Mateo 7

Ká a'yene ni akiecha pi k'iejliyi pi iyoyi

(Lc 6.37-38,41-42)

1“Ká alaki ni akiecha pi k'iejliyi ti iyoyi, ja 'nakayeyijna'a ka Sinia' je in'ye'en pet siupi ates iyoyi. 2Siupi jiwonayi napo as'lejwas, Sinia' kiak janwo'nase kan'yenta ni ates iyo. 3¿Yot'iyi'ni ti ataj je ilie'ne ti ji'yen'ni ni akiecha jitiolkiot, 'yina jlam'ne je 'esijiyi? ¿Jlam'ne ka ataj ene pet 'ate ni siunie a'lawa, atolkiot pet, ti jla'm ijiate ti wujwe? 4¿Siu'neje ti jiwone 'ate ni akiecha, Kamana'a jation kisie'e ni atolkiot? Jlam'ne pet ka ani'yejne'n, ti po' ni yiji jana atate, ti jla'm ijiate ti wujwe. 5¡Jikalakijienat'itie! Ninajnat ka ti'yenaja ak'ioye ni atolkiot, ti jla'm ijiate ti wujwe, ni a'lawa ti yiji jana atate, ja 'nakayeyijna'a ka'wenayijna'a ti jaton kisie'e ni akiecha tiolkiot, ni jop jlosili.

6Ká awejna'm niwa alenas siunie ti t'otata k'iye pa Sinia', 'lojwinie'e ka inta'yi ajelia'm sekyi'i ka inokieja'nina'a sekyi'i jank'isate'n ni 'asie'n. Ká atatayiji niwa ijnisies jitio' siunie k'iejliyi ti 'es, 'lojwinie'e ka int'ask'i'ni.

'Ajlayi pi Sinia' siupa k'iejliyi ti jisitiana

(Lc 11.9-13)

7“'Ajlayi pi Sinia' siupa k'iejliyi pi jisitiana, 'yina janwe'nase'm. Woyejyi'n, je ijiat ka je a'wena'. 'Yasayi'ni, 'yina ja'najlinit ask'ioye. 8Kajeyepa ni siunie i'nio' ti'yasane, yi' kiojyi. Jlampet ni i'nio' ti iyojyi'n, i'wi'in kajeyepa. Jlampet ni i'nio' ti i'yase'ni pi Sinia', nak Sinia' ja'najlinit k'iye.

9“¿Ten jiat'eje pa jikiowe jant'oniti pa jlas, siuti jlas yapijyin'ni jana woye, ka inen jikiojyi jana sisaj, 10ni'ne ka t'ajlijyin'ni pa si'yus, 'yina ka nena kiojyi ni injla?

11“Ijwil ka woyeyi ti asa'am ti je insisie', as t'ajla'a'm pa k'iejliyi ka kia'iwo ka jiniliakie pa ka ena kiojyi. ¿Tepi iyo pi Asna' pi yi' poliyi? ¡Jla'm ijiatayi jla'm ti 'yu'we ti janwejna'm ni siuniwa wask'i'nelaja isis siunapo t'ajle!#Jn 14.13-14; 15.7,16; 16.23-24; 1 Jn 3.21-22; 5.14-15

Sinia' jlamtis ti ijiate ti jwesie ape'e

(Lc 6.31)

12“Siunie inteliaja ka a'lejwas kiak iwo'naja, kiak jawonayi'iji pet napo a'lejwas. 'Yina niwak 'yijie'ne ni i'nio' ni Moisés jika'neyasajnaye, siu'neje ni jika'neyasajnaye iyo papo Sinia' jijwejlanawos t'ipi.

'Wuk kiwet ni je isaja'm

(Lc 13.24)

13“Noyeyi ni 'wuk kiwet ni je isaja'm. Je istieyi pet ni 'wuk kiwet siu'neje ni 'nayi ijioyi nak inlaye 'wet, isajk'i, 'yina je pini' napo i'nio' iniuk'i naka. 14'Nak k'ieyi wek ni siunie 'wuk kiwet siu'neje na 'nayi siunie ijioyi janak in'wasankiye, jla'yi ti ti'nita, je 'loj napo i'nio' iniuk'i naka.

