Lucas 22
22
Judíojos initotisi wita'm ape'e siupa janwonisi pa Jesús ka inkimits'i (Mt 26.1-5,14-16; Mc 14.1-2,10-11; Jn 11.45-53)
1Jlomas 'nak nojwaja'm puwa netia'n ka ne'yi isia'm siojopa Judíojos jiliakijnieye ti titiuwajata puwa woyejes laj jijlinkitajets'i, ka yot'e jla'mate inlakijnieye jle' iyo'ate Pascua.#Ex 12.1-27; Deut 16.1-8 2Siupapo pa'yijis jika anechiyasas, siu'neje papo taka'neyasane pet pa Moisés jika'neyasajnaye, iyoyet'iyisijyimpe siupa janwonisi ka tiliana pa Jesús, lapakawo ti je ijwiyisie papo i'nio', it'imina'ne ti inijwekisi siupi iyoyisi.
3Pakayi'ne ti imosik ijiojwa'm pa Judas Iscariote, Jesús t'eyasanik ti tajla'm japok itijwa'm niwa sikioye times tom'niji. 4Yam'ne ti ijioyi papo pa'yijis jika anechiyasas, siu'neje papo jika ijiawos pet siojopa 'najla'wet, ti iyone'ate:
—Ana'am ti awo ka yikiaj'lase ni Jesús. ¿Ten siupa janiwonaja?
5Wuj ti inkase'n ti ipi'yayisie t'ipi, sekyi'i iyoyis'ne 'ate:
—'Esiji, jawina'a'm jana wikiniet'aj siuti kiak jawo janoyits'e'm.
6Judas itiliak'i siupa tijwelaja'm, i'yent'ipi ti lajak'i papo i'nioye ka nejiap pa Jesús, jiwekie'eja ti joye ka nekiajle papo i'nio' pa Jesús.
Jlampa yiye isia'm japa Pascua Jesús siu'neje papo t'eyasajnas ilisane siupa jajlakayis (Mt 26.17-25; Mc 14.12-21; Jn 13.21-30)
7'Yina yiyi japak jloma ti Judíojos iyo jiliakijnieyeja', ti itiujwisieta niwa woyejes ti laj jijlinkitajets'i. Kiajatak'i'ni ti yiyetaja, ilianis ni ji'wole po' jlas ti ji'woma, ti tejeye jla'am janak Pascua. 8Jesús ijliu'ne ja Pedro jla'yi ja Juan, ti iyone'ate:
—Maye'ni, lesanayi siupa jatiuwa pet. Wakajlanitie ta'a siuti yiyi jla'a Pascua.
9I'yasisin'ne ti iyo'ate:
—¿Tepi jiwotaja ka yinaja'a?
10Jesús isiujlie ti iyo'ate:
—Ka wayetiejna'a isiyi, ja'wena' ni i'nio' ti itijlia jana jlate ti i'niat yiji. Nak jakinieyets'ina'a, ká aleyets'ina'a siojo jajno'we. 11Sekjane'yi ka 'yasajyinna'a siupa jika'niona japa 'wuk, ka wonayina 'ate, “Inka'neyasajnawo iyo'ate, ¿Tepa yi'i siupa jayi'i ti ja'yekiu'n siu'neje napo 'yiyasajnas siujlie'e a'wuk siujlie'e jloma ti Pascua?” 12Sekjane'yi ka 'wenki'nase'm siojona 'wuk tomi pijia'm, 'esi'n kiajwe ta'a, ka sek enayi'ina'a ka lesanayi siupa jatiuwa.
13Yam'ni'ne, yiyisi pi isi' sekyi'i i'winis siupa iyo ti Jesús ijwijla'm, sek yinisi'i'ne ti ilisanisi pa jlakis japak siojopa Pascua.
