Mark 16

Belé go Jésu koiang cindi a duro ga maré

(Matié 28:1–8; Luk 24:1–12; Jâ 20:1–10)

1Kiddin ga wolé go jurgum ba hal na, Maram do Magdala, dang Maram do Jak ’yoi, dang Salomé bu’, ké kel suang go ddowa tuna ca ka oré loi Jésu gusi. 2Kara wolé go jurgum, na wolé go tumu dang joguddu, kiddin ga teba wa andong, ké ’yé ca kemgané. 3Ké ’enger gusugé wa: Na wanga go oré hengddana keddang a kebu ’umbung lé cong ga? 4Ama kiddin ga ké ba ai cindegé ké sol keddang go gumu lé dang hengddé durné ka’. 5Ké andong duro ’umbung, ké sol marna dang jomé ca kuaba go barua, ddi si badigé ga béré gusi, ké piyong muro. 6Ama ddi yégé wa: Ga logeng muro ’eno, keng dara Jésu go Nasarat go ké ba bbobeli ca sia go adegelé, ddi belang cindi, ddi wo ’eno ba. Selageng kiddin ga ké ba dibi. 7’Erageng cakcak kua, keng ’yé yogé anjama gai dang Piér, ddi tol tumoigé a Galali, kenga soli a kuani main ddi ba yegengang kain.

8Ké andong dong, ké geré a kebu ’umbung waldong dang yoré dang muro, ama ké yai kema pena ’eno, cawa kanga muro.

Jésu gel gusi cin Maram do Magdala

(Matié 28:9–10; Jâ 20:11–18)

9Kiddin ga Jésu ba belang cindi a duro ga maré na, ddi gel gusia cin Maram do Magdala tumu jua duro wolé go tumu dang joguddu coalala. Na to do ddi ba tai habé ga isini jurgum a kedera cong. 10To ’yé yogé ké gang nai kené tumu, kanga nyagé dang ’elé. 11To yégé wa: Jésu na wo kenang cindi, toa soli. Kiddin ga ké ba jé kual lé na, ké bu cindi ca kual gua lé ’eno.

Jésu gel gusi cin anjama sua

(Luk 24:13–35)

12Kiddin ga anjama kané sua a duroigé wa oré duro giyong na, Jésu gel gusi dang gené go ddang cindegé. 13Ké boi caigé ’yé yogé kamdigé kané, ama ké bu cindi ca kual gogé ’eno bu’.

Jésu gel gusi cin anjama ga moac ca pena

(Matié 28:16–20; Luk 24:36–49; Jâ 20:19–23; Gié 1:6–8)

14Kardené Jésu gel gusi cin anjama ga moac ca pena, kiddin ga ké wa do. Ddi bojigé ca kandia bo cindi nain ’eno ca ’ermé gogé go duro ddaindigé go sua sua, cawa kandia basé bu cindi ca kual go ké ba soli, kiddin ga ddi belang cindi a duro ga maré. 15Kardené ddi yégé wa: ’Erageng duro delinya mam, durageng Nô do Ddari gusu kalang mam. 16Kema goa bu cindi na, ga disi to kang, ddia minyé, ama kema goa bu cindi ’eno na, kual go kaidé da ’yomi. 17Kua na henga ga kagelokemo ga ké ga bo cindi da légé. Ka tai habé ga isini cong dang gusandang, ka yé kualang kebu go herua go ddang cindi kaindi kaindi. 18Ké nia nyim kumbuloang kalndigé kau, ké nia sa kema go ddainyi goni goni kau, go deddegé ’eno, ka si kalndigé ca kalang ga hoamya, ka wai labia.

Jésu jogu tol gusu Kumu

(Luk 24:50–53; Gié 1:9–11)

19Kiddin ga Bagulong Jésu ba yégé kual lé ka na, kardené Kumu aii dang, ddi jom ca Kumu kobi go barua. 20Ga anjama ’yé ca doré Nô do Ddari a kiddin mam, Bagulong wa lo gié daiang nagé dang hendé do henga go gelé ga kagelokemo ga ké wa lo, ca kalang sela ca gelé gogé lé na go cindi.

Currently Selected:

Mark 16: TNG1978

Highlight

Copy