Mark 8

Jésu bigé kalang dubu poddin do

(Matié 15:32–39)

1A duro wolé lé na, kalang ga yaué combu yau, ké waia henga ga do ’eno, Jésu té anjama gai, ddi yégé wa: 2’Enung sol kalang lé kua nyageigé, cawa labegé kanga wolé subu gusung, ké wa do ’eno. 3’Enung nia ddagé ’era tagang kurang na, cindegé da ’yé hermdégé, ka aserdong giyong laiga, cawa ga pena a duroigé saga a suguddong. 4Anjama gai jogu ’engeri wa: Na da wai wo go bbalé kalang lé kua mam a duro gada kua ando ga? 5Jésu ’engerge’ wa: Wo kobegenga mena ga? Ké jogu yei wa: Na jurgum.

6Kardené ddi si kalang ga yaué combu kandia jima dugo. Kardené ddi nyim wo go jurgum lé, ddi lei Kumu désé, ddi bbodelé dugo. Ddi bigé anjama gai ca kandia gusindagé kalang ga yaué combu lé, ga anjama gosindégé bu’. 7Kanga gusu go karang bbani, Jésu lei Kumu dése ca gusa lé, ddi bigé anjama gai ca kandia gusindagé bu’. 8Ké di, ké aidong. Anjama gai yaudé to do jo wondé burong jurgum. 9Kalang lé mainya dubu poddin kain, kardené Jésu ddégé ’yé. 10Kobipadda ddi nai duro kuburo dang anjama gai, ké ’yé ca gesong ga Dalmanuta.

Ga Parisié ’enger gié go dono go kagelokemo

(Matié 16:1–4)

11Ga Parisié ’yé gusu Jésu, ké mainyi. Ké ’engeri kondia gelgé gié go dono go kagelokemo go ba saga a gusu Kumu, ké gesauia gesaué. 12Ddi dor habé subbuk, ddi ’engergé wa: Kalang ga cakcak kua lé kua ’enger henga ga gelé ga kagelokemoa cawa ga? ’Enung wa yogenga cindi waldong wang: Ké go gelegeng henga ga gelé ga kagelokemo ’eno. 13Kardené ddi ddégé, ddi jogu nai duro kuburo, ddi hadu tagu kuaba koné.

Subugu do Parisié togé dang do Hérod toi

(Matié 16:5–12)

14Anjama gai guiobu, ké aia wo kobegé ’eno. Kanga wo pena kiddi kiddi a duro kuburo lé. 15Jésu géjegé, ddi yégé wa: Lageng angal, ga maga gusugengang subugu do ga Parisié togé, dang subugu do Hérod toi. 16Anjama gai yé gusugé wa: Ddi yé kainya ca na ba aiang wo kuabena ’eno. 17Jésu sol kual go ké ba ye, ddi ’engergé wa: Cawa ma keng yé wa: Niang wo ’eno ga? Keng ja ’eno dé ga? Cakcak kua kau keng sela to ’eno de’ ga? Solé gogeng leba lebé ga? 18Cindugeng wo kené, keng sela ’eno ga? Gesemegeng wo kené keng ja ’eno ga? Keng henu gusugeng ’eno bu’ ga? 19Kiddin ga ’enung ba bbodelé wo go bai dugo ca kalang ga dubu bai na, keng yaudé to do jo wondé borong mena ga? Ké jogu yei wa: Moac ca sua. 20Jésu ’engergé wa: Kiddin ga ’enung ba bbodelé wo go jurgum dugo ca kalang ga dubu poddin na, keng yaudé to do jo wondé borong mena ga? Ké jogu yei wa: Jurgum. 21Jésu ’engergé wa: Keng sela to ’eno dé ga?

Jésu hangu go bibé cindi a Bétsaida

22Ké ’yé Bétsaida. Ké gol kema go bibé pena ’yang nai gusu Jésu, ké oli ca kondia cili. 23Jésu ’yom go bibé lé kobi, ddi ’yang nai kara gulong dong, ddi han kalu si cindi, ddi si kobi cai, ddi ’engeri wa: Ji wa solé henga ga? 24Ddi ai cindi dang, ddi yei wa: ’Enung wa solé kalang, ’enung solgé mainya haiyong kain, ama ké wa oré. 25Jésu jogu si kobi cin bibé lé ddang, go bibé sol kiddin tumoi ddar, ddi wai labia, ddi sol henga mam carara. 26Kardené Jésu ddei kondia ’era tai, ama ddi yei wa: Ji oré duro gulong ’eno.

Piér yé waldong wang Jésu na Krist

(Matié 16:13–20; Luk 9:18–21)

27Jésu andong dong kang anjama gai. Ké ’yé duro gulong go gemdong dang go karang ca gesong ga Sésaré Pilip. Kiddin ga kang oré giyong dé na, ddi ’enger anjama gai wa: Kalang wa yo wa: ’Enunga wang ga? 28Ké jogu yei wa: Ga pena yé wa: Jia Jâ go disé kalang to kang. Kané yé wa: Jia Eli, kané ga ddang yé wa: Jia go cogelé kebu go Kumu koi go pena. 29Jésu ’engergé wa: Keng gang yé gogeng na, ’enunga wang ga? Piér jogu yei wa: Jia Krist. 30Jésu sigang dono kandia yoi kema pena ’eno.

Jésu yé kual go temaidi kua dang belé goi goang cindi a duro ga maré

(Matié 16:21–28; Luk 9:22–27)

31Kardené Jésu osum gelé anjama gai, ddi yégé wa: Na gad Kema Kurondi gel cin combu, kalang ga gemdong, dang ga tibé Kumu gemdong gagé, dang kalang ga gelé so go Kumu koi, ka kainyi, ka deddi, kardené wolé go subu ddia belang cindi a duro ga maré. 32Ddi yégé kual lé carara, kardené Piér goli kaindi pena, ddi osum géjei. 33Ama Jésu polin sol anjama gai, ddi al Piér, ddi yei wa: Sidan, ’era waldong has dang nang, cawa ’eremé goinya main go Kumu koi kain ’eno, ama mainya kalang kogé kain.

34Kiddin ga Jésu ba té kalang ga yaué combu, kang anjama gai gusi na, ddi yégé wa: Kema go nia dar orang nang na, ddoi ddi ’eremé ca gusi ’eno, ddai ddi aia adegelé goi, ddi kubang. 35Cawa kema goni goni goa dar ca minyé gusi na, ddia basi cong, ama kema goni goni goa basu gusi cong cang ca Nô do Ddari na, ddi da minyei. 36Kema nia wai henga duro delinya mam ma, ddi basu keudi cong na, ddia waia jégené wa ga? 37Kema da bua wa ca torang keudi ga? 38Kema goni goni goa lé dasi cang dang kual guang a duro kalang ga geddang dang Kumu ’eno, dang ké ga cakcak ga lo isinwa lé kua na, Kumu Kurondi da lé dasi cai kiddin ga ddia ’erga duro hormo do Bai toi daiang kangiyong gai ga arin carara.

Currently Selected:

Mark 8: TNG1978

Highlight

Copy