Mark 14

Kermeleng nyan kual ca ’yomé Jésu

(Matié 26:1–5; Luk 22:1–2; Jâ 11:45–53)

1Ji wolé sua ca lo soré go kederé cindi go ké lé wo go basé debei subugu. Gemdong ga tibé Kumu dang kalang ga gelé so go Kumu koi na, ké dar ka ’yomé Jésu dang bandu ca deddei. 2Ama ké yé wa: Ddo na ’yomoi duro soré go kederé cindi ’eno, cawa kalang da saiang suré.

Tama bé suang go ddo tuna ca Jésu

(Matié 26:6–13; Jâ 12:1–8)

3Jésu wo a Bétani ta Simon go kaja gulong, kiddin ga ddi ba jom kebu do na, tama do pena ’yé gusi dang kumbulu go suang go ddo tuna nain go kelei combu go ké ba leiang kajaju go ddari. To hangu kumbulu lé kibi, to bé suang lé ca Jésu. 4Ama ga pena a duroigé kederégé homdégé, ké ’enger gusugé wa: To toin suang lé cong kainya cawa ga? 5Ké nia kel suang lé cong na, laré goi da ddi silé aru subu ca bo kalang ga nyagé. Ké boju tama lé nain. 6Ama Jésu yé wa: Ga dda kené jang, keng boja kainya cawa ga? To la gié go ddari ca kuandang. 7Cawa ga nyagé wo kenang nageng waindo waindo. Kiddin ga kenga dar ca logé ddarua na, keng bbal ca logé, ama ’enung go jomang nageng waindo waindo ’eno. 8To la henga ga to bbal logé. To bong suang gusung tumu jua, to nyana gusung ca ’embang. 9’Enung wa yogenga cindi waldong wang: A Kiddin gani gani ga ké dor Nô do Ddari duro delinya mam na, ka yé kual go gié go tama lé kua ca ’eremang na.

Judas dar ca aié Jésu gangeldi bogé gemdong ga tibé Kumu

(Matié 26:14–16; Luk 22:3–6)

10Kardené Judas Iskariot, ddia go a duro ké ga moac ca sua, ddi ’yé gusu gemdong ga tibé Kumu ca aié Jésu gangeldi bogé. 11Kiddin ga ké ba jé kual lé na, gusugé mougé, ké dori kebu ka da bi laré. Judas osum daré kual go bogé Jésu kobegé.

Jésu di do go kederé cindi kang anjama gai

(Matié 26:17–25; Luk 22:7–14, 21–23; Jâ 13:21–30)

12Wolé go tumu go kederé cindi go ké lé wo go basé debei subugu, na wolé go ké ba wadelé gamgé ca kederé cindi, anjama ga Jésu kai ’engeri wa: Ji dar ca nia ’era nyana kiddin ga jia di do go kederé cindi kena andi ga? 13Kardené Jésu gi anjama gai sua, ddi yégé wa: ’Erageng duro gulong go gumu, kema da jimyegengang bberi do kang kordi, ga kubai. 14Gulong go ddia andong kené na, ga yai gulong bagulondi wa: Bagulonga ’enger wa: Kiddin ga ’enung da di do go kederé cindi kené niang anjama gang wa andi ga? 15Ddia gelgeng kulu go porio go gumu go ca mengai, henga mam wo kenang nyané, keng lana do kené. 16Anjama gai ’yé, ké andong duro gulong go gumu lé, ké wai henga mam main Jésu ba yegang kain, ké lé do go kederé cindi lé kené.

17Kiddin ga teba ba ka na, Jésu ’yé kang anjama gai moac ca sua. 18Kiddin ga ké wo kebu do na, Jésu yégé wa: ’Enung wa yogenga cindi waldong wang, go pena a duroigeng go wa doang nang ddain da ai gengeldeng. 19Ga anjama mam kederégé homdégé bbani ’eno, ké osum ’engerei pena pena mam: Na ’enung laba? 20Jésu jogu yégé wa: Na go pena a duro keng ga moac ca sua go so kobi duro ’engo penang nang. 21Cawa Kema Kurondi da ma main ké ba pasuang cai duro cidab do Kumu toi kain, ddi go aié Kema Kurondi gangeldi na, bagen doi, ké nia wa kema lé ’eno kau golgo.

