Gié 27

Ké gi Paul a Rom

1Kiddin ga ké nyan kual ca nia nai a duro kuburo ’era Itali na, ké bu Paul dang kalang ga pena ga duro gerngang kuaba gumu go asengeriyong aru kogé go ké ba tei Julus, ddia asengar go ddo ca go Rom koi. 2Ni nai duro kuburo a Adramit, ni dal gulong go kebu kurai ca gesong ga Asi. Aristak go Tasalonika a ca gesong ga Masadon nai dang nani bu’. 3Waindo ni gesin a Sidon, Julus sol Paul nyagei, ddi ddei kondia ’era sela kajanderndei ca kandia jégenai. 4Kardené ni ddé kiddin lé, ni sai ’yé to nengelé kebu gung go kema go Sipré, cawa kal yaga caini. 5Ni sai col ca kurai go gumu go ddoaga ’yoabang Silisi dang Pampili, kardené ni ’yé Mira a ca gesong ga Lisi. 6Gumu go asengeriyong aru kogé wai kuburo go ba saga a Alésandré ca oré Itali a kené, ddi sini duro kuburo lé.

7Ni ’yé lam lam duro gelé go cin wolé muddag, kardené ni wai gulong go gumu go Sidé. Kal narni ca oré tumu tumu, na ca ma ni cangu ’yé Salmon to nengelé kebu gung go kema go Krét. 8Ni dal kebu gung dang gelé go cin nain, bera ni wai kiddin ga ddari ca saddé kuburo ’yoabang gulong go gumu go ké ba tei Lasé.

9Ni lé wolé combu a kené, ca oré tumu na ddoju, na bbal ca basé kalang cawa wolé go lo asiam hal ka, na ca ma Paul géjegé, ddi yégé wa: 10Gemdong, ’enung sol oré guana go duro kurai lé, na ddoju bbani ’eno, kuburo dang henga ga a duroi dang na gang bu’ da tunyong combu. 11Ama gumu go Rom go asengeriyong aru kogé jé kema go haddé kuburo lé, kang kuburo bagulondi kual gogé ddi kual go Paul koi. 12Kiddin lé na ddara jomé kené kebu kal ’eno, na ca ma kalang ga pena combu a duroigé ’eremé ca ka ddo kiddin lé, ka dar ca oré gesinyé a Pénisi, na gulong go gumu go kebu gung go Krét go geré kal cindi dur do cainé dang kauba go goiyong, dang kuaba go milin barua. Ké dar ca jomé kené bera terboi na kara.

Kal durang a ca kurai go gumu go ddoaga

13Kiddin ga kal yaga lam lam a kuaba go goiyong na, ké ’erem ca ka bbal oré kené, ké por kuburo lé dang, ké dal kebu gung do Krét. 14Ama kardené sam na kal go osi saga a kuaba go milin barua a dur do ca kubung go kema go Krét lé. 15Kal lé nar kuburo, ni bbala haddé cin kal lé ’eno, na ca ma ni belé kuburo lé to kal, kal nongeli. 16Ni dal kema go wusin go ké ba tei Kauda a kuaba go milin barua, dang gelé go cin nain ni saddu kuburo go wusin mengai. 17Kiddin ga ké ba sergu kuburo go wusin dang na, ké saddu kuburo go gumu dang gamgé pain pain, ké la muro ca ka da toin kuburo ca ara kebu gung go Libi, ké poderé badigé ga gumu ga kuburo kai dugo ca kal na da sali. 18Kal durong osu nain ddang com, waindo ké osum bogé henga ga duro kuburo cin kurai go gumu go ddoaga. 19Wolé go subu na, ké nyim henga ga kuburo kai worindégé cin kang bu’. 20A duro wolé muddag na, ni sela teba ’eno bua, ni sela kesiddiyong ’eno bu’, ama kal durong caini waindo waindo, kardené ni ’erem ca nia ga bbalé minyé gusuni ’eno.