Saka'niona Jlak ti 'Es
(Mt 26.26-29; Mc 14.22-25; 1 Co 11.23-26)
14Ti yiyet'iyipi siojopa inetitinki, Jesús jla'yis japo t'eyasajnas tejeyits'i ape'e japa inak totieja ape'e. 15Iyoyet'ipi 'ate:
—Siukiwa jlomas ti awo ka sijwa'nase siujlie'e Pascua ti je sinitianjli'ijyi aska kiowe'e. 16'Najataje ti akijwa'nase siujlie'e Pascua, paj ka 'nakajak'iyina'a ka neyi siunie iyo ni janwoyi ni Sinia' jika anechijiayas ts'ijiye.
17Sekyi'i isimayi siojopa inat jiwe, ti at'es yiji, jinikanitieye iwinayi pa Jinia', iyo'ne 'ate:
—Kima'yi ilia'm siu'nie, nikijwanayi ka 'yayejyi. 18Jajwi'lase'm ti ja lajak'i japa jloamye ka iyikiajle'e ka i'yaje siu'nie at'es, paj ka neyeyinie'e janak jloma ti ja'nes ni Sinia' jika anechijiayas.
19Isimat'iyi'ijyi japa woye, iyoye'eje jinikanitieyija' ti iwine pa Jinia', sekyi'i ti its'isajaja. Iwijna'm japo t'eyasajnas ti iyone'ate:
—'Nak 'isie'n ti tekiajla astepe'e ka insisieyi, ti janetia'n. Kiak janiwonayipi, tankiuniepe ijyik'i.
20Kiak iyonjliyi, ti itimat'iyisijpe ti ti'yekiujni'n, isimat'iyi'ijyi japa inat jiwe, iyoye jinikanitieyija' ti iwine pa Jinia', iyo'ne 'ate:
—Siu'nie at'es nak 'yakajaniti siunie Inia' ijwi'il ti ink'ie' siunie janwo, ti ijiatk'i siu'nie i'yoyis ti tisa'ni ka insisieyi.#Jer 31.31-34 21'Yejne'n, siunie i'nio' ni jasekial, 'nak yi'i jikio' yi'n ape'e siujlie'e ataye ape'e, ti yiji'n ijiap, jikioye iniwajlatk'i 'niwa isioye.#Sal 41.9 22Siunie I'nio' Jlas janejia'm ni siunie ja jijliak'aliye, siunie Sinia' ijniejiet'e ti 'nelanjie'e. 'Yina awo'ate, ¡ja wujwa wat ti ja p'ijliusieja' ni i'nio' ni janekial ni jiwet'ia jawo pet!
23Sekyi'i ti ini'yasisiet'ipi ti ininekiajlisi ka 'nakaj siupa yit'i'yiyi pa janekial pa Jika'niona.
“I'nio' ni jle' po' 'esiji ka iniwojwa'n inkawoye”
24Siojopo t'eyasajnas initajlatisi siupa ti iyoyis 'ate:
—¿Tepat'e yi'i pa ti sa'am ti jwajla iyo'ni wata'a ti jle' t'an pijia'm?
25Sekyi'i Jesús iyo'ne 'ate:
—Napo i'nio' yijits'i niwa isi'il ape'e niwa ajnatis, siunapo anechiyasas wuj ti ininajnatk'i pijia'm ape'e napo jikawos. Jlampet siunapo yi jitieyi'i itimayisi'ni pet ti tijwela ti tiwonajasi'ni 'ate, “I'niole jla'am napoka.” 26Siuti asa'am je 'esiji ka kiak aniwonayi, iyo napoka. Siuti japoye ni ti asa'am ti jwajla'a ti jle' 'yaka'm ape'e napo ijia, je 'esiji ka initonit, jlampet siunie ti jle' po' ti iyo anechiyasa' 'esiji ka inwojwa'n inkawoye. 27'Yejne'n, ¿ten siupa ti 'yaka'm ape'e ni jikiecha? ¿Nakat'imi siunie teje'yi jana inak totieja ape'e ti jan'yekiu'n, ni'ne ka nakaye ni inkawo? Ajwel'ni naka ni siunie ti teje'ye ape'e jana inak totieja ape'e ti jan'yekiu'n. 'Yina kiak awo pet ti aye aska kiowe'e awo'ate ni inkawo.#Mt 18.1-5; 20.25-28; 23.11; Lc 9.46-48
28“'Yina ti asa'am ti je liyejyin'ni ijyik'i siukiwa jlomas ti inkajejlasaye yiyetak'i. 29Siuti siwojwa'n anechiyasa ni Inia', kia'awo awojwa'n pet anechiyasisa'ase'm. 30Kiak jawo'ojyi ja kijwanak'i ts'iji ti jayo anechiyasa', ka aye'yijinna'a siuniwa in'wetis ti jawoye anechiyasisa', jane'ya kiajwe siunapo tajla'm napo itijwa'm niwa sikioye times tom'niji Israel jilis.”