Jla' niwak 'yakajanit jana a'la' ti 'es ni'ne ti je 'es

(Lc 6.43-44)

15“Joskiyeyi siunapo je ijiat ka injwejlanawosa' ti ijwil ka intajlisi pa Sinia'. Ti jla'm initewitanisik'i niwa 'wolepo' ti isis, jlam'ne ki iyo niwaka, niwaka k'iwajlas niwa jwesis. 16Je ijiat ka je intant'iejayi ka 'wenatiena'a ni jikijmaye iyo. 'Yejne'n, siuniwa ts'ejnietio' je janak jlel po' jlaye, ni'ne ka siuniwa higok jla' je janak istiek ka jlaye. 17'Yina kiak iyo'ni siojona a'la' ti 'es, isis pet niwa jla'. Siojona a'la' ti je 'es, je isis pet niwa jla'. 18Siojona a'la' ti 'es, je ti'wena ka je inses niwa jla' ti poyeta. Kia'iyojliyi siojona a'la' jana je 'es pet, je ti'wena ka inses niwa jla' ti poyeta. 19Yi'i japa a'la' ti kia'iyo, ti jla' je isis, tijwajaki sekyi'i ti titietajayi jwata'm. 20'Yina kia'iyo ni siunie ajwe'el, napoka ni jikijmaye ni iyonisi nak jant'emina ti jantant'iejayi.

21“Ja ke wikie'eyeyi siunapo iyo'ate, ti sijwelis, 'Yaka'niona, 'Yaka'niona, ka ijnoyisi ni Sinia' jika anechijiayas. Janapokataja jla'am siunapo iyo ni Inia' ti yi' poliyi iyo ka woyi. 22Siojona jloma ka inetiejenie'e, ka ti'yenajta napo i'nio', ja ke piniye napo i'nio' jawo'ate, 'Yaka'niona, 'Yaka'niona, sampe ti akinieje ni e', ti awokieyi samtikie' siunie Sinia' ijwilts'e'm ka yoki. Etinajpe it'iminape ti anojwatak'i kisie'e jawa imose'l yijits'i japo i'nio'. Nakape'eje ti it'imina ti akajlaje ti alesanaja, niwak siuniwa ti yisi'lietk'i napo i'nio'.

23“Japakayeyi ti jayo'ate ti jasiujlie, Je sitiant'ie'ase. ¡Tajlak'i'm ti asa'am ti jiwoyeyi ni je 'es!

Siupa i'nio' ji'wuk 'yita ape'e japa sisaj, siu'neje pi i'nio' ji'wuk 'yita ape'e pa jolo'

(Lc 6.47-49)

24“Ka ne'yi pa siunapo ipi'ya niwa yamtis, jla'yi ti iyoyi. Iyo'ate siunie i'nio' ti ji'wuk 'yita ape'e japa sisaj. 25Na'am ni pejla, siu'neje na tewuk ti i'yujlietajk'i pijia'm. Na'am ni jlajwu ti wujwi, 'yina je ya'm isia'm, lapakawo ti t'etaja ape'e janak sisaj. 26Jlampet siunie ti ipi'yayeta niwa yamtis, 'yina ti je its'iuk'i'm siunie awoyi. Nak kia'iyo pet siunie i'nio' ti je 'yijen jlosiki, ti ji'wuk 'yita ape'e ni jolo'. 27Na'm ni pejla, na'm ni i'niat ti i'yujlietajk'i pijia'm, siu'neje na jlajwu ti wujwi. 'Yina siojona 'wuk ya'm isia'm, sekyi'i netiajne'n.”

28-29Ti Jesús iliyeyi ti tamti, wuj ti yisi'lietk'i japo i'nio', kajeyepa ti 'yaka pi iyo ti iniajmat pi jijweye iyo, je iyoye 'ate siojopo jiwos pet pa Moisés jika'neyasajnaye, ti ijwil ka inka'neyasajne'n.

Currently Selected:

Mateo 7: CRT97

Highlight

Copy