Mark 6

Kalang ga Nasarat bu cindi ca Jésu ’eno

(Matié 13:53–58; Luk 4:16–30)

1Jésu andegang a kiddin lé, ddi jogu ’yé gulong go gumu go ddi ba malgu kené, anjama gai bei. 2Kiddin ga wolé go jurgum ba bbal na, ddi osum gelé kalang duro kulu go yaué go Juib kogé. Kiddin ga kalang combu ba jé gelé goi na, ké sol kagelokemo, ké yé wa: Kema lé wai henga lé kua ando ga? Ké bigi narua la ando do lo gié go dono go kagelokemo go main kain ga? 3Ddi nia go habelé kurondi ’eno ga? ’Yoi nia Maram ’eno ga? Jak kang José kang Judé kang Simon nia karmei ’eno ga? Karmei ga kandu kau nia duroina kau ’eno ga? Kederégé homdégé cai. 4Jésu yégé wa: Kalang mam bu go cogelé kebu go Kumu koia hormo, ama a tai duro kalndi na, ddi go wo hormo ’eno. 5Jésu la gié go dono go kagelokemo a kiddin lé ’eno, ama ddi si kobi ca kalang ga hoamya ga pena mera, ddi bigé labia. 6Ddi sol kagelokemo ca bo cindi gogé wié.

Jésu gi anjama gai moac ca sua, ddi gigé sua sua ca doré kual

(Matié 10:5–15; Luk 9:1–6)

Kardené Jésu dal gulong go karang go lurang nagé ca gelé kalang. 7Ddi té anjama gai moac ca sua gusi, ddi gigé sua sua, ddi bigé dono ca habé ga isini. 8Ddi segang dono: Ddo keng aié henga pena kobegeng ca ’orang ’eno, na cilang mera. Ddo keng aié wo ’eno, kau magela, kau laré duro jinadi dogeng. 9Ama keng si giabé gondigeng ama keng nyimé badigé sua sua ’eno. 10Ddi yégé com: Gulong go gumu goni goni go kenga gesin kené na, ga jimageng duro gulong go ké ba ’yalgeng kené bera oré gogeng. 11A kiddin gani gani mam ga ké ’yageng ’eno, ké ja kual gogeng ’eno bu’ na, kiddin ga kenga ca andong na, ga ddageda ususu do gondugeng cong ca hendé caigé. 12Anjama lé andong dong, ké dor kual ca kalang bega kebegé. 13Ké tai habé ga isini cong combu, ké bu kalang ga hoamya nain labia, ké sargang suang.

Maré go Jâ go disé kalang to kang koi

(Matié 14:1–12; Luk 9:7–9)

14Kelma Hérod jé kual go Jésu koi cawa gusondi aju kiddin mam. Ga pena yé wa: Jâ go disé kalang to kang la belang cindi a duro ga maré, na ca ma ddi wa loang gié go dono go kagelokemo la ca. 15Ama ga pena yé wa; Na Eli, kané yé wa: Na go cogelé kebu go Kumu koi main ga cogelé kebu go Kumu koi ga tumu kain.

16Kiddin ga Hérod ba jé kual lé na, ddi yé wa: Na Jâ go ’enung ba wal cai la belang cindi a duro ga maré. 17Hérod banga gié ’yomé Jâ, ké saddi, ké debi duro gerngang ca Hérodia do kermi Pilip tamdi do ddi ba buadda. 18Cawa Jâ yei Hérod wa: Na ddar ca ji boddu kermin tamdi ’eno. 19Hérodia kedera homa, to soddi, to dar ca toa deddei, ama to bbala ’eno ca Hérod. 20Hérod lé Jâ muro cawa ddi soli ca kondia kema go ddari dang go carara bu’, ddi magi ddar. Kiddin ga ddi ba jé kual goi na, ddi ’erem nain, ama ddi jeianga gusu mowa.

21Ama Hérodia wai kiddin ga deddei. Kiddin ga ddegelé do Hérod toi do wo ba bbal na, ddi lé soré, ddi té kalang gai ga gemdong dang garngalang gai ga kembel dang gemdong ga ca gesong ga Galali. 22Hérodia turma andong duro soré, to waddu, Hérod gusi mowi nain ca waddé gua dang ké ga jomang nai. Hérod ya turmo lé wa: ’Ulang henga ga mé ba dargé a gusung, ’enung da béang nagé. 23Ddi bbesé gusi, ddi ya wa: Henga gani gani ga mé ’olung na, nia leu duang kuaba pena kau, ’enung da béang na. 24Turmo lé andong dong, to ’yé ’engeré ’yoa wa: ’Enung ’ulaia wa ga? To jogu ya wa: Jâ go disé kalang to kang cai. 25Kuabapadda to boi ca suada kala ’yé gusu kelma, to yei wa: ’Enung dar ji bung Jâ go disé kalang to kang cai duro dalin cakcak kua. 26Kelma kederei homi bbani ’eno, ama ca bbesé go ddi ba bbesé gusi tumu ké ga jomang nai na, ddi wa kual go nara ’eno. 27Kobipadda kelma gi paja goi go magei, ddi si kandia ’erangang Jâ cai. Paja lé ’yé, ddi walga Jâ cai a duro gerngang. 28Ddi ’ergang cai duro dalin bo turmo lé, kardené turmo ’yé boa ’yoa. 29Kiddin ga anjama ga Jâ kai ba jé nô lé na, ké ’yé ai temaidi ’emba.

