Gié 21

Paul ’yé Jorsalem

1Kiddin ga ni ba ddégé na, ni nai kuburo oju Kos tab, waindo ni ’yé Rod, kardené ni sai a kené ’yé Patara. 2Ni wai kuburo go oré Pénisi a kené, kardené ni nai kuburo lé ’yé. 3Kiddin ga ni ’yé ’yoabang kema go Sipré na, ni ai kobi go guiyong ca oré Siri. Ni gesin Tir, na kiddin ga ké ba gesin henga ga duro kuburo dugo kené. 4Ni wai kalang ga bo cindi a kené, ni jom gusugé wolé jurgum. Habé gelgé kandia yai Paul kondia oré Jorsalem ’eno. 5Kiddin ga wolé jurgum ba bbal na, ni ddégé, ni sai ’yé tumu, ké dang kandigé dang karndigé boar boar, ké béni bera kara berem dong, ni poi gomdini dugo kebu kurai go gumu go ddoaga ca olé. 6Ni sigé labia, kardené ni nai kuburo, ké gang boi caigé jogu ’inji.

7Ni sai a Tir dang kuburo ’yé Polemai, ni lé karmana waigi, ni lé gusugé wolé pena. 8Waindo ni sai ’yé Sésaré, ni gesin ta Pilip go doré Nô, ni wol tai. Na ddi go pena a duro ké ga jurgum ga ké ba pargé a Jorsalem. 9Karndi ga kambelé wo kené poddin, ké ’yagé ’eno dé, ké ga cogelé kebu go Kumu koi. 10Ni jom a kené wolé muddug, kardené go cogelé kebu go Kumu koi go ké ba tei Agabus sai a Judé ’yé waini. 11Kiddin ga ddi ba ’erga gusuni na, ddi nyim kelau go Paul koi, ddi saddu gondi dang kalndi, ddi yé wa: Kua na kual go Habé ga Kumu kai wa yo waldong wang, ga Juib a Jorsalem da saddié kema go kelau lé kua main kain bu’, ka bi kuaba kalang ga toigé ddang. 12Kiddin ga ni jé kual lé kain na, ni dang kalang ga Sésaré ol Paul dang meregdé ca ddi oré a Jorsalem ’eno. 13Ama Paul jogu yé wa: Keng ’ela cawa, keng dar ca alang ddaindung ga? ’Enung nyan gusunga ca saddié kua mera ’eno, ama na ca maré a Jorsalem ca Bagulong Jésu. 14Kiddin ga ni bbala narei ’eno na, ni ddei, ni yei wa: Dda Bagulong lang nain ca henga ga kederé ba dargé.

15Ni jom kené wolé muddug, kardené ni nyan henga gani ’yé Jorsalem. 16Anjama ga Sésaré béni ’yang nani ta Menason ca ni wola kené, ddia kema go Sipré go ba bu cindi tumu din.

Paul ’yé solé Jak

17Kiddin ga ni ba gesin Jorsalem na, karmani yalni dang gusu mowa bbani ’eno. 18Waindo niang ga Paul ’yé ta Jak, gemdong ga duro yaué go Kumu koi mam yau wo kené bu’. 19Kiddin ga Paul ba légé waigi na, ddi dorgé kual mam go Kumu ba lé a duro kalang ga toigé ddang ca gié goi. 20Kiddin ga ké ba jé kual lé na, ké debain Kumu, kardené ké yé Paul wa: Karmini, ji sol kalang dubu combu a duro ga Juib bu cindi, kang tabelang do magé so go Kumu koi. 21Kalang ga pena yégé waldong wang, jia wa gelé ga Juib ga jomé duro kalang ga toigé ddang, kandia dda so go Mois koi cong bua, kandia walé karndigé mandeli ’eno bua, kandia kobé hada da ga Juib togé ’eno bu’. 22Ka jé ca jia caga ma, na la mena ga? 23Henga ga nia yein na, ji lagé, niang kalang poddin wo kené a duroini kua, ga ba dor kebu caigé tumu Kumu. 24’Erang nagé, keng yaua yaué go belé gusu arin carara, ji bia laré, dda ké delgang caigé cong. Main kain na kalang mam da sol ca kual go ké ba jei cain na, na cindi ’eno, ka sol ca ji bang wa magé so go Mois koi. 25Ama kalang ga toigé ddang ga ba bu cindi na, nia pasegé maktub ca ddo ké do kunyung ga ké ba walgé tibang koliyong ’eno bua, ké do kebar ’eno bua, ké do pagé go ké ba boi kordi ’eno bua, ké lo béli ’eno bu’. 26Kardené Paul gol kalang ga poddin lé, waindo kang ga nagé yau yaué go belé gusu arin carara lé, kardené ddi andong duro kulu go yaué go Kumu koi ca yogé wolé go belé gusu arin carara lé na ka, to do poré na wolé go kema goni goni kau a duroigé, ka wal tibé cai.

