Gié 23

1Paul si cindi sol gemdong ga bedang ddér, ddi yégé wa: Karmeng, ’enung jom tumu Kumu danga kual go ddari duro ddaindung bera labegé. 2Gemdong ga tibé Kumu gumu gogé Ananias yégé ké ga ’eré dur Paul kandia semba kibi. 3Kardené Paul yei wa: Kumu da sombin ji gurndu go béré, ji jom wa kaidé kual ca so, ji yé wa: Kandia sembang, ji la henga ga so ba nargé. 4Ké ga ba ’eré dur Paul yei wa: Ji nyangdu gemdong ga tibé Kumu gogé ga? 5Paul jogu yégé wa: Karmeng, ’enung sela ca kondia gemdong ga tibé Kumu gumu gogé ’eno, cawa ké pasu duro cidab do Kumu toi waldong wang, jia yo kual go isini ca gumu go kalang gain kogé ’eno.

6Kiddin ga Paul ba sol ca Sadusié dang ga Parisié wo duro gemdong ga bedang lé na, ddi soi noi tumoigé, ddi yégé wa: Karmeng, ’enunga Parisié, ’enunga ga Parisié kurondigé, ké wa kaidé kual cang ca ’enung wa tugoia belé go kalang ga maré kogé. 7Kiddin ga ddi ba yé kual lé kain na, mainyé sai duro ga Parisié kang ga Sadusié, kalang ga bedang lé gosindé sua. 8(Cawa ga Sadusié yé wa: Kalang ga maré na go belang cindegé ’eno bua, kangiyong na wo ’eno bua, habé kau wo ’eno bu’. Ama ga Parisié bu cindi ca kandia wo kené mam.) 9Ké ceb alalé main ddang com, ga pena a duro ga Parisié ga gelé so go Kumu koi, ké sai dang yé kualang noigé osu, ké yé wa: Ni wa kual go isini ca kema lé kua ’eno, na habé, kau kangito ka yoi kual laiga.

10Kiddin ga mainyé ba sai dang nain na, gumu go asengeriyong ga dubu kogé lé muro ca kandia da sagedé Paul duroigé, ddi yégé asengeriyong ca kandia ’era buddaiang a kobegé, kandia ’erang nai duro gulong gogé.

11Bagulong boi Paul cindiang soindo, ddi yei wa: ’Ima ddaindin, main ji ba yang hendé duang a Jorsalem kain na, jia yé hendé duang a Rom main kain bu’.

Ké nyan kual go deddé Paul

12Waindo joguddu na, ga Juib yau, ké bbesé gusugé, ka go do henga ’eno bua, ka go so kang ’eno bu’, bera ka dedda Paul jua. 13Kalang ga bbesé gusugé lé na, ké ddi kalang to poddin. 14Ké ’yé gusu gemdong ga tibé Kumu, dang kalang ga gemdong, ké yégé wa: Ni bbesé gusuni ca nia go do henga ’eno bera nia dedda Paul jua. 15Ama cakcak kua keng dang gemdong ga bedang na, ga ’enger gumu go asengeriyong dubu kogé kandia bugengang Paul, main kenga ca ’engera kual toi dang duro gusi kain, kiddin ga ddia ca oré waiegeng na, ni sai deddi.

16Ama Paul temdi kuranda jé kaul go ké ba nyani lé, ddi ’yé andong duro gulong go asengeriyong kogé, ddi bi Paul solé ca kual lé. 17Paul té pena a duro gemdong ga asengeriyong aru kogé, ddi yei wa: Ji bega kurong go marna lé kua ’erang nai gusu gumu go asengeriyong dubu kogé, cawa ddi danga kual ca yoi. 18Ddi goli ’yang nai gusu gumu go asengeriyong dubu kogé, ddi yei wa: Paul go gerngang la, togang yoang wa: ’Enunga gulang kurong go marna lé kua ’erangang nai gusin cawa kondia dang kual ca yoin. 19Gumu go asengeriyong dubu kogé lé ’yom kurong go marna lé kobi ’yé kang nai kaindigé sua, ddi ’engeri wa: Ji dar ca yoang mena ga? 20Ddi jogu yei wa: Ga Juib dai kebegé pena ca ka ’engerein ca jia gula Paul tumu gemdong ga bedang waindo, main ka ca ’engera kual toi a gusi dang duro kain. 21Ama ddo ji jo kual gogé ’eno, cawa kalang ga pena a duroigé ddi to poddin, ké wa golei ca ’yomoi, ké bbesé gusugé ca ka go do henga ’eno bua, ka so kang ’eno bu’ bera ka dedda Paul jua. Cakcak kua na, ké nyan gusugé ka, ké wa ama ca jo kual goin mera. 22Gumu go asengeriyong dubu kogé lé gejé kurong ga marna lé wa, kondia yoi kema pena kual go kondia yeiang nai lé kua ’eno, kardené gumu go asengeriyong dubu kogé lé ddei ’yé.

Ké gi Paul gusu ga ddo ca Pélis

23Kardené gumu go asengeriyong kogé lé té gemdong ga asengeriyong aru kagé sua, ddi yégé wa: Ga tegageng asengeriyong aru sua, dang asengeriyong ga no hondong to jurgum, dang kalang gang soyong aru sua bu’, keng mam nyana gusugeng ca oré Sésaré dang to borndo. 24Ga bi Paul hondong, ’erang nai labia gusu Pélis go ddo ca. 25Ddi pasu maktub main kain.

26Na ’enung Kulod Lisias, ’enung lei gumu go ddo ca Pélis waigi. 27Ga Juib ’yom kema lé kua ca deddei, ama kiddin ga ’enung ba jé ca kondia kié go Rom na, ’enung ’yang asengeriyong gang boddi a kobegé. 28Kiddin ga ’enung dar ca solé kandia kembei cawa ga na, ’enung ’yang nai duro bedang dogé. 29’Enung sol ddi la wané do bbala ca maré ’eno bua, bbala ca debei duro gerngang ’eno bu’, ama ké si kual cai ca kual go so gogé koi. 30Kiddin ga ké ba yeng wa kandia wa golei ca deddei na, kuabang padda ’enung sai gii ni gusin kua, ’enung yégé ké ga ba kembei lé, ké ’era ya kual gogé go ké ba kembei lé a gusin.

31Asengeriyong gol Paul dang soindo main ddi ba yegang kain, ké ’yang nai Antipatris. 32Waindo asengeriyong ga orang gondigé boi caigé jogé tagé. Ké ddé asengeriyong gang hondong ’yang Paul. 33Kiddin ga ké gesing a Sésaré na, ké bu go ddo ca maktub lé bua, ké ddei Paul ni kobi bu’. 34Go ddo ca lé ddogin maktub lé, kardené ddi ’enger Paul wa: Jia kié go a ca gesong gani ga? Kiddin ga ddi ba jé ca kondia go Silisi na, 35ddi yei wa: Kiddin ga kalang ga so kual cain la ’erga na, ’enung da jé kual goin lé toi dé. Kardené ddi yégé kandia maga Paul ta Hérod.

Currently Selected:

Gié 23: TNG1978

Highlight

Copy