Marcos 16

Jesús yapi pijia'm (Mt 28.1-10; Lc 24.1-12; Jn 20.1-10)

1Yam'niji siojokia jloma ti i'nio 'wanjlijyi'n, María Magdala jleliki jla'yis japo Salomé, jlajaka 'neje jlaja María 'neje Santiago jlet yamat'iyisijpe siupi jini inkajk'i ti ja'nelinisik'i kiak t'ajwes masa ki Jesús. 2Siojokia jloma inia'ne jla'a inkijmaye, ti k'iejli mot, yam'ni'ne ti ijioyis jika a'noyi. 3Iyoyis'ne 'ate ti ininekiajlisi jiwek:

—¿Tent'ipa janoyets'e'm kalienaja'm jlajak sisaj ti tip'onajaja'm ja a'no'?

4Jak je iyoyi siuti yiyet'iyisipi, i'yen jitiejesipi pa a'no' pajk'i ta'a ti totie ts'iji siojopa tip'onajaja'm, jlajmiliet 5siuti 'yuyeyisi pi a'no', i'winayisi pa i'nio' jwemik ji'wu' pa itiojyi ti lemi, ti yiji'n tome 'niji injweyeje. 'Yina japoka asejnia jnots'ijnits'i. 6Siupa jwemik iyone'ne 'ate japoka asejnia:

—Ke ijnots'ijnak'i'm. Jak jiwoyetajyin'ni ja Jesús Nazaret jlele siojo ti tena'a pijia'm 'neyek'i jlaja cruz. Lajk'ipa ka ine 'neye, iniu kisie'e tajli 'ni a'no'. 'Yenayi ni siunie tena'a 'neye. 7Maj, jwelayi ja Pedro siu'neje japo ijia t'eyasajnas jla'am, 'yina wonayijna'a 'ate ka ayetiejenie'e, “Yapi pijia'm pa Saka'niona, janan ts'iji Galiléaja. 'Yina sek jani'wenayiji, iyopi jla'am ti inijwe'lase'm.”#Mc 14.28

8Sekyi'i yama'ni japok asejnia t'osiyeyijits'i'ni, ti tajlayisi pak a'no', kititiyeyiji'n lapakawo ti jnots'ijnits'i. 'Yina je ijwilis siupa iyo pa i'winis kajeyepa ti je ijwiyis ape'e.

Jesús inikajanitia'm japa María Magdala jleliki

(Jn 20.11-18)

9[Jlampa pajak'i ti yi' kisie'e ti tajli pi a'no', siojopa jloma ti inia'ne jla'a inkijmaye ti ajnaj 'wanjle ajnat'e, María Magdala jleliki japak iniane ti Jesús ini'wenkijna'm, siujlieja ti ijwiejietjimpe ti imose'l yiji ti iniujwank'i kisie'e. 10Japaka'ne siojopa ti t'osiyi japo jla'yis'ni jla'am ja Jesús ti iyoyi jika'niyejayi ti je iliyi ti yape'n, lapakawo ti jijliak'ali po' japo i'nio'. 11'Wenajliyi ti 'yakakiuyis ti tijwelaja ja Jesús ti 'wasa'n, siu'neje ti 'yakakiuyis ti ijwiltaja ti jla'am ti i'winaja siupa iyo.

Jesús inikajanitia'm papo times t'eyasajnas

(Lc 24.13-35)

12Paj ti inikajanitiet'ijia'm 'neje japo times t'eyasajnas ti yi' ojwe, 'yina jla'am jwajla'a ti 'wena iyo pakayi, kajeyepa ti yiji pa jloniye kiecha. 13'Yina kia'iyojliyi 'yakakiuyis japo ijia takajwejlantaja.

Siunie Jesús ijliuyeje papo t'eyasajnas kanwoyi

14Siupa ti tomayi pijia'm, Jesús inikajanitia'm 'neje japo t'eyasajnas ti itij'we niwa sikioye ijwienjli tom'niji pakayi ti ti'yekiujni'n. Sekyi'i takasejlane japo t'eyasajnas ti itiajlata ti 'yakakiuyis siojopo takajwejlantaja'ni ti i'winis siupa iyo ti iniu kisie'e ti tajli pa a'no'. 15Siupa ti iyone 'ate:

—Maye'ni tejwa'yi ape'e 'ni ajnat, ti jajwelajia'm napo yi' ape'e siunie inka'niye ti ijwi'il niwa Sinia' jlamtis ti isis ti ijwil jana injwajieti.#Mt 28.19; Hch 1.8 16Siupa ja ke inkakiu'n paka ja tiniejienajape, pak janjwayepe, jlam pet siupa ti jankakiu'n, jitis japoye pet. 17Siupapo ja ke inkakiu'n papok in'wenkinana'a pet siuniwa janesi'lietk'i napo i'nio', ti janojwank'i kisie'e siuniwa imose'l yijits'i napo i'nio', lapakawo ti nak jant'emina ni yi'i ti jasetijnape, ji'lija' ja'wenayeyi ti jawoyi. 18'Wanjliyijna'a pet ka inki'mik'i niwa injlajas 'yina ja lajak'ipa kanwone, 'wanjliyi 'neje ka ti'yayinaja siunie inkakie' ti i'nio' ilia'an, 'yina kia'iyo ja ke inlate. Siuti ja jikioye inenk'i ape'e napo je isis, kanjwayejempe.

Jesús yapi poliyi

19Itime siupa iyo ti tamti, Saka'niona Jesús tikiniejayi 'niji poliyi, sekyi'i yiji'n 'niji jijweyeje pa Sinia'. 20Sekyi'i yamat'i'nijpe ti ijioyits'i wikie'eyi puwa ajnatis ti iyoyi jika'niyeja' puwa Sinia' jlamtis ti isis. 'Yina Saka'niona iniuyeje, je lajk'i siupuwa iyo ti i'winki'n ti yisi'lietk'i papo i'nio', 'nakayi ti ja ti'wena ti ijiatk'i siukia iyo kiwa jlamtis.]#16.20 'Wenayi siupa jilisanik siu'niwa 'nak nojwaja'm jiwek ti ijwilk'iji'n. (16.9-20)

Currently Selected:

Marcos 16: CRT97

Highlight

Copy