Jésu bigé kalang dubu bai do

(Matié 14:13–21; Luk 9:10–17; Jâ 6:1–14)

30Pajerong ga gié yau gusu Jésu, ké yei kual ca henga mam ga ké ba légé bua, dang henga gani gani mam ga ké ba gelgé bu’. 31Kalang ga orang dang ga jogé wo kené combu, Jésu kang anjama gai wa kiddin ga do henga ’eno. Na ca ma ddi yégé wa: Ga ’erang, na oregeng duro gada ni, ca keng bega gelalé sam dé. 32Ké nai duro kuburo kaindigé, ké ’yé duro gada kiddin ga kema wo ’eno kené. 33Ama kiddin ga ké wa oré na, kalang combu solgé, ké gergu dang gondigé a gulong go gemdong mam, ké boi Jésu kang anjama gai tumoigé.

34Kiddin ga Jésu ba nai dang a duro kuburo na, ddi sol kalang ga yaué combu nyageigé, cawa ké mainya gamgé ga go magegé wo ’eno kain. Ddi osum gelgé henga nain. 35Kiddin ga teba wa karé na, anjama ga Jésu kai ’yé gusi, ké yei wa: Kiddin lé na duro gada, teba wa karé. 36Ddagé ké ’era duro gulong go a duro yagé dang go karang go lurana, ké ’era kelu henga ga do. 37Jésu jogu yégé wa: Keng gang ga bigé henga ga do. Ama ké yei wa: Ji dar ca ni ’era kel wo go bbalé laré aru sua, ni bigé, ké da ga? 38Kardené Jésu yégé wa: Wo kobegenga mena ga? Ga ’era sela dé. Kiddin ga ké ba sol na, ké yei wa: Na wo bai dang gusa sua.

39Kardené Jésu si anjama gai, kandia pageda kalang lé jima dugo beram beram ca hademé ga laddé. 40Ké jom dugo kor ddara, ddara do pena aru, do pena to bai. 41Kardené Jésu nyim wo go bai dang gusa go sua lé, ddi ai cindi dang, ddi lei Kumu désé, ddi bbodelé dugo, ddi bu anjama ca kandia sigé tumoigé. Ddi gosinyigé gusa go sua lé duroigé mam bu’. 42Ké mam ké di, ké aidong. 43Anjama gai yaudé wo toi do jo dang gusa wondé borong moac ca sua. 44Ké ga ba di wo lé na, bainyong bbal mainya dubu bai kain.

Jésu ’yé ca kang ga tagu

(Matié 14:22–23; Jâ 6:15–21)

45Kobipadda Jésu osu anjama gai ca kandia na duro kuburo hadda tumoi ’era a tagu kuaba koné a gusu gulong go Bétsaida. Ddia bogé kalang ga yaué combu lé ’era jua dé. 46Kiddin ga ddi ba bégé na, ddi nai ca kubung go gumu ca olé. 47Kiddin ga teba ba ka na, kuburo wo a duro tagu ddar, Jésu ji ca haiwa kaindi pena. 48Ddi sol anjama gai wa gaué gusugé polé kuburo, cawa kal jiga caigé. Ti do keddebor ddi ’yé gusugé, ddi wa oré ca kang main go halegé kain. 49Ama kiddin ga ké ba soli wa oré ca kang na, ké ’erem na tiddin, ké soi tumoigé dang suré, 50cawa ké mam soli, ddaindigé algé, ké lé muro, ama ddi yégé wa: Ga segeng ddaindugeng dugo, na ’enung, ga lo muro ’eno. 51Kiddin ga ddi ba nai gusugé duro kuburo na, kal dilé juam. Anjama gai sol kagelokemo bbani ’eno. 52Ké sela gié go dono go kagelokemo go wo lé koi toi ’eno ca narua dogé bbala ’eno.

Jésu bigé kalang ga hoamya labia a ca gesong ga Jénésarét

(Matié 14:34–36)

53Kiddin ga ké ba haddu tagu lé na, ké gesin ca gesong ga Jénésarét, ké saddu kuburo gogé lé dugo. 54Kiddin ga ké ba gesingu a duro kuburo lé na, kalang lé sol ca na Jésu. 55Ké geré ca gesong mam ga lurang nai. A kiddin mam ga ké ba jé na kondia wo kené na, ké nyim kalang ga hoamya duro kuiyong gagé ’yé gusi. 56A kiddin mam ga Jésu ba ’yé kené na, a duro gulong go karang dang gulong go gemdong, dang gulong go duro yagé, kalang ’yang kalang gagé ga hoamya, ké bégé to gasgo. Ké oli ca kondia dda kandia cil badigé gai kebegé. Ké ga ba cili na, ké wai labia mam.

Currently Selected:

Mark 6: TNG1978

Highlight

Copy