21Ké ga ba jom duro kuburo lé na, ké lé wolé combu, ké da henga ’eno, kardené Paul sai ’eré tumoigé, ddi yégé wa: Gemdong, keng nia jé kual guang kiddin ga ’enung ba yegeng ca na ddogeng Krét ’eno na, na go toinyogeng henga combu main kain ’eno. 22Ama cakcak kua ’enung dar ca jalegeng ddaindegeng, cawa kema pena a duroina go basong ’eno, na kuburoa go toinyang mera. 23Cawa dang soindo lé kua na, Kumu guang go ’enung wa melaui, ddi gigu kangito goi gusung. 24Ddi yeng wa: Paul, lo muro ’eno, na gad ji ’era tumu go ddo ca, na ca ma Kumu dang olum doi da minyein dang kalang mam ga ba jom duro kuburo dang nain bu’. 25Gemdong, na ca ma ga ’imageng ddaindegeng, cawa ’enung sol Kumu da lé main ddi ba yengang kain. 26Ama kal da banageng ca kema go pena dugo.

27A duro wolé go moac ca poddin dang soindo na, kal wa nongeleni tumu tumu duro kurai go gumu go ddoaga go ké tei Méditerené. Duro soindo na, ga gié ’erem ca ni caga ’yoabang gesong ga pena. 28Ké saddu gangé gusu helma, ké debi cin kang dugo ca solé kang digua gogé. Ké wai dugua gogé bbal guadang to subu ca jurgum, ké sié tumu lam, kardené ké debu ddang com, ké wai kang dugua gogé bbal guadang to sua ca margem. 29Ké lé muro ca kuburo goni da tunyong ca ara, na ca ma ké bé helma poddin to kang ca ’yomé kuburo cinddi dugo, ké jom kené sam ca dda kiddinya wula dé. 30Kalang ga lo gié duro kuburo lé dar ca geré, ké gesin kuburo go wusin cin kurai main ka wa deba helma ci kang ca ’yomé kuburo cai dugo kain. 31Ama Paul yei gumu go Rom go asengeriyong aru kogé dang asengeriyong gai wa; Kalang lé kua nia jiga jima duro kuburo ’eno na, keng mam go bbalé minyé ’eno. 32Kardené asengeriyong wal gangé ga ’yomé kuburo go wusin lé kai, ké ddei ba cin kurai ’yé.

33Kiddin ga kiddin ba ji ’yoab ca wolé na, Paul tegagé mam kandia ’erang da wo, ddi yégé wa: Labegé na, na wolé moac cai poddin go keng wa henga ga do ’eno. 34Na ca ma, ’enung tegageng ca keng ’erang da wo ca keng waia dono do minyé gusugeng ca kema pena a duroigeng basong ’eno, kau teddi do cai pena kaiyong ’eno bu’. 35Kiddin ga Paul ba yé kual lé ka na, ddi ai wo, ddi lé Kumu désé tumoigé mam, kardené ddi bbodelé wo lé, ddi osum do. 36Ké mam ddaindigé jalgé, kardené ké di bu’. 37Ni kalang aru sua dang to jurgum ca jis a duro kuburo lé. 38Kiddin ga ké ba di aidong na, ké bé gasa cong cin kurai go gumu go ddoaga ca dda kuburo la hembala.

Kuburo tunyong

39Kiddin ga kiddin ba wol na, ga gié sela gesong lé gusondigé ’eno, ama ké sol kiddin ga pena dang kelai durdigé, ké ’erem ca ka orang kuburo so kené. 40Ké poré helma go ’yomé kuburo dugo gangei cong, ké ddégé cin kurai go gumu go ddoaga, kardené ké poderé gangé ga baldu do belé kuburo cai cong, kardené ké saddu badigé ca kuburo dang ca kal na nungelagé ’erang nagé ca kelai lé. 41Ama kuburo ’isebu ara a kiddin ga doiyé ba papsong kené, kuburo cai gagu gag ca ara lé, ké wa dono do nongulei ’eno, cawa doié wo toinyé kuburo lé cinddi.

42Asengeriyong nyan kual ca ka deddé kalang ga gerngang, ca ddo kema pena a duroigé na haddé minyé gusi ’eno. 43Ama gumu go Rom go asengeriyong aru kogé dar ca minyé Paul, na ca ma ddi nargé ca kandia deddegé ’eno, ama ddi yégé wa: keng ga solé haddé cin kurai na, ga haddageng ’era kebu gung tumu jua. 44Ama ké ga ba sela haddé ’eno na, ké jima ca wurandu do kuburo go ba kaidong lé toi. Main kain na ké mam ’yé kebu gung dang labia.

Currently Selected:

Gié 27: TNG1978

Highlight

Copy