Yaué go melaué

(Matié 26:26–30; Luk 22:15–20; 1 Kor 11:23–25)

22Kiddin ga ké wa do dé na, Jésu ai wo, kardené ddi lei Kumu désé, ddi bbodelé dugo, ddi bigé anjama gai, ddi yégé wa: ’Yageng, kua na gusung. 23Kardené ddi ai ddarin doang sur kangndo, ddi lei Kumu désé, ddi bigé, ké mam si. 24Jésu yégé wa: Kua na kebardeng go da bé dugo ca kalang combu, na kebar go jamé kebu go doré go Kumu koi go herua. 25’Enung wa yogenga cindi waldong wang: ’Enung go so sur kangndo ddang ’eno, bera wolé go ’enung da si sur kangndo ga herua dang nageng a duro Leu do Kumu toi. 26Kiddin ga ké ba dé kera go debainyé na, ké andong dong, ké ’yé ca kubung goang taber.

Jésu yé kual tumu ca Piér ddainya da main ddia selai ’eno

(Matié 26:31–35; Luk 22:31–34; Jâ 13:36–38)

27Jésu yégé anjama gai wa: Keng mam da ddeng cawa ké ddogin a duro cidab do Kumu toia main kain. ’Enung da deddu go magé gamgé, gamgé da ddasindé mam. 28Ama kiddin ga ’enunga belang cindung a duro ga maré na, ’enung da ’yé ni tumoigeng a Galali. 29Ama Piér yei wa: Ké mam nia ddain kau na, ’enung go ddoin ’eno bering. 30Jésu jogu yei wa: ’Enung wa yoinya cindi waldong wang: Soindo do labegé lé kua na, jia main ca jia selang ’eno cain subu jua ma, kudda sai al dé. 31Ama Piér yei kualang dono bbani ’eno, ddi yei wa: Ca ’enung selain ’eno na, ’enung go mainyé kain ’eno bering, ni wia maré kau, na gad ’enunga ma nang nain. Anjama kané mam yé main kain bu’.

Jésu ol Kumu duro yagé go Jéséméné

(Matié 26:36–46; Luk 22:39–46)

32Ké ’yé duro kiddin ga ké ba tégé Jéséméné, Jésu yégé anjama gai wa: Jimageng kua jang, ’enung oré olé. 33Kardené ddi gol Piér dang Jak dang Jâ daiang nai. Gusi melai ddeng ddeng, ddi sol kegero bu’. 34Ddi yégé wa: Kedereng wa homang nain main ’enunga mara kain, jimageng ba, keng jom yoal yoal. 35Ddi ’yé tumu suguddong lam, ddi kembé dugo, ddi ol, ddi yé wa: Nia ané na, dda kiddin ga gelé go cin lé kua hala cang cong. 36Ddi yé wa: Ai bang, henga mam bbala bbalé gusin, ji aia ddarin doang homé lé kua cang cong cigad, ama lo main ’enung ba darang kain ’eno, ama la mainya ji ba darang kain.

37Kardené ddi jiga gusu anjama ga subu lé, ddi waigang kung. Ddi ’enger Piér wa: Simon, ji woia kung ga? Ji bbala jomang cindin kiddin pena ’eno ga? 38Jimagengang cindegeng, ga ulageng ca ddo keng aserong duro lamé ’eno. Habé ga kema kai dar ca lo henga ga ddari, ama gusia todero.

39Ddi jogu ’yé olé com. Ddi ya kual go tumu lé com. 40Kardené ddi jiga gusu anjama gai, ddi waigang kuidé kung, ké hanga cindegé ’eno bua, ké wa kual go yoi ’eno bu’.

41Kiddin ga ddi ba jiga cai do subu na, ddi ’engergé wa: Keng woia kung com laba, keng gelalé ga? Bbal ’enda, kiddin jia ’yoab ca ké bu Kema Kurondi kuaba kalang ga isindong. 42Sageng dang, na oregeng, sela kema go aié gangeldeng woi kua.

’Yomé go Jésu koi

(Matié 26:47–56; Luk 22:47–53; Jâ 18:3–12)

43Kiddin ga Jésu wa yo kual dé na, Judas, ddia anjama go a duro ké ga moac ca sua ’yé gusiang kalang combu kang gesengar dang cilaiyong kobegé. Gemdong ga tibé Kumu dang kalang ga gelé so go Kumu koi dang ga gemdong, ka giegang. 44Judas go aié Jésu gangeldi lé gel kalang lé henga ga gelé ca kandia da sela na kondi lé, ddi yégé wa: Kema go ’enunga ’uindei na, na ddi go keng wa darei lé, ga magai ’imai, keng ’yang nai. 45Kiddin ga Judas ba ’erga na, ddi ’yé gusu Jésu, ddi yei wa: Bagulong, kardené ddi ’uindei. 46Ga pena si kobegé ’yom Jésu. 47Ama go pena go ’eré a duroigé dor gesengar goi, ddi cobu gumu go tibé Kumu marnei semai cong bbad. 48Jésu ’engergé wa: Keng ’ergang gesengar dang cilaiyong ca ’yomang main ’enunga go koié kain ga? 49’Enung wo duroigeng waindo waindo ca gelé kalang duro kulu go yaué go Kumu koi, keng ’imang ’eno, ama kual lé sera to cidab do Kumu toi. 50Kardené ga anjama mam geré ddei.

51Marna pena kobu Jésu, ddi pandel badigé gusi, ké dar ’yomoi. 52Ddi wujejé badigé lé, ddi geré gandela.

Jésu ’eré tumu kalang ga bedang

(Matié 26:57–68; Luk 22:54–55, 63–71; Jâ 18:13–14, 19–24)

53Ké ’yang Jésu ta gumu go tibé Kumu. Na kiddin ga gemdong ga tibé Kumu mam, dang kalang ga gemdong, dang gemdong ga bedang kagé ga yaué kené. 54Piér jaga kara Jésu suguddong. Ddi kobi ’yé andong duro geru go gumu go tibé Kumu koi. A kiddin lé ddi jom kang asengeriyong ca ’yobé tua.

55Gemdong ga tibé Kumu mam dang gemdong ga bedang, ké dar kual go soi Jésu cai ca ka deddei cong, ama ké wa kual cai ’eno. 56Kalang combu yé kual go poi cai, ama kual gogé daia pena ’eno. 57Kalang ga pena sai ’eré yé kual go poi go ddang cai, ké yé wa: 58Ni jé ddi yé wa: ’Enung dosu kulu go yaué go Kumu koi go kalang ba gaddi, ama kardené wolé subu ’enung da gaddu go ddang main gaddé go kalang kogé kain ’eno. 59Ama kual gogé daia pena ’eno bu’.

60Gumu go tibé Kumu sai dang tumoigé mam, ddi ’enger Jésu wa: Ji go debégé kual cainé ca kual go kalang lé wa soi cain kua ’eno ga? 61Ama Jésu sugoi kibi kurad, ddi debu kual cainé ’eno. Gumu go tibé Kumu jogu ’engeri wa: Jia Krist go Kumu go busu Kurondi ga? 62Jésu jogu yei wa: ’I, na ’enung lé, keng mam da sol Kema Kurondiang jomé ca Kumu kobi go barua go dono, keng da soliang orang duro meddalin do dang bu’. 63Kardené ga tibé Kumu gumu gogé lé sagu badigé gai, ddi yé wa: Na dargenga hendé do ddang com ga? 64Keng ja, ddi yé kual go bbojo ca Kumu, keng ’erema mena ga? Ké mam yé wa: Ddi bbala deddé.

65Ga pena sai tibé kalu cin Jésu, ké saddu cindi, ké kibi togé, ké yei wa: Jia go solé kual go mendem ma, yani dé, na wanga dogoin kua ga? Asengeriyong sai ’yé Jésu teiang kobegé bu’.

Piér main ddia sela Jésu ’eno

(Matié 26:69–75; Luk 22:56–62; Jâ 18:15–18, 25–27)

66Kiddin ga Piér dang jomé dugo a duro geru na, gumu ga tibé Kumu gumu gogé tembali doi do gié ’yé gusi. 67To sol Piér dang jomé wa ’yobé tua. To soli ddér, to yei wa: Ji kau, jia goang Jésu go Nasarat lé bu’. 68Ama Piér main, ddi ya wa: ’Enung selai ’eno, ’enung ja kual go mé wa daré ca yoi lé toi ’eno. Kardené ddi andong kebu gulong dong, kudda sai al. 69Ama tembali lé soli, to jogu yégé kalang ga ’eré a kiddin lé com: Kema lé kua na kogé bu’. 70Ama Piér main com: Kardené sam kalang ga ’eré a kiddin lé, ké yei Piér wa: Cindi, jia kogé cawa jia go Galali bu’. 71Ama Piér osum bbesé gusi, ddi yé wa: ’Enung nia ya cindi ’eno na, dda Kumu ddi si kual cang. Kema go keng wa yo kual goi lé na, ’enung selai ’eno. 72A kiddin lé gang padda kudda sai al, alé go cai sua. Piér ’erem ca kual go Jésu ba yei: Jia main jia selang ’eno cain subu jua ma, kudda sai al dé. Kiddin ga Piér ba ’erem ca kual lé na, ddi ’elé.

Currently Selected:

Mark 14: TNG1978

Highlight

Copy