Jesús ijwi'il ti Pedro janjwe'el ka je intant'ieje (Mt 26.31-35; Mc 14.27-31; Jn 14.36-38)
31Saka'niona kiak t'ipa iyoye'ijyi 'ate:
—Simón, Simón, 'yejne'n, sitiejiejwa imosik itime ti ti'yasa'nase ti iyo ka inwonayi 'ate ni k'iejliyi ti tolkiotaja. 32'Yina pajatak'i wek ti 'ajlana'ni ka je anetiajnata ni astankiujnieye ti 'es. 'Yina siuti ja apik'i, 'esiji ka noyejejna'a napo a'lejwas ka jwajla woyisi'ni.
33Simón Pedro isiujlie ti iyo'ate:
—'Yaka'niona, pajk'i ti siwakal ti awo ka yik ajak'i ka 'notiejtana'a a'laja'm, jla'yi ka siliaye ino wita'm ka inlanata.
34Jesús iyone'ne 'ate:
—Pedro, jajwi'la'm, siu'nie ajnaj ka majleyetiejena'a ka nap ni ajwenta, janajapejayiji ti janikakiu'ni, ti jajwel ka je intant'iek'i.
Jesús iyotaja papo t'eyasajnas ka iniwakajlanit ta'a k'iye siupa ti ja wujwa ti ja a'tiejak'i
35Iyonat'iyi'iji 'ate japo t'eyasajnas:
—Siuti ajloye'nijpe ti awo'nase 'ate, “Ká awoye eliye, ni'ne ka aka wikiniet'aweja', ni'ne ka awoye asatiye”,#Lc 10.4 ¿ma po' t'ipi pa jisitiana'?
Iyo'ate ti isiujlisie:
—Lajk'ipa.
36Kiak t'ipa iyonayipi:
—'Nakayi jayo'ate, siunie po' jana jleli, 'esiji ka je ileyijinna'a siuti janek, siu'neje jana jika wikiniet'awe. Jlampet ni lajk'ipa ka jitisajnat jitiokie', ka wenana'a niwa ji'wuye ka neki pa jitisajnat jitiokie'. 37'Yina jajwi'lase'm ti je 'esiji ka je kiak iyo, ti janeyi janak jloma ti tenat'ijyipi its'ioye, ti iyo'ate niwa inamtis ti yiji ni ji'wet, “Iliaye iniuyi wita'm siunapo i'nio' inkeyis jiliajnis.”#Is 53.12 Wikie'eyi niwa inlesajna' ti sijwe'el ti jane wita'm 'nakayi.
38Ipi'yayis jiwek ti kiak iyo, ti iyoyet'iyispe:
—Saka'niona, po' 'niwa times sijnatis jitio' yits'e.
Isiujlie japo ti iyo'ate:
—Leyeyi.
Jesús iyo t'ajlayeja' yi'i japa Getsemaní
(Mt 26.36-46; Mc 14.32-42)
39Sekyi'i Jesús yam'ne, pi iyot'iyi'nipe jla'am ti ijioyi siujlieja tikijnaki Olivokiet, siojopo t'eyasajnas je iyo ka inleyisk'i ti yama. 40Yiyi siojo ijiojwi, sekyi'i iyone'ne 'ate japo t'eyasajnas:
—Woye asts'ajlayeja', 'nakayeyijna'a ka je injlana'ni ni inkajejlasaye.
41Ni'ne ka treinta métrojossa' pa k'iejliyi siupa yi'i ti tajlayi japo t'eyasajnas, t'akosjlete'l itiyet'ijyimpe ajnat'e ti iyo t'ajlayeja'. Iyo'ne 'ate:
42—Inia', kawoyi, sijwajiete siu'nie pajyi 'ni ja'yaje. 'Yina 'esiji ka intaj'la a'am siunie awoyi, je'e ti ya'am ka intalk'i.
43[Pakayi'ne siupa injlojwanik poli jlele inikajanitieja'm ti iyo jweyeja'. 44'Yina ti je jlase' pi iyo pi jijliak'ali, Jesús kat'ajat'iyijpe pet ti ini'net ti iyo t'ajlayeja'. Jlam'ne pa jikiuni ti yi' ajnat'e iyo'ate ni 'woyis, ti ton'ni ti isieje.]#22.44 Vv. 43,44 po' puwa laje ta'a siupuwa inkio' lisajna' ti jlamt'iyijipe (22.44)
45Ti iliyi ti iyo t'ajlayeja', takasitie, yapilieyi papo t'eyasajnas siupa yiyits'i, i'nijmajliyeyi pet ti imiak'iji'n, lapakawo ti je itieyis jitipe'e pi iyo pi jijliak'ali. 46Iyone'ne 'ate:
—¿Yot'iyi'ni ti jimayets'iji'n? Neyets'i pijia'm, woye asts'ajlayeja', 'nakayeyijna'a ka je insakana ni inkajejlasaye.
Jesús tikima'a (Mt 26.47-56; Mc 14.43-50; Jn 18.2-11)
47Je ilitieje'eje pi Jesús ti takamtijnien'ni, ti 'nesat'i'nijpe siupapo i'nio' ti 'loj. Siojopo itijwa'm niwa sikioye times tom'niji t'eyasajnas japokayeta tajla'm pa Judas, paka'ne siupa iniajnenk'iye papo. Yami'ni pa Jesús ti iyo ka ts'o jik'iolo'we. 48Jesús iyone'ne 'ate:
—Judas, ¿jits'iu kiu' k'iolo'we ni I'nio' Jlas ti jiwo ka ekial?
49Siojopo yijap pa Jesús, ti itijnisieje siupa iyo ka wone papo i'nio', sekyi'i i'yasisi'n ti iyo'ate:
— Saka'niona, ¿jiwojonk'iye ka sijnatis jitio' inkienaja?
50Ijwienjli'ne siojo ijwieja'm pa pa'yijis jika anechiyas jikawo, ti jik'iote ilie'ne, ti tom jijweye. 51Jesús ijliuye'ne japo t'eyasajnas ti iyone'ate:
—¡'Esiji leyeyi!
Sekyi'i Jesús isiejts'e'ne japa jik'iote paka, 'yina 'es'ne. 52Sekyi'i ti kiak t'ipa iyonayipi, siupapo pa'yijis jika anechiyasas, siu'neje papo tokis i'yena pet japa 'najla'wet, siu'neje papo kijilas ti kia'iyo jle' po', siupapo name ti janekisi pa Jesús:
—¿Yot'iyi'ni ti jiwoye astesajnatis jitioye, jla'yi ti jiwo ask'iulisie', ti jiniamak'i, siwonayeyi 'ate 'ni i'nio' kalankijieta? 53Jlomasatak'i ti a'ni ts'e jla'a 'najla'wet, tiwet'iana ka akienak'i'm. Lapakawo ti aska jloma'yasa'm, kajeyepa yiyi ni jijweye na ajnatiok.
Pedro ijwil ka je intant'ieje pa Jesús (Mt 26.57-58; Mc 14.33-54,66-72; Jn 18.12-18,25-27)
54Isimat'iyits'iji pa Jesús ti 'yutits'i a'laja'm, ijioyisi 'wete pa pa'yijis jika anechiyas. Sek k'iejliyiji pet pi iniu'we ja Pedro, ti yamatak'i. 55Pajt'ik'ipe ta'a ti tijliajnik'i pa jwat, ts'e jikiowe'e pa jika a'leje'n pa pa'yijis jika anechiyas. Paka'ne ti nowisiji ti yiyisiap. Pedro yiji napoka ti yik'iji'n ts'e, 56ti jwat jlal itie'e ja Pedro. Sekyi'i siojopa inkawoki ti i'wina sekt'iyi'i'ni ti i'yen'ni, sekyi'i itiant'ieje'ne. Sekyi'i ijwijlam'ne papo ijia ti iyo'ate:
—Napoka Jesús jla'yis, jikiecha 'na 'nak yi'i.
57Pedro iyo'ne 'ate ti inikakiuyeyi:
—¡Jla'a i'nioki, jlam jiwoyi, je sitiant'ieje pak jijwel'ni!
58Paj ti 'nesat'ijyi pi jikiecha, ti i'winat'ijyi, kiak t'ipa iyonayi'ijyi:
—Am 'neje ti a'yis japoka.
Pedro isiujlie ti iyo'ate:
—¡Jlam jiwoyi, je ya'am!
59Inetitinki ijwienjle'e ti japa yiji, ti 'nesat'ijyi pi jikiechaye'eje ti iyone'ate:
—'Wanjliyi ijiate ti 'naka ti yijap'ne. Kajeyepa Galilea jlele 'neje pet.
60Pedro isiujlie ti iyo'ate:
—¡Je ts'ajane paka yone siupi jijwel'ni!
'Yina Pedro jlam'ne je iliyi ti tamti'ni ti pakayi ti yapat'ipi pa ajwenta. 61Sekyi'i Saka'niona tejeyi'ni ja Pedro ti i'yenayi. Ti Pedro i'winayi sekyi'i jitiej t'ipa wujwak'ipe siupa ti Saka'niona iyone'ate, “Siu'nie ajnaj ka majletiejejna ka nap ni ajwenta, janajapajayiji ti janikakiu'ni ti jajwel ja ke intant'iejk'i.”
62Pedro tajlat'ipi seka'a siupa yi'i'ni, paj ti je k'iejeye'e ti yap.
Tiliakik pa Jesús
(Mt 26.67-68; Mc 14.65)
63Siupapo i'nio' ti'yenkinaja pa Jesús wuj ti iliakiyis ti yejes'ni, 64ip'ionis'ni ape'e pi jitiokio', sekyi'i ti iyonis'ni 'ate:
—¡Jwel, ten siupa inaj!
65'Loj siupuwa iyonisits'i'ni ti iliakiyis.
Jesús tenaja tieyi'i papo Judíojos jlosikis jiwos siupapo ti jlamt'iyijipe (Mt 26.59-66; Mc 14.55-64; Jn 18.19-24)
66Jlampa jloma 'yakajaja'n, initotk'i'ne wita'm siupapo kijilas jle' po', siu'neje papo pa'yijis jika anechiyasas, siu'neje papo taka'neyasane pet pa Moisés jika'neyasajnaye. Jesús tikiniejeje'ni papo Judíojos jlosikis jiwos, sekyi'i ti i'yasat'iyisimpe ti iyonisi 'ate:
67—Jwelts'e'm, ¿ma a'am siunie Injwajieti Sinia' jijliujwanik?
Isiujlie ti iyo'ate:
—Jot'itie ka je sakakiuye ka inijwe'el ti ya'am. 68Siut'itie ka 'yasajyi'n pet, kiak janwo ja ká akiujliek'i'm. 69'Nakap'ane ni I'nio' Jlas ti janejyi'n jijweye ni Sinia' ti lajk'ipa paka ijnojliji.
70Wikie'eyi siupapo sekyi'i ti ipi'yayis sekyi'i iyoyis'ne 'ate:
—¿Amp'ant'e ti Sinia' Jlajts'a'm?
Jesús isiujlie papo ti iyo'ate:
—'Najanayetaja pi jiwonayi.
71'Yina iyoyis'ne 'ate:
—¡Leyeyi! ¡Je asetiana paka injwelik'iji'n siupa ka jitisa' ti same ti ape'yak ti inijwe'el!
Currently Selected:
Lucas 22: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
