Pradesh, 2023.