Ké ’yom Paul a duro kulu go yaué go Kumu koi

27Kiddin ga wolé go jurgum ji ’yoab ca karé na, Juib ga ba saga a ca gesong ga Asi sol Paul a duro kulu go yaué go Kumu koi, ké si kalang ga yaué combu ségeldé, ké ’yomi. 28Ké soi noigé, ké yé wa: Ga Israél ga jégeni, selageng kema go wa gelé kalang a kiddin mam, kandia ya kual go isini ca ga Israél mam dang so go Mois koi bua, dang kulu go yaué go Kumu koi lé kua bu’, cakcak kua ddi gulga kalang ga toigé ddang ca toinyé kulu go yaué go Kumu koi go arin carara dang ddisin. 29(Ké yé main kainya ca ké sol Tropim go Epés kang Paul a duro gulong, ké ’erem ca Paul na golia kondi tolang ni duro kulu go yaué go Kumu koi.) 30Kual sai gendei a duro gulong go gumu lé, ké geré a kiddin gani gani mam ’yé gusugé. Ké ’yom Paul a duro kulu go yaué go Kumu koi dong, ké lebu kulu lé dang kobegé padda. 31Kiddin ga ké wa daré ca deddé Paul na, gumu go asengeriyong dubu go Rom kogé jé ca kalang ga Jorsalem mam saiang kual gendei. 32Kobipadda ddi nyim asengeriyong dang gemdong gagé. Ké geré ’yé gusu kalang ga yaué combu lé. Kiddin ga ké sol gumu go asengeriyong dubu kogé dang asengeriyong toi na, ké ddé Paul kalin basé togoi. 33Gumu go asengeriyong dubu kogé ’yé gusu Paul, ddi ’yomi, ddi sigé ca kandia saddiai dang kunja sua, kardené ddi ’engergé wa: Kema lé na wang ga? Ddi la wa ga? 34Kalang ga yaué combu soi noigé, ké yé kual go pena, kané yé kual go ddang, kiddin ga gumu go asengeriyong dubu kogé lé sela kual lé toi carara ca gendei do ba sai lé ’eno na, ddi yégé ca kandia ’erang Paul duro gulong go asengeriyong kogé. 35Kiddin ga ké ba ’yang Paul kebu kulu kebi go no dang na, asengeriyong ai Paul caigé dang ca mainyé do kalang ga yaué combu togé. 36Cawa kalang ga yaué combu wa kobegé, ké wa soi noigé ga deddi.

Paul yé kual ca doré kual cong

37Kiddin ga ké ba ’yang Paul duro gulong go asengeriyong kogé na, ddi yei gumu go asengeriyong dubu kogé, jia ddong ca ’enung yein kual henyé dé ga? Gumu lé ’engeri wa: Ji sol yo kebu go Grék ga? 38Ji nia kema go Ejibté go ba saiang kual go gaué, go ba gol kalang ga golé giyong toi dubu poddin ’yang nagé duro gada ’eno ga? 39Paul jogu yei wa: ’Enunga go Juib, ké wonga Tarsé ca gesong ga Silisi, ’enunga kié go gulong a duro gulong go gumu, ’enung olin, ji ddang ’enung yogé kalang kual. 40Gumu go asengeriyong dubu kogé ddei kondia ya kual. Kardené Paul sai ’eré kebu kulu dang, ddi légé kalang lé kobi kandia sugoia. Kiddin ga ké ba sugoiu mam na, ddi dorgé kual dang kebu go Hébero.

Currently Selected:

Gié 21: TNG1978

Highlight

Copy