Matié 18

Na wanga gumu ga?

(Mark 9:33–37; Luk 9:46–48)

1A kiddin lé na ga anjama ’yé gusu Jésu, ké ’engeri wa: Na wanga gumu a duro Leu do dang ni ga? 2Jésu té kurong go wusin si tumoigé. 3Ddi yégé wa: ’Enung wa yogenga cindi waldong wang: Keng nia bel main karang ga wusinyong kain ’eno na, keng go andong duro Leu do dang ni ’eno. 4Kema goni goni goa jogu cai dugo main kurong go wusin lé kua na, na ddia go ddoang gemyai a duro Leu do dang ni. 5Kema goni goni goa ’yé kurong go wusin go main nai lé kua kain ca gusandang na, ddi ’yenga ’enung bang.

Homé go isinwa kua

(Mark 9:42–48; Luk 17:1–2)

6Ama kema goni goni goa si henga ga aseré pena a duro karang ga wusinyong ga bo cindi gusung lé kua duro isinwa na, golgo ké sadda keddang go hiddé kordi, ké debi cin kurai go gumu go dduaga. 7Bagen ca delinya ca henga ga aseré kalang duro isinwa, henga ga aseré kalang wo kené waindo waindo, ama bagen ca kema go so kual go aseré kalang lé toi.

8Kobin kau tebain nia sin ca jia aserang duro isinwa na, ji walelagé a gusin bugagé cong cigad, na golgo go ji andong duro jomang cindin dang kobin go pena kau tebain do pena ddia go ji magu kaldin ca’ dang gondin ca’ go ké nia debin cin tua do bera kuddum. 9Tindin nia sin ca jia aserang duro isinwa na, ji dura a gusin debo cong cigad, na golgo ji andong jomang cindin dang tindin do pena, ddia ga ké nia dibin cin tua do kerbinya dang cindin ca’.

Kual go kera ca demagu do kaiyong go ké ba waio

(Luk 15:3–7)

10Ga lageng angal, ddo keng doré kié pena a duro karang ga wusinyong lé kua kel ’eno, cawa kangiyong ga magégé ’era tumu Bang go a dang ni waindo waindo. [ 11Cawa Kema Kurondi ’erga ca ddia minyé ké ga ba kaiyong.]

12Keng ’erema mena ga? Kema nia dang gamgé aru ma, pena nia kaiyong a duroigé na, ddia ddé ga to tigesu ca tigesu ca kubung ca oré daré to do ba kaiyong lé ’eno ga? 13’Enung wa yogeng, ddi nia waio na, gusi da mowi ca demagu do ba kaiyong lé, ddi ga to tigesu ca tigesu ga ba kaiyong ’eno. 14Baigeng ga a dang ni dar ca kié pena a duro karang ga wusinyong lé kua kondia basong ’enoa main kain bu’.

Kermin nia lé isinwa

15Kermin nia lein isinwa na, ji ’era gusi, ji geli wané doi kengang nai sua, ddi nia jein na, ji wai kermin lé. 16Ama ddi nia kain jo kual goin na, ji gula kema pena kau sua dang nain, cawa cidab do Kumu toi yé waldong wang, hendé do kebu kalang sua kau subu na, na do cindi. 17Ama ddi nia kain jo kalang lé kual gogé na, ji yai yaué go Kumu koi, ddi nia kain jo yaué go Kumu koi na, ji selai main kema go toi ddang kain bua, ji solei main kema go ’yo hogé kain bu’.

Nari dang ddo

18’Enung wa yogenga cindi waldong wang: Henga gani gani ga kenga nargé a duro delinya na, ka nargé a dang bu’. Henga gani gani ga kenga ddégé a duro delinya na, ka ddégé a dang ni bu’.

19’Enung wa yogenga waldong wang com: A duro delinya kua kalang sua a duroigeng nia dai pena ca olé henga gani gani na, Bang go a dang ni da bigé henga lé. 20Cawa kiddin ga kalang sua kau subu yau dang gusandang na, ’enung wo duroigé.

Kual go kera go ca go gié go ba kain burogé

21Kardené Piér ’yé gusu Jésu, ddi ’engeri wa: Bagulong, kermung nia leng isinwa waindo waindo na, ’enung buragai cang mena ga? bera cang jurgum ga? 22Jésu jogu yei wa: ’Enung yeinya ca bera jurgum ’eno, ama bera to jurgum jurgum cain jurgum. 23Na ca ma Leu do dang ni gené mainya kelma go ba dar ca ddogenyé laré goi a kuaba kalang gai ga gié kain. 24Kiddin ga ddi ba ’yé ca ddogenyé laré lé na, ké gol kema go pena ’yang nai gusi, kema langa tugula do laré dubu combu cai. 25Kema lé wa laré go boié tugula lé ’eno, kardené Bagulondi lé yei wa: Kandia keli cong main guiang kain kang tamdi dang karndi, dang henga gai ga tai gulong mam bu’, ca kondia biang tugula doi. 26Go gié lé poi gomdi tumu bagulondi lé, ddi oli, ddi yei wa: Bagulong ’ima ddaindin cang, ddai ’enunga bin mam. 27Bagulondi lé sol nyagei, ddi burogi, ddi ddei ’yé.

28Kema go gié lé andong dong ’yé wai mondi go pena go gié goang tugula doi cai laré aru pena, ddi ’yom tumoi cac, ddi yei wa: Ji bung tugula duang. 29Mondi go gié lé poi gomdi tumoi, ddi oli, ddi yei wa: Ji ’ima ddaindin cang, ddai ’enunga bin. 30Ama ddi dara ’eno, ddi ’yang nai debei duro gerngang bera kondia bi tugula doi lé ba. 31Kiddin ga kamdi ga gié ba sol kual go ddi ba lei na, kederégé homdégé nain, ké ’yé yoi bagulondigé lé gurain. 32Kardené bagulong lé sai tei, ddi yei wa: Jia go gié go isini, kiddin ga ji ba olung na, ’enung burogu tugula doin mam. 33Na golgo ji sol mondin go gié nyagei main ’enung ba solang nyagein kain bu’. 34Bagulondi lé mainyé cai bbani ’eno, ddi ’yang nai debei duro gerngang bera kondia bi tugula doi lé mam ba. Jésu jogu yégé kual com. 35Kema goni goni nia buraga kermi a duro ddaindi ’eno na, Bang go a dang ni kau go burogoi ’eno bu’.

Currently Selected:

Matié 18: TNG1978

Highlight